ពិព័រណ៍សៀវភៅកម្ពុជាលើកទី១១ នឹងរៀបចំឡើងនៅ​សប្តាហ៍​ក្រោយនេះ ពោលគឺ​ចាប់ពីថ្ងៃទី១៩ ដល់ថ្ងៃទី២២ ខែធ្នូ ឆ្នាំ២០២៤ ខាងមុខនៅមជ្ឈមណ្ឌលសន្និបាត និងពិព័រណ៌កោះពេជ្រ ក្រោមប្រធានបទ «អ្នកអាន ជាអ្នករៀនពេញមួយជីវិត» ដោយរំពឹងថា នឹងមានអ្នកនិយមអានសៀវភៅ ទៅ​ចូលរួមទិញកាន់តែច្រើន​ដើម្បីជួយគាំទ្រ​ដល់វិស័យសៀវភៅ ក៏​ដូចជា​អ្នកនិពន្ធ។

លោក ហុក សុទ្ធិ តំណាង​គណៈកម្មការ​ពិព័រណ៍​សៀវភៅ​កម្ពុជា មានប្រសាសន៍ថា​ ពិព័រណ៍សៀវភៅកម្ពុជា ពីមួយឆ្នាំទៅមួយឆ្នាំមានចំនួនអ្នកចូលរួម​កាន់តែច្រើនទៅៗ ក្នុងនោះ​​​ព្រឹត្ដិការណ៍កាលពី​ឆ្នាំ​ទៅមាន​ចំនួនអ្នក​ចូលរួម​ដល់ទៅ​ជាង ២០​ម៉ឺន​នាក់​ ដែលជា​ចំនួន​ដ៏ច្រើន​ ដែល​ពិព័រណ៍​នៅក​ម្ពុជា​មិន​ដែលមាន​អ្នក​ចូលរួម​ច្រើន​យ៉ាង​ដូច្នេះ​ទេ។ ទោះ​ជាមាន​អ្នក​ចូលរួម​ច្រើន ប៉ុន្តែលោក ហុក សុទ្ធិ មើលឃើញថា មិន​មានអ្នកទិញ​ច្រើន​នោះទេ ដោយសារអ្នកចូលរួមក្នុងពិព័រណ៍សៀវភៅកម្ពុជាភាគច្រើនជាយុវជន សិស្ស និស្សិត ដែលស្រឡាញ់សៀវភៅ ប៉ុន្តែទិញបានតិចតួច។

លោក ហុក សុទ្ធិ ​អំពាវនាវ​ឱ្យមាន​ការចូលរួម​ក្នុងពិព័រណ៍​សៀវភៅ​កម្ពុជាកាន់​តែ​ច្រើន​​ពី​សំណាក់​​ប្រជាជនវណ្ណៈ​កណ្ដាល​ រួមមានដូចជា មន្រ្តីរាជការ អ្នកធ្វើការក្នុងវិស័យឯកជន អ្នកនយោបាយ ដែលមានការងារនឹងនរ មានលទ្ធភាព​សូមចូលរួមគាំទ្រក្នុងវិស័យសៀវភៅ ពោលគឺទិញសៀវភៅអាន។ លោក ហុក សុទ្ធិ បន្តថា បើទោះជាពួកគាត់មិនជាអ្នកចូលចិត្តអាននៅផ្ទះ ប៉ុន្តែពួកគាត់មានលទ្ធភាព​ក៏គួរទិញសម្រាប់កូនចៅ គ្រួសារ សហគមន៍ ភូមិ ឃុំ ដើម្បីយកទៅជួយដល់អ្នកដែលត្រូវការ។

តំណាង​គណៈកម្មការ​ពិព័រណ៍​សៀវភៅ​កម្ពុជា បញ្ជាក់បន្ថែមថា ឆ្នាំ២០២៤នេះ ពិព័រណ៍សៀវភៅកម្ពុជា បានរៀបចំ ស្តង់រហូតដល់ ២៩២ ដែលជាស្តង់សៀវភៅ ស្តង់សម្ភារៈសិក្សា និងស្តង់អាហារ ច្រើនជាងឆ្នាំមុន។

