បុណ្យមាឃបូជា ជាពិធីបុណ្យធំមួយក្នុងព្រះពុទ្ធសាសនា ដោយពុទ្ធសាសនិកទាំងគ្រហស្ថ និងបុព្វជិតដែលគោរពប្រតិបត្តិជាប់លាប់តែងតែចូលរួមមិនអាចខានបាន ។

លោកបណ្ឌិត ឈត ប៊ុនថង ប្រធានផ្នែកទំនាក់ទំនងវប្បធម៌ អប់រំ និងទេសចរណ៍ នៃវិទ្យាស្ថានទំនាក់ទំនងអន្តរជាតិ នៃរាជបណ្ឌិតសភាកម្ពុជា បានលើកឡើងថា ពិធីបុណ្យមាឃបូជា ជាពិធីធំមួយក្នុងព្រះពុទ្ធសាសនា ដូចនេះប្រជាជនដែលកាន់ព្រះពុទ្ធសាសនា ឬប្រទេសដែលប្រកាន់យកសាសនាព្រះពុទ្ធគឺមានការប្រារព្ធយ៉ាងអធិកអធមខ្លាំងណាស់ ត្បិតមិនសូវទាក់ទាញយុវជនឱ្យចូលរួមច្រើនក៏ពិតមែន ប៉ុន្តែបើក្រឡេកទៅមើលប្រទេសកម្ពុជា និងប្រទេសផ្សេងៗដូចជា ប្រទេសថៃ ប្រទេសស្រីលង្កា ប្រទេសឥណ្ឌា និងប្រទេសផ្សេងៗដែលប្រកាន់យកព្រះពុទ្ធសាសនាបានប្រារព្ធពិធីយ៉ាងធំរហូតដល់មានការអនុម័ត ពីអង្គការសហប្រជាជាតិជា​ពិធី​បុណ្យ​អន្តរជាតិ​មួយ ដែល​គេ​អាច​ប្រារព្ធ​ធ្វើ​នៅ​តាម​ការិយាល័យ​ទាំងឡាយ​របស់​អង្គការ​សហ​ប្រជាជាតិ​នៅ​លើ​ពិភពលោក។

លោកបណ្ឌិត ឈត ប៊ុនថង យល់ឃើញថា ដើម្បីឱ្យប្រជាជនខ្មែរដែលកាន់ព្រះពុទ្ធសាសនាអាចចូលរួម និងអ្នកមិនទាន់បានចូលរួមពិធីនេះជាប់លាប់ជាដំបូងត្រូវឱ្យប្រជាជនស្វែងយល់ឱ្យបានច្បាស់ពីអត្ថន័យ នៃពិធីបុណ្យនេះដោយការសម្រាយពាក្យបាលីសំស្ក្រឹតដែលពាក់ព័ន្ធជាមួយនឹងខ្លឹមសារនៃពិធីបុណ្យឱ្យកាន់តែងាយយល់ ព្រោះកាលណានិយាយពាក្យបាលីសំស្រ្តឹតធ្វើឱ្យពិបាកយល់ក៏ជាកត្តាមួយដែលពួកគាត់មិនចូលរួមផងដែរ។ 

លោកបណ្ឌិតបន្ថែមថា ក្រៅពីជួយផ្សព្វផ្សាយក៏អាចធ្វើឱ្យមានរូបភាពទាក់ទាញផង ប៉ុន្តែរូបភាពទាក់ទាញនោះមិនមែនធ្វើឱ្យខូចទ្រង់ទ្រាយដើម នៃពិធីនោះទេ។ លោកបណ្ឌិតបានលើកឧទាហរណ៍ឡើងថា ខ្មែរយើងបច្ចុប្បន្ននៅតែប្រើប្រាស់សម្លៀកបំពាក់ហូលផាមួងដដែល ប៉ុន្តែមានការបន្ថែមការច្នៃម៉ូតឱ្យកាន់តែស្រស់ស្អាត និងទាន់សម័យកាល ដូចនេះពិធីបុណ្យមាឃបូជា ពិសាខបូជា ឬបុណ្យព្រះពុទ្ធសាសនាផ្សេងៗគួរតែរក្សាខ្លឹមសារនៅដដែល តែទម្រង់ខាងក្រៅ​គួរតែដូរខ្លះដើម្បីមានការទាក់ទាញទៅដល់យុវជន។

លោកបណ្ឌិតបន្ថែមថា ប្រជាពលរដ្ឋជាពុទ្ធសាសនិក ឬយុវជនក្ដី ពុំគួរមើលតែសម្បកក្រៅរាល់ពិធីបុណ្យផ្សេងៗឡើយ បើទោះបីជាបរិបទនៃពិធីបុណ្យមិនសូវមានភាពទាក់ទាញ ប៉ុន្តែជាពិធីបុណ្យដែលមានន័យសម្រាប់ធ្វើឱ្យមនុស្សស្វែងយល់អំពីសេចក្ដីសុខ សេចក្ដីស្ងប់ សុភមង្គល ឬស្វែងយល់ពីជីវិតផ្សេងៗ ដូចនេះមនុស្សមិនត្រូវការតែសប្បាយនោះទេ ក៏ត្រូវការធាតុទាំងអស់នោះដែរ៕