ក្នុងពិធីសម្ពោធជាផ្លូវការទារកដ្ឋានប្រចាំសហគមន៍ (CBCC) កាលពីថ្ងៃទី៦ ខែកុម្ភៈ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាប្រធានគណៈកម្មាធិការជាតិគាំពារ និងអភិវឌ្ឍកុមារតូច បានលើកឡើងថា “ទារកដ្ឋានសហគមន៍“ ផ្ដល់ភាពងាយស្រួលសម្រាប់កូនកម្មករ-កម្មការិនីមានការលូតលាស់ល្អ និង អនាគតភ្លឺស្វាង។

ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា ទារកដ្ឋានប្រចាំសហគមន៍សម្រាប់កូនកម្មករ-កម្មការិនី  ប្រជាពលរដ្ឋក្នុងសហគមន៍  ជាមណ្ឌលមើលថែទាំកុមារតូចប្រកបដោយជំនាញវិជ្ជាជីវៈដំបូងគេ និងជាគំរូនៅកម្ពុជា មានចំនួន ១៣កន្លែង ក្នុងនោះ ១០កន្លែងស្ថិតក្នុងខេត្តកំពង់ស្ពឺ និង ៣កន្លែង ស្ថិតនៅក្នុងខេត្តកំពង់ចាម គាំទ្រដោយហិរញ្ញប្បទានរបស់ធនាគារពិភពលោក (World Bank) សហការអនុវត្តដោយអង្គការពិភពកុមារ និងអភិវឌ្ឍន៍ (PE&D) និងក្រសួងជំនាញពាក់ព័ន្ធ។

រដ្ឋមន្ត្រីក្រសួងអប់រំ បានថ្លែងអំណរគុណចំពោះអាជ្ញាធរដែនដី និងឃុំគោលដៅ ដែលបានសហការ និងគាំទ្រយ៉ាងស្មោះស្ម័គ្រ ក្នុងការរៀបចំបង្កើតទារកដ្ឋានសម្រាប់កុមារតូចអាយុចាប់ពី ៣ខែ រហូតដល់ ក្រោម ៣ឆ្នាំ ប្រកបដោយជំនាញ វិជ្ជាជីវៈ និងថ្លែងអំណរគុណយ៉ាងជ្រាលជ្រៅ ចំពោះលោកជំទាវប្រធានធនាគារពិភពលោកប្រចាំកម្ពុជា និងស្ថានទូតជប៉ុនប្រចាំកម្ពុជា ដែលបានសហការផ្តល់ហិរញ្ញប្បទានដល់អង្គការពិភពកុមារ និងអភិវឌ្ឍ (PE&D) ដើម្បីសហការអនុវត្តគម្រោងទារកដ្ឋានប្រចាំសហគមន៍ (CBCC) រោងចក្រសហគ្រាស ដើម្បីជាប្រយោជន៍ដល់កុមារតូច នៅព្រះរាជាណាចក្រកម្ពុជា។

លោកស្រីបណ្ឌិត​ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ទារកដ្ឋានសហគមន៍ មានអត្ថប្រយោជន៍ ២យ៉ាង គឺទី១. សម្រាប់ឪពុកម្ដាយកុមារតូច ទី២. កុមារតូច។ អត្ថប្រយោជន៍សម្រាប់ឪពុកម្ដាយកុមារតូច ជាពិសេសសម្រាប់ម្ដាយ អាចផ្ដល់ឱកាសឱ្យម្ដាយបំពេញការងារប្រកបដោយប្រសិទ្ធភាព ដើម្បីឱ្យជីវភាពកាន់តែប្រសើរឡើង និងរក្សាស្នាដៃការងារ។

អ្នកនាំពាក្យក្រសួងអប់រំបញ្ជាក់ថា ទារកដ្ឋានសហគមន៍នេះ ធ្វើឡើងនៅជិតកន្លែងធ្វើការរបស់ឪពុកម្ដាយកុមារតូច ដើម្បីផ្ដល់ភាពងាយស្រួល​ឱ្យម្ដាយត្រឡប់មកបំបៅដោះកូន ដែលអាចឱ្យកូនទទួលបានអាហារូបត្ថម្ភបានត្រឹមត្រូវ ។ ទន្ទឹមគ្នានេះ កុមារដែលនៅក្នុងទារកដ្ឋាន នឹងទទួលបានអាហារតាមអាហារូបត្ថម្ភដែលពិនិត្យមើលត្រឹមត្រូវ ទទួលបានការបណ្ដុះបណ្ដាលត្រឹមត្រូវជាបច្ចេកទេស ធានាថា ធ្វើយ៉ាងណាឱ្យអាហារបរិភោគ មានវីតាមីន សារធាតុចិញ្ចឹមគ្រប់គ្រាន់ដើម្បីចិញ្ចឹមកុមារ និងបញ្ញាវាងវៃ ។ ម៉្យាងវិញទៀត ទារកដ្ឋានសហគមន៍នេះ ក៏មានរៀបចំជាកន្លែងក្មេងលេងដែលមានសុវត្ថិភាព និងរៀនចំណេះដឹងថ្មីៗតាមរយៈការលេង។

ក្រសួងអប់រំ លើកទឹកចិត្តឪពុកម្ដាយដែលមានកូនតូច ប្រើប្រាស់ទារកដ្ឋានសម្រាប់សហគមន៍ ដើម្បីឪពុកម្ដាយខ្លួន​​ឯង អាចបំពេញការងារប្រកបដោយប្រសិទ្ធភាព និងទុកចិត្តថា កូននៅកន្លែងដែលមានសុវត្ថិភាព ។ ទន្ទឹមគ្នានេះ កូនមានអ្នកមើលថែដោយអ្នកជំនាញ មានការបណ្ដុះបណ្ដាលត្រឹមត្រូវទាំងផ្នែកបច្ចេកទេស ផ្នែកគ្រប់គ្រង និងអាហារូបត្ថម្ភផងដែរ។

គួរជម្រាបជូនថា ឪពុកម្ដាយដែលចុះឈ្មោះប្រើប្រាស់ទារកដ្ឋានសហគមន៍នេះ ក្នុងរយៈពេលពីរខែដំបូងមិនតម្រូវឱ្យបង់ថវិកានោះទេ។ ដោយឡែក ចាប់ពីខែទី៣ អាចបង់ថ្លៃ ៤៥ដុល្លារក្នុង១ខែ សម្រាប់គាំទ្រទារកដ្ឋាន និងអាហារសម្រាប់កុមារ៕