“ដើម្បីទទួលបានជោគជ័យ វឌ្ឍនភាពក្នុងជីវិត ការងារ និងអាជីវកម្ម យុវជនត្រូវមានចំណង់ ចំណេះ ជំនាញ ចំណងទាក់ទង និងចរិយាសម្បត្តិ(ចរិត)”។ នេះជាការលើកឡើងរបស់ឧកញ៉ា ប៉ិច បូឡែន អគ្គនាយកបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប ក្នុងកម្មវិធីផ្សព្វផ្សាយអាហារូបករណ៍ដល់ថ្នាក់ទី១២ កាលពីពេលថ្មីៗកន្លងមកនេះ។

បើតាមលោកឧកញ៉ា ប៉ិច បូឡែន ចំណង់ ដែលលើកមកនិយាយនេះ គឺសំដៅលើក្តីស្រលាញ់ គោលដៅ បុព្វហេតុសន្ទុះចិត្ត និងឆន្ទៈ។ ដោយជាធម្មតានៅពេលប្អូនៗកំពុងនៅសិក្សាតែងតែគិតថាទៅថ្ងៃមុខចង់មានការងារល្អធ្វើ មានរថយន្តទំនើបជិះ និងមានផ្ទះស្អាតរស់នៅសមរម្យនៅក្នុងសង្គម ដែលទាំងនេះគឺជាចំណង់ ប៉ុន្តែប្អូនៗក៏ត្រូវស្វែងរកគោលដៅរបស់ខ្លួនឱ្យបានពិតប្រាកដ និងដាក់សន្ទុះចិត្តទៅមុខ ដើម្បីសម្រេចចំណង់ឱ្យក្លាយជាការពិត។ ម្យ៉ាងទៀត គោលដៅតែងតែប្រែប្រួលលឿនណាស់ ដូចនេះត្រូវកំណត់ ហេតុផលឱ្យច្បាស់លាស់ និងកំណត់គោលដៅ៥ឆ្នាំ និង១០ឆ្នាំទៀត ចង់ក្លាយជាអ្វី? ដើម្បីកុំឱ្យបាត់ភាពម្ចាស់ការលើខ្លួនឯង។

រីឯចំណេះវិញ អ្នកជំនាញផ្នែកអប់រំបានបញ្ជាក់ថា យុវជនត្រូវមានចំណេះដឹងទូទៅទូលំទូលាយទាំងក្នុងតំបន់អាស៊ាន និងសកលលោក ភាសាបរទេស ចិត្តសាស្រ្ត ប្រវត្តិសាស្រ្ត ភូមិសាស្រ្ត នយោបាយ សេដ្ឋកិច្ច ព្រមទាំងបច្ចេកវិទ្យាផងដែរ។ លើសពីនេះ យុវជនត្រូវខិតខំសិក្សាស្រាវជ្រាវឱ្យបានច្រើន និងស្វែងរកចំណេះថ្មីៗតាមរយៈដំណើរកម្សាន្តនៅក្រៅប្រទេស និងឈ្វេងយល់ពីប្រតិបត្តិការគម្រូអាជីវកម្មថ្មីៗ។

ទន្ទឹមនឹងនេះ លោកឧកញ៉ាបញ្ជាក់ថា យុវជនក៏ត្រូវចាប់យកជំនាញណាមួយឱ្យប្រាកដប្រជា។ ចេះធ្វើឱ្យបានលទ្ធផលច្បាស់លាស់ ហើយកុំគ្រាន់តែដឹង និងបានត្រឹមតែនិយាយ។ ម្យ៉ាងវិញទៀត យុវជនគួរចូលរួមការងារស្ម័គ្រចិត្ត ដើម្បីទទួលបានចំណេះដឹងថ្មីបន្ថែម ជំនាញ និងបទពិសោធន៍ការងារជាក់ស្តែង។

ចំពោះចំណងទាក់ទងវិញ លោកឧកញ៉ាពន្យល់ថា ធ្វើអ្វីក៏ដោយយុវជនត្រូវការបណ្តាញទំនាក់ទំនង ដើម្បីប្រឹក្សាយោបល់ រួមគ្នាគិត រួមគ្នាធ្វើ ជួយយកអាសារគ្នានិងចែកប្រយោជន៍គ្នា។ តាមលោកឧកញ៉ា យុវជនត្រូវរាប់អានមិត្តភក្តិឱ្យបានច្រើន ចូលរួមការងារសង្គម និងការងារស្ម័គ្រចិត្ត ដើម្បីកសាងទំនាក់ទំនងល្អ និងបង្កើតឱកាសផងដែរ។

អគ្គនាយកបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប បន្ថែមថា បើយុវជនមានសម្បត្តិទាំង៤ខាងលើ តែបើចរិតយ៉ាប់ ចរិយាសម្បត្តិអន់ លទ្ធផលជីវិតក៏មិនអាចល្អដែរ។ ដូច្នេះត្រូវស្វែងរកកំណត់ និងប្រកាន់យកចរិតសមស្រប និងល្អសមរម្យសម្រាប់ជីវិត និងអាជីពការងារ។

លោកឧកញ៉ា ប៉ិច បូឡែន

“កុំស្លូតពេក ក្រែងគេកិបកេង កុំកាចពេក ក្រែងគេស្អប់មិនហ៊ាននៅក្បែរ។ កុំទាបពេក ក្រែងគេជាន់ កុំខ្ពស់ពេករហូតភ្លេចខ្លួនភ្លេចមិត្តភក្រ្តបងប្អូន…ជាដើម, ត្រូវមានចិត្តល្អ និងក្លាហានក្នុងពេលជាមួយគ្នា។ កុំកេងគេ ហើយក៏កុំរស់នៅ ដើម្បីតែសេចក្តីសុខអ្នកដទៃ។ ត្រូវក្លាហានក្នុងការនិយាយដោយការគោរពអ្នកដទៃ និងហ៊ាននិយាយការពារប្រយោជន៍យើង…”

លោកឧកញ៉ា ប៉ិច បូឡែន ក៏បានក្រើនរំលឹកទៅដល់យុវជនត្រូវចេះផ្ទៀងផ្ទាត់អ្វីដែលរៀនក្នុងសៀវភៅ និងពីសាលា ជាមួយទិដ្ឋភាពជាក់ស្តែងក្នុងសង្គម ហើយរៀនគ្រប់គ្រងផ្លូវអារម្មណ៍ ស្មារតី និងទំនាក់ទំនងក្រុមការងារដែលជំនាញនេះមិនបានបង្រៀននៅមហាវិទ្យាល័យនោះទេ៕