មានប្រសាសន៍លើកឡើងនៅក្នុងការដាក់​ឱ្យ​អនុវត្តន៍ កម្មវិធីបណ្តុះបណ្តាលជំនាញវិជ្ជាជីវៈ និង​បច្ចេកទេស​ដល់យុវជនមកពីគ្រួសារក្រីក្រ និង​គ្រួសារងាយរងគ្រោះ ១លាន៥សែននាក់ នាព្រឹកថ្ងៃទី១៤ ខែវិច្ឆិកា សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា លើកឡើងថា ការអភិវឌ្ឍន៍​មូលធនមនុស្ស ជាកត្តាគន្លឹះសម្រាប់ផ្គង់ផ្គង់កម្លាំងពលកម្មជំនាញ ឱ្យឆ្លើយតបទៅនឹងតម្រូវការទីផ្សារ ក្នុងបរិបទនៃបដិវត្តឧស្សាហកម្ម៤.០ និងបដិវត្តកម្មឌីជីថល ដើម្បីបន្តជំរុញ និង​ទ្រទ្រង់កំណើនសេដ្ឋកិច្ចខ្ពស់ ប្រកបដោយចីរភាព នងិ​បរិយាប័ន។

សម្តេចធិបតីមានប្រសាសន៍បញ្ជាក់ថា ការមានកម្លាំងពលកម្មជំនាញគ្រប់គ្រាន់ គឺជាភាពចាំបាច់ដើម្បីគាំទ្រដល់ការធ្វើបដិវត្តកម្មទ្រទ្រង់គ្រប់វិស័យ នៃសេដ្ឋកិច្ចឆ្ពោះទៅកាន់សកម្មភាពដែលមានតម្លៃបន្ថែមខ្ពស់ ដោយឈរលើជំនាញ និងចំណេះដឹង ជំរុញកំណើនផលិតភាពការងារ ព្រមទាំងផ្តល់ភាពទាក់ទាញនូវវិនិយោគមកកម្ពុជា។ សម្តេចបន្តថា ភាពមានជំនាញគ្រប់គ្រាន់ និង​ផ្តល់លទ្ធភាពកាន់តែខ្ពស់ដល់ប្រជាពលរដ្ឋគ្រប់រូប អាចចូលរួមចាប់យកឱកាស និងទទួលយកផលប្រយោជន