ការលេងល្បែងជះទឹកត្រូវបានគេកត់សម្គាល់ឃើញថា ប្រជាជនខ្មែរពេញនិយមលេង ស្ទើរតែគ្រប់ខេត្តក្រុងក្នុង​ឱកាស​ពិធីបុណ្យចូលឆ្នាំខ្មែរ។ អ្នកជំនាញវប្បធម៌ពន្យល់ថា ការលេងទឹកជំនាន់ថ្មីនេះ គឺខុសប្លែកគ្នាពីការលេងទឹកជំនាន់មុន ដែលអាចបង្កជា​បញ្ហាមិនល្អ, តែយ៉ាងណាអ្នកជំនាញស្នើ​ឱ្យ​លេងដោយការគោរពសិទ្ធិគ្នាទៅវិញទៅមក។

លោកបណ្ឌិត ឈត ប៊ុនថង មន្ត្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជា មានប្រសាសន៍ថា ការលេងជះទឹកដែលប្រជាជនជនខ្មែរជំនាន់មុនធ្លាប់លេងក្នុងឱកាសបុណ្យចូលឆ្នាំខ្មែរ គឺក្នុងរូបភាពវប្បធម៌។ តែក្រោយមក ក៏មានការលេងជះទឹកដោយប្រើកាំភ្លើងបាញ់ទឹក ការច្រកថង់គប់ទឹក ហាក់ដូចជាចម្លងមកពីប្រទេសជិតខាង ហើយប្រទេសផ្សេងៗក៏មានឃើញមានការលេងទឹករបៀបនេះដែរ។

មន្ត្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជា បញ្ជាក់បន្ថែមថា ការលេងទឹកដោយការច្រកថង់គប់ ឬជះទឹក នៅពេលមានអ្នកធ្វើដំណើរ ជិះឡាន ជិះម៉ូតូ អាចបង្កឱ្យមានបញ្ហាគ្រោះថ្នាក់ចរាចរណ៍។ លោកបណ្ឌិតបន្តថា អ្នកលេងទឹកខ្លះមិនបានដឹងថា អ្នកកំពុងធ្វើដំណើរគេចង់លេងដែរ ឬក៏អត់ បើគេចង់លេង គឺគេត្រៀមខ្លួនរៀបចំទុកដាក់ទូរស័ព្ទ កាបូបលុយ មិនយកតាមខ្លួន ឬមានប្រើប្រាស់ប្រដាប់ការពារមិនឱ្យត្រូវទឹក មានន័យថា គេត្រៀមលេង។ ប៉ុន្តែបើអ្នកមិនចង់លេង ហើយជះទឹកឱ្យសើមរបស់របរពួកគាត់ ពេលខ្លះគាត់មិនសប្បាយចិត្ត ហើយករណីខ្លះអាចបង្កឱ្យមានជម្លោះ។

លោកបណ្ឌិត ឈត ប៊ុនថង បន្ថែមថា ផលប៉ះពាល់ដទៃទៀត គឺមានយុវជនមួយចំនួនលេងបន្លំ បៀតបៀនដល់ក្មេងស្រី ទោះមិនមានច្រើន តែតែងឃើញមានករណីនេះកើតឡើង។ ផលប៉ះពាល់ខ្លះទៀត គឺប្រើកាំភ្លើងបាញ់ទឹក ឬទុយយោរដែលមានកម្លាំងបាញ់ខ្លាំង ធ្វើឱ្យប៉ះពាល់ភ្នែកក៏មានបញ្ហាដែរ។

បើតាម លោកបណ្ឌិត ឈត ប៊ុនថង កន្លងមកអជ្ញាធរបានចេញសេចក្ដីប្រកាសមិនឱ្យលេងបាញ់ទឹកដោយប្រើកាំភ្លើងដែលមានកម្លាំងខ្លាំង មិនឱ្យលេងជះទឹក ឬច្រកថង់ទឹកគប់ធ្វើឱ្យប៉ះពាល់ដល់អ្នកធ្វើដំណើរ អាចបង្កឱ្យមានគ្រោះថ្នាក់ចរាចរណ៍ជាដើម។ ប៉ុន្តែទោះជាមានការប្រកាសអំពាវនាវពីអាជ្ញាធរក៏ដោយ ក៏គេសង្កេតឃើញថា​ នៅតែមានសកម្មភាពលេងជះទឹកក្នុងឱកាសបុណ្យចូលឆ្នាំខ្មែរ ប៉ុន្តែការលេងល្អជាងមុន។

“មានការកែទម្រង់ការលេង ដោយកន្លែងខ្លះ គេលេងនៅមួយកន្លែង មានន័យថា លេងនៅតាមផ្លូវ ឬកន្លែងប្រមូលផ្ដុំណាមួយ ដែលមានការចូលរួមពីអជ្ញាធរ”

គួរជំរាបជូនថា ដើម្បីបញ្ចៀសបញ្ហា​មិនល្អដែលអាចកើតមានឡើង​ក្នុងកំឡុងនៃពិធីបុណ្យចូលឆ្នាំប្រពៃណីជាតិ អាជ្ញាធរ​រាជធានីខេត្តតែងតែចេញសេចក្តីណែនាំជាប្រចាំ តួរយ៉ាងនៅក្នុងឆ្នាំ២០២៥នេះ រដ្ឋបាលរាជធានីភ្នំពេញ បានចេញសេចក្ដីសេចក្តីណែនាំមួយ​ដើម្បីរក្សាសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ នាឱកាសបុណ្យចូលឆ្នាំថ្មីប្រពៃណីជាតិ ដោយបានហាមការលេងល្បែងជះទឹក ការជះទឹកមានពណ៌ ឬទឹកកខ្វក់ គប់ស្បោងទឹក និងការវាយដោយរំពាត់ ឬឧបករណ៍ផ្សេងៗធ្វើឱ្យប៉ះពាល់ដល់បងប្អូនប្រជាពលរដ្ឋដែលកំពុងធ្វើដំណើនៅតាមដងផ្លូវ ដែលអាចនាំឱ្យមានគ្រោះថ្នាក់ចរាចរណ៍ប៉ះពាល់ដល់អាយុជីវិត និងបង្កឱ្យមានរបួស ឬខូចខាតទ្រព្យសម្បត្តិ។ ក្នុងនោះដែររដ្ឋបាលរាជធានីភ្នំពេញ ក៏​មិនភ្លេចសំណូមពរឱ្យបងប្អូនប្រជាពលរដ្ឋទាំងអស់ ត្រូវចូលរួមគោរពច្បាប់ចរាចរណ៍ផ្លូវគោក និងមិនត្រូវបើកបរក្នុងស្ថានភាពស្រវឹង ដើម្បីចៀសវាងគ្រោះថ្នាក់ផ្សេងៗ៕