លោកបណ្ឌិត គឹម ពីនន់ អនុរដ្ឋលេខាធិការក្រសួងវប្បធម៌ និងវិចិត្រសិល្បៈ មានប្រសាសន៍ថា ពិព័រណ៍សៀវភៅកម្ពុជា លើកទី១១ ធ្វើឡើងក្នុងគោលបំណងចំនួន៥ រួមមាន ទី១. ជួយផ្សព្វផ្សាយការបោះពុម្ពសៀវភៅគ្រប់ប្រភេទ (ទាំងស្នាដៃអ្នកនិពន្ធចាស់-ថ្មី) ដើម្បីឱ្យមានទីផ្សារទាំងក្នុង និងក្រៅប្រទេស ទី២.ជំរុញឱ្យប្រជាជនខ្មែរមានទម្លាប់ក្នុងការអានសៀវភៅ ហើយជាសារមួយបញ្ជូនទៅដល់យុវជនឱ្យស្គាល់ពីគុណតម្លៃ នៃការអានដើម្បីអភិវឌ្ឍចំណេះដឹង និងបង្កើនគំនិតសម្រាប់ការសិក្សា និងការងារ ទី៣.បង្កើនកម្មវិធីនិទានរឿង និងគូរគំនូររូបភាពផ្សេងៗដល់កុមារដើម្បីបណ្តុះទឹកចិត្តកុមារ ឱ្យស្រលាញ់និងចូលចិត្តសៀវភៅតាំងពីនៅតូចៗ ទី៤.គាំទ្រឧស្សាហកម្មបោះពុម្ពផ្សាយនៅកម្ពុជានិងនៅក្នុងពិភពលោក និងទី៥.លើកទឹកចិត្តកវី អ្នកនិពន្ធ អ្នកស្រាវជ្រាវ វិចិត្រករខ្មែរ ដើម្បីបង្កើតស្នាដៃថ្មីៗបន្ថែមទៀត។

បើតាមលោកបណ្ឌិត គឹម ពីនន់ នៅក្នុងពិព័រណ៍សៀវភៅឆ្នាំ២០២៤ នឹង​មានសកម្មភាពជាច្រើនដូចជា ការដាក់តាំងសៀវភៅដែលចូលរួមពីអ្នកនិពន្ធ គ្រឹះស្ថានបោះពុម្ពផ្សាយ និងបណ្ណាគារនានាក្នុងព្រះរាជាណាចក្រកម្ពុជា (សៀវភៅមួយចំនួននឹងដាក់លក់ក្នុងតម្លៃពិសេស), វេទិកាស្តីពីការបោះពុម្ពផ្សាយតាមប្រព័ន្ធអេឡិកត្រូនិក, ការធ្វើបទបង្ហាញនានាទាក់ទងទៅនឹងអក្សរសាស្ត្រអក្សរសិល្ប៍ខ្មែរ និងវិទ្យាសាស្ត្រ, ការនិពន្ធសៀវភៅទៅជាខ្សែភាពយន្ត និងការអភិវឌ្ឍជំនាញការអាន ចាប់ផ្តើមអំណាន ពីដំណាក់កាលដំបូងនៃជីវិត (រួមទាំងអំណានថ្នាក់ដំបូង), ការជួបពិភាក្សា និងការទទួលយកបទពិសោធពីអ្នកនិពន្ធល្បីៗ និងមានការចុះហត្ថលេខា ពីអ្នកនិពន្ធព្រមទាំងវិចិត្រករ, កម្មវិធីអានរឿង និងល្បែងសិក្សាសម្រាប់កុមារ, ការប្រគំតន្ត្រី និងសំណួរចម្លើយចាប់យករង្វាន់ផ្សេងៗ។

គួរជម្រាបជូនថា បើគិតពីមួយឆ្នាំទៅមួយឆ្នាំ ការតាំងពិព័រណ៍សៀវភៅកម្ពុជា បានទទួលការគាំទ្រពី សាធារណជន ពិសេសយុវជន កាន់តែច្រើនឡើងៗ ហើយបានក្លាយជាព្រឹត្តិការណ៍វប្បធម៌មួយដ៏សំខាន់ក្នុងការផ្សព្វផ្សាយ និងជំរុញលើកទឹកចិត្តឱ្យប្រជាជនខ្មែរ មានទម្លាប់ក្នុងការអានសៀវភៅ និងស្គាល់ពីគុណតម្លៃនៃការអាន ដើម្បីអភិវឌ្ឍន៍ចំណេះដឹង និងការងារ៕