ភ្នំពេញ – អ្នកជំនាញគាំពារកុមារអញ្ជើញមកពីស្ថាប័នពាក់ព័ន្ធនានា បានពិភាក្សាគ្នា ព្រមទាំងចាត់ទុកការរៀបចំឱ្យកុមាររៀបអាពាហ៍ពិពាហ៍ ឬរៀបការនៅវ័យកុមារ មិនមែនជាជម្រើសល្អសម្រាប់ដំណើរជីវិតក្មេងស្រីនៅកម្ពុជា ។ ឥទ្ធិពលនៃការរៀបអាពាហ៍ពិពាហ៍វ័យកុមារនេះ អាចឱ្យកុមារីបោះបង់ចោលការសិក្សា និងកុមារីទទួលបានការអប់រំតិច កុមារីងាយជួបគុណវិបត្តិផ្នែកសុខភាព និងបាត់បង់ស្មារតីតាមរយៈការទទួលរងអំពើហឹង្សាក្នុងទម្រង់ផ្សេងៗនៅគ្រួសារ ។ នេះបើផ្អែកតាមខ្លឹមសារលើកឡើងនៅក្នុងកិច្ចសន្ទនាក្មេងស្រីដឹកនាំថ្នាក់ជាតិ រៀបចំឡើងដោយអង្គការភ្លែនអន្តរជាតិកម្ពុជា កាលពីថ្ងៃទី៣១ ខែឧសភា ឆ្នាំ២០២៣  ។

លោក យី គឹមថាន នាយករងប្រចាំប្រទេសទទួលបន្ទុកផ្នែកកម្មវិធី នៃអង្គការភ្លែនអន្តរជាតិកម្ពុជា មានប្រសាសន៍ថា កិច្ចសន្ទនាក្មេងស្រីដឹកនាំថ្នាក់ជាតិ ជាវេទិកាសុវត្ថិភាពសម្រាប់យុវជន ស្ត្រីវ័យក្មេង និងកុមារី ដើម្បីបញ្ចេញសំឡេង និងអនុវត្តសិទ្ធិរបស់ពួកគេតាមរយៈការសន្ទនាគោលនយោបាយជាមួយអ្នកធ្វើគោលនយោបាយមកពីក្រសួងពាក់ព័ន្ធក្នុងការដោះស្រាយបញ្ហាក្មេងស្រីដែលកំពុងប្រឈមមុខ ដូចជា ការបោះបង់ការសិក្សា និងការរៀបអាពាហ៍ពិពាហ៍វ័យកុមារ ។

ទន្ទឹមគ្នានេះ នាយករងប្រចាំប្រទេសនៃអង្គការភ្លែនអន្តរជាតិកម្ពុជា បានសង្កត់ធ្ងន់ថា ការបោះបង់ការសិក្សា និងការរៀបអាពាហ៍ពិពាហ៍វ័យកុមារ នៅតែជាបញ្ហាអាទិភាពដែលត្រូវដោះស្រាយ ជាពិសេសនៅតំបន់ជនបទ ។ កុមារី និងកុមារាវ័យជំទង់ងាយរងគ្រោះ ព្រមទាំងមានហានិភ័យនាពេលអនាគត ដូចជា ផលប៉ះពាល់សុខភាពរាងកាយ ការមានផ្ទៃពោះនៅវ័យក្មេង អំពើហិង្សាក្នុងគ្រួសារផ្អែកលើយេនឌ័រ និងការចុះខ្សោយនៃសេដ្ឋកិច្ចក្នុងគ្រួសារ ។

ផ្អែកតាមការសិក្សារបស់អង្គការភ្លែនអន្តរជាតិកម្ពុជាជាមួយអ្នកពាក់ព័ន្ធសំខាន់ៗ និងយុវជនដែលមានអាយុពី ១០ឆ្នាំ ដល់ ២៤ឆ្នាំ បានបង្ហាញថា មានមូលហេតុជាច្រើនដែលរួមចំណែកធ្វើឱ្យយុវជនបោះបង់ការសិក្សា ។ មូលហេតុចម្បង គឺភាពក្រីក្រ និងភាពងាយរងគ្រោះ ការធ្លាក់ទឹកចិត្តពីការមើលឃើញថា ជាសិស្សខ្សោយ ការយល់ឃើញខុសរបស់ឪពុកម្តាយអំពីសារៈសំខាន់នៃការអប់រំរបស់កុមារ ភាពទាក់ទាញនៃការទទួលបានការងារ សុវត្ថិភាព និងបញ្ហាភូមិសាស្ត្រជាដើម ។

