ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – កីឡាការិនីអត្តពលកម្ម វ៉ិត ចន្ថា គឺជាម្ចាស់មេដាយមាសចំនួន៣ ក្នុងវិញ្ញាសាផ្សេងគ្នា នៃព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ ក្រោយពីបានប្ដេជ្ញាចិត្ត តស៊ូ ជំនះគ្រប់ឧបសគ្គជីវិត រហូតទទួលបានជោគជ័យដ៏ធំធេញសម្រាប់ខ្លួនឯង ក្រុមគ្រួសារ និងសង្គមជាតិ។ កីឡាការិនីអត្តពលកម្ម វ៉ិត ចន្ថា បាននិយាយថា ជើងសប្បនិមិត្ត ជាអាវុធដ៏សំខាន់ជំរុញឱ្យគាត់ទទួលបានមេដាយមាស។
កីឡាការិនីអត្តពលកម្ម វ៉ិត ចន្ថា និយាយថា ជើងសប្បនិមិត្តដែលរូបគាត់បានប្រើប្រាស់សម្រាប់ចូលរួមប្រកួតនេះ មានតម្លៃរាប់ពាន់ដុល្លារដោយមានការឧបត្ថម្ភពីឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាតំណាងគណៈកម្មាធិការជាតិ CAMAPGOC ដើម្បីចូលរួមប្រកួតប្រជែងយកមេដាយជូនជាតិឱ្យបានជោគជ័យ។ ជាមួយគ្នាកីឡាការិនីរូបនេះ ក៏បានថ្លែងអំណរគុណដល់រាជរដ្ឋាភិបាល អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា ព្រមទាំថ្នាក់ដឹកនាំគ្រប់ថ្នាក់ និងការគាំទ្ររបស់ប្រជាពលរដ្ឋខ្មែរ ដែលបានជួយសង្គ្រោះជីវិតជនពិការម្នាក់ឱ្យមានមុខមាត់ក្នុងសង្គមជាតិ។
ម្ចាស់មេដាយមាសលើវិញ្ញាសារត់ប្រណាំង និងលោតចម្ងាយ រូបនេះ បន្តថា ដោយសារភាពក្រីក្រ បានបណ្តុះស្មារតីជីវិតលោកស្រីឱ្យពុះពាររហូតដល់ចូលប្រកួតក្នុងវិស័យកីឡាទទួលបានជោគជ័យ និងដណ្តើមបានសមិទ្ធផលជូនជាតិ។ លោកស្រីរំលឹកថា កាលពីអាយុ១២ឆ្នាំ រូបគាត់លួចម្តាយទៅធ្វើការនៅក្នុងសិប្បកម្មឡឥដ្ឋហើយក៏ត្រូវជួបនូវឧបទ្ទវហេតុធ្លាក់ជើងចូលម៉ាស៊ីនបណ្តាលឱ្យពិការដល់បច្ចុប្បន្ន។ ក្រោយមកគាត់បានចូលហាត់កីឡា ដោយដំបូងៗគ្មានប្រាក់ឧបត្ថម្ភនោះទេ ដោយសុខចិត្តលាងចានឱ្យគេមួយថ្ងៃសុំតែមួយពេលថ្ងៃត្រង់ ពេលខ្លះមានប្អូនៗជួយបាន៥ពាន់រៀល ឬ១ម៉ឺនរៀលក៏សន្សំសំចៃទិញតែទឹកហូបប៉ុណ្ណោះ។
កីឡាការិនីអត្តពលកម្ម វ៉ិត ចន្ថា
“ជីវិតតស៊ូណាស់ ព្រោះមិនចង់ឱ្យខ្លួនឯងពិការហើយក្លាយជាបន្ទុកក្នុងគ្រួសារ ឬជាបន្ទុកក្នុងសង្គម”
កីឡាការិនីអត្តពលកម្ម វ៉ិត ចន្ថា រៀបរាប់បន្ថែមថា ជីវិតធ្លាប់តែត្រូវគេមើលងាយ មានតែខំតាំងចិត្តធ្វើឱ្យបាន មិនឱ្យដូចជាសម្ដីគេមើលងាយនោះទេ។ ដូច្នេះ ត្រូវពង្រឹងខ្លួនឯង តស៊ូដោយខ្លួនឯង ជោគជ័យទាំងនោះគឺបានមកពីការខិតខំប្រឹងប្រែង និងការជំរុញពីលោកគ្រូ អ្នកគ្រូ ថ្នាក់ដឹកនាំ និងគណៈប្រតិភូទាំងអស់។ ជាពិសេស ទម្រាំតែជោគជ័យមកដល់ថ្ងៃនេះ លោកស្រី វ៉ិត ចន្ថា ជួបការលំបាកយ៉ាងច្រើន ដួលហើយត្រូវតែងើបវិញដោយខ្លួនឯង។
គួរជម្រាបជូនថា នេះជាលើកទី១ហើយដែលមិនទាន់មានអត្តពលិកជនមានពិការភាពកម្ពុជារូបណាអាចធ្វើបាន គឺការឈ្នះមេដាយមាស៣ តែម្នាក់ឯង នៅក្នុងការប្រកួតអាស៊ានប៉ារ៉ាហ្គេម លើកទី១២ ឆ្នាំ២០២៣។ ក្នុងនោះ កីឡាការិនីពិការជើងស្តាំ វ៉ិត ចន្ថា បានឈ្នះមេដាយមាស លើការរត់ប្រណាំងចម្ងាយ២០០ម៉ែត្រ ប្រភេទ T64 គឺបន្ថែមទៅលើការឈ្នះបានមេដាយមាសលើវិញ្ញាសាលោតចម្ងាយ កាលពីថ្ងៃទី៤ និងការរត់ប្រណាំងចម្ងាយ ៤០០ ម៉ែត្រ ប្រភេទ T64 ដូចគ្នា កាលពីថ្ងៃទី៥ ខែមិថុនា៕
