អ្នកជំនាញចិត្តវិទ្យាលើកឡើងថា បញ្ហាសុខភាពផ្លូវចិត្តជារឿងយើងទាំងអស់គ្នា មិនអាចតែម្នាក់ឯង អាចដោះស្រាយបានទេ ពោលគឺត្រូវការ ការគាំទ្រពីគ្រប់ភាគីដែលពាក់ព័ន្ធ ហើយតួអង្គទាំងនោះ យ៉ាងហោចណាស់ក៏​ត្រូវមានចំណេះដឹង របៀបការអនុវត្តថែទាំសុខភាពឱ្យបានល្អ និងកាត់បន្ថយការមាក់ងាយ។

ក្នុងឱកាសរួមគ្នាគាំពារសុខភាពផ្លូវចិត្ត និងលើកកម្ពស់ការយល់ដឹងអំពីសុខភាពផ្លូវចិត្ត បណ្ឌិតចិត្តវិទ្យា ខាន់ សារ៉េត មានប្រសាសន៍ថា ដើម្បីជាការឆ្លើយតបទៅនឹងការលើកកម្ពស់ការយល់ដឹងសុខភាពផ្លូវចិត្តរបស់យុវវ័យ ទីមួយយើងត្រូវផ្តល់ចំណេះដឹងទាក់ទងទៅនឹងសុខភាពផ្លូវចិត្ត ហើយចំណេះទៀតសោត មិនត្រឹមតែផ្តល់ចំពោះនិស្សិតប៉ុណ្ណោះទេ ប៉ុន្តែគឺជាការផ្តល់ចំពោះគ្រូបង្រៀន អ្នកអប់រំ និងផ្តល់ជូនបុគ្គលិកគ្រប់គ្រងផងដែរ ក្នុងគោលដៅដើម្បីឱ្យពួកគាត់ចូលរួមទាំងអស់គ្នាប្រកបដោយប្រសិទ្ធភាព។

មនុស្សមួយចំនួនដឹងដែរ ថាមានបញ្ហាផ្លូវចិត្ត ប៉ុន្តែមិនបានទៅរកការព្យាបាល ឬក៏ពិភាក្សានោះទេ! ព្រោះតែខ្លាចការមាក់ងាយ ខ្លាចការរើសអើង ហើយជ្រើសយកការសម្ងំស្ងៀម លាក់បញ្ហាទុក ខណៈសុខភាពផ្លូវចិត្តជារឿងយើងទាំងអស់គ្នា និងមានភាពពាក់ព័ន្ធគ្នា។ ពេលរាងកាយឈឺ មនុស្សហ៊ានប្រាប់គេ ហ៊ានទៅរកពេទ្យ ចុះនៅពេលដែលយើងមានបញ្ហាផ្លូវចិត្ត ហេតុអ្វីមិនហ៊ានបង្ហាញ មិនទៅរកសេវា?

បណ្ឌិតចិត្តវិទ្យា ខាន់ សារ៉េត

លោកបណ្ឌិតបន្ថែមថា ដើម្បីយល់ដឹងពីវិធីដោះស្រាយខ្លះៗនៅពេលជួបបញ្ហា យើងគួរព្យាយាម ដោះស្រាយខ្លួនឯងសិននៅក្នុងកម្រិតមួយប៉ុណ្ណោះ។ ប៉ុន្តែបើដោះស្រាយមិនបាន យើងត្រូវតែស្វែងរកសេវាផ្សេងទៀតដើម្បីជួយខ្លួនឯង។ រាល់រឿងទាំងអស់យើងអាចដោះស្រាយ ប៉ុន្តែមិនប្រាកដថា ដោះស្រាយបានទាំងអស់នោះទេ ដែលជាហេតុបញ្ជាក់ថា មនុស្សត្រូវការជំនួយ ប៉ុន្តែយ៉ាងហោចណាស់ យើងយល់ពីដំណោះស្រាយកម្រិតបឋមជាមុន ដែលនេះជារូបមន្តមួយក្នុងកាត់បន្ថយសម្ពាធ។

ទន្ទឹមគ្នានោះ ការស្គាល់ពីន្លែងផ្តល់សេវា សុទ្ធសឹងតែ ជាចំណែកសំខាន់​ និងព្យាយាម សម្គាល់ពីកម្រិតនៃបញ្ហាខ្លួនឯង ហើយការគិតបែបសាមញ្ញា បែបវិជ្ជមានក៏អាចជួយបានដែរ។ ជាក់ស្តែង សិស្សដែលសិក្សាផ្ទាល់នៅសាកលវិទ្យាល័យភូមិន្ទភ្នំពេញ ទទួលបានឱកាសទទួលបានសេវាប្រឹក្សាដោយមិនគិតថ្លៃ រួមទាំងមន្រ្តីអប់រំនៅក្នុងសាលាផងដែរ។ ខណៈនិស្សិតមួយចំនួនដែលរៀននៅទីនេះ មិនធ្លាប់បានជ្រាបជាព័ត៌មាននៅឡើយ។

តាមរយៈការសិក្សាស្រាវជ្រាវពីលោកបណ្ឌិតចិត្តវិទ្យា ខាន់ សារ៉េត និងធ្លាប់ធ្វើការសិក្សាមួយ ក្នុងការស្វែងរកការព្យាបាល លោករំលេចឱ្យដឹងថា ក្នុងចំណោមយុវវជន មានភាគរយខ្ពស់គួរសមចូលចិត្តស្វែងរកការព្យាបាលតាមរយៈអនឡាញ តាមរយៈអ៊េប (APP) ទាំងនេះក៏ដោយសារតែបញ្ហាសុខភាពផ្លូវចិត្តមានការរើសអើង ធ្វើឱ្យមនុស្សមិនហ៊ានទៅរកសេវាដោយផ្ទាល់ទេ។ ពួកគេស្វែងយល់ពីសុខភាពផ្លូវចិត្តដោយស្ងាត់ៗ ដូច្នេះហើយ​ទើបសាលាភូមិន្ទភ្នំពេញ មានការសហការគ្នាបង្កើត App មួយឡើង និងគ្រោងឱ្យមានការអនុវត្តនៅឆ្នាំ២០២៥ ដោយឡែកបច្ចុប្បន្ន ស្ថិតក្នុងការសាកល្បង ដោយមានរួមបញ្ចូលបីភាសា ភាសាខ្មែរ ភាសាអង់គ្លេស និងភាសាវៀតណាម៕