យោងតាមរបាយការណ៍វិភាគស្ថានភាពយុវជនឆ្នាំ២០២០ ដែលធ្វើឡើងដោយមូលនិធិសហប្រជាជាតិសសម្រាប់ប្រជាជន បានបង្ហាញថា យុវជនចំនួន២៩% ដែលមានអាយុពី ១០ ដល់២៤ ឆ្នាំបានបោះបង់ការសិក្សា ដែល៣៨% ក្នុងចំណោមពួកគេជាសមាជិកនៅក្នុងគ្រួសារដែលមានប័ណ្ណសមធម៌ ។ ប្រភពព័ត៌មានដដែលបង្ហាញថា ស្ត្រីវ័យក្មេង ១៩% បានរៀបការមុនអាយុ ១៨ឆ្នាំ ខណៈបុរសវ័យក្មេងមានតែ ៦% ប៉ុណ្ណោះ ហើយ ១.៨% នៃកុមារីរៀបការនៅអាយុ ១៥ ឆ្នាំ ។

ជុំវិញការលើកឡើងអំពីអត្រាបោះបង់ចោលលការសិក្សារបស់កុមារីកម្ពុជា និងការរៀបអាពាហ៍ពិពាហ៍វ័យកុមារ លោកជំទាវ ហ៊ូ សាមិត្ត រដ្ឋលេខាធិការក្រសួងកិច្ចលការនារី មានប្រសាសន៍ថា ការលើកកម្ពស់សមភាពយេនឌ័រ និងការបង្កើតភាពអង់អាចដល់ស្ត្រី និងក្មេងស្រីគ្រប់រូប ជាគន្លឹះជួយទប់ស្កាត់អត្រាបោះបង់ចោលការសិក្សារបស់ក្មេងស្រី ព្រមទាំងទប់ស្កាត់ការរៀបអាពាហ៍ពិពាហ៍នៅវ័យកុមារ ។

លោកជំទាវ ហ៊ូ សាមិត្ត រដ្ឋលេខាធិការក្រសួងកិច្ចលការនារី បានបញ្ជាក់បន្តថា ការលើកកម្ពស់សិទ្ធិកុមារ និងកិច្ចការពារកុមារ ជាពិសេសការចូលរួមបង្ការទប់ស្កាត់ការរៀបអាពាហ៍ពិពាហ៍នៅវ័យកុមារ និងអភិវឌ្ឍខ្លួនក្លាយជាមនុស្សវ័យពេញវ័យ គឺជាការងារអាទិភាពរបស់រាជរដ្ឋាភិបាលកម្ពុជា ដើម្បីធានាឱ្យមានភាពល្អប្រសើរនូវបរិយាកាសរៀនសូត្រល្អក្នុងសាលា បង្កើតឱកាស ជម្រើស ឯករាជ្យភាព និងពង្រឹងអំណាចសម្រាប់ក្មេងស្រី ។ ជាមួយគ្នានេះ ការបង្កើតភាពអង់អាចដល់ស្ត្រី និងក្មេងស្រីគ្រប់រូបជាកាតព្វកិច្ច និងភារកិច្ចរបស់បុគ្គលគ្រប់រូប ។

សូមជម្រាបថា កិច្ចសន្ទនាក្មេងស្រីដឹកនាំថ្នាក់ជាតិ បានអនុញ្ញាតឱ្យយុវជនសិក្សារៀនសូត្រ ផ្សាភ្ជាប់ និងពិភាក្សាអំពីដំណោះស្រាយជាមួយអ្នកធ្វើសេចក្តីសម្រេចចិត្ត ស្របតាមគោលនយោបាយដែលមានស្រាប់ ដើម្បីគាំទ្រដល់ក្មេងស្រីវ័យក្មេងក្នុងការលើកកម្ពស់គុណភាពនៃការអប់រំ និងការបញ្ចប់អាពាហ៍ពិពាហ៍កុមារ ។

កិច្ចសន្ទនាក្មេងស្រីដឹកនាំថ្នាក់ជាតិនេះ ជាផ្នែកមួយនៃ “កម្មវិធីភាពដឹកនាំរបស់ក្មេងស្រី” របស់អង្គការភ្លែនអន្តរជាតិកម្ពុជា ដែលជាគម្រោងរយៈពេល ៥ឆ្នាំ  មានគោលបំណងពង្រឹងសមត្ថភាពរបស់ក្មេងស្រី តាមរយៈការបណ្តុះបណ្តាលស្តីពីភាពអង់អាច ភាពជាអ្នកដឹកនាំ ភាពជាពលរដ្ឋសកម្ម និងការចូលរួមជាពលរដ្ឋ។ កិច្ចសន្ទនាថ្នាក់ខេត្តទាំងប្រាំបួនត្រូវបានធ្វើឡើងជាមុន ដើម្បីប្រមូលបញ្ហាអាទិភាព និងដំណោះស្រាយដែលបានលើកឡើងដោយយុវជន ៕