កំពត – នៅក្នុងវគ្គបំប៉នស្តីពីការប្រើប្រាស់សៀវភៅសិក្សាគោលមុខវិជ្ជាអប់រំសុខភាពនៅតាមគ្រឹះស្ថានសិក្សា ដើម្បីលើកកម្ពស់គុណវុឌ្ឍនិគ្រូបង្រៀនថ្នាក់ទី៨ និងថ្នាក់ទី១១ កាលពីថ្ងៃទី១៧ ខែឧសភា ឆ្នាំ២០២៣ លោកស្រីវេជ្ជបណ្ឌិត ឆាយ គឹមសុទ្ធាវី ប្រធាននាយកដ្ឋានសុខភាពសិក្សា នៃក្រសួងអប់រំយុវជន និងកីឡា មានប្រសាសន៍ថា ការយល់ដឹងពីសុខភាព ជួយឱ្យយើងមានអាយុវែង និងសម្រេចគោលដៅសិក្សា ហើយត្រូវផ្តល់នូវសេចក្តីស្រលាញ់ និងការអត់ឱនដល់គ្នាទៅវិញទៅមកឱ្យបានច្រើន ដើម្បីធ្វើឱ្យជីវិតផ្ទាល់ខ្លួន គ្រួសារ និងសង្គមមានការរីកចម្រើន។

លោកស្រីវេជ្ជបណ្ឌិត ឆាយ គឹមសុទ្ធាវី បានថ្លែងអំណរគុណដល់ថ្នាក់ដឹកនាំនាយកដ្ឋានសុខភាព មន្ទីរអប់រំយុវជន និងកីឡាខេត្ត លោកនាយក នាយិកា លោកគ្រូ អ្នកគ្រូបង្គោលមុខវិជ្ជាអប់រំសុខភាពសិក្សា និងអង្គការរ៉ាក់ប្រចាំនៅកម្ពុជា ដែលបានយកចិត្តទុកដាក់ដល់សុខភាពសិស្សានុសិស្ស សហការបើកវគ្គបំប៉នសំដៅលើកកម្ពស់សុខភាពទាំងផ្លូវកាយផ្លូវចិត្តនិងសង្គម។

លោកស្រីសាស្រ្តាចារ្យ តំណាងអង្គការរ៉ាក់ប្រចាំកម្ពុជា មានប្រសាសន៍ថា កម្មវិធីវគ្គបំប៉នសៀវភៅសិក្សាគោលមុខវិជ្ជាអប់រំសុខភាពថ្នាក់ទី៨ និងថ្នាក់ទី១១នេះ បានផ្តល់ដល់លោកគ្រូ អ្នកគ្រូ និងសិស្ស តាមសាលាគោលដៅទទួលបាននូវចំណេះសម្បទា បំណិនសម្បទា និងចរិយាសម្បទា សំដៅចូលរួមចំណែកអភិវឌ្ឍន៍ធនធានមនុស្សនៅកម្ពុជា។

លោកជំទាវ គឹម សេដ្ឋានី រដ្ឋលេខាធិការនៃក្រសួងអប់រំ យុវជន និងកីឡា ធ្លាប់មានប្រសាន៍ថា ក្រសួងអប់រំ យុវជន និងកីឡា បានដាក់បញ្ចូលមុខវិជ្ជា “អប់រំសុខភាព” ទៅក្នុងកម្មវិធីសិក្សាគោល ដើម្បីផ្តល់នូវចំណេះដឹង ជំនាញ ឥរិយាបថវិជ្ជមាន និងបំណិនចាំចាច់សម្រាប់ការថែទាំសុខភាពខ្លួន ដល់បុគ្គលិកអប់រំ និងអ្នកសិក្សា តាមរយៈការអនុវត្តក្បួនអនាម័យ និងបរិស្ថានស្អាត កាត់បន្ថយជំងឺឆ្លង ជំងឺមិនឆ្លង និងលើកកម្ពស់ការរស់នៅប្រកបដោយសុខភាព។

លោកជំទាវ គឹម សេដ្ឋានី បន្ថែមថា មុខវិជ្ជាអប់រំសុខភាព មានសមាសភាគចំនួន៦ រួមមាន ទី១.សុខភាពបឋម ទី២.សុខភាពផ្លូវចិត្ត ទី៣.សុខភាពបន្តពូជនិងសុខភាពផ្លូវភេទ ទី៤.សុខភាពនិងបរិស្ថាន ទី៥.សុខភាព និងជំនឿ និងទី៦. សុខភាព និងសេដ្ឋកិច្ច។

គួរជម្រាបជូនថា ការអភិវឌ្ឍន៍មេរៀនអប់រំសុខភាពមានការយកចិត្តទុកដាក់ខ្ពស់ទៅលើអត្ថប្រយោជន៍ និងភាពទាក់ទងនៃមេរៀនទៅនឹងបរិបទសុខភាពនៃប្រទេសកម្ពុជា, ប្រសិទ្ធភាពនៃការរៀននិងភាពប្រទាក់ក្រឡានៃមេរៀនពីថ្នាក់មួយទៅថ្នាក់មួយ, មេរៀនដែលចាំបាច់ សមស្របនឹងអាយុ និងកម្រិតថ្នាក់របស់សិស្ស, ផ្តល់ការអប់រំសុខភាពគ្រប់ជ្រុងជ្រោយដែលអាចឱ្យសិស្សប្រែក្លាយការរៀនទៅជាការអនុវត្តជាក់ស្តែង បានភាពងាយអាន និងងាយយល់សម្រាប់អ្នកប្រើប្រាស់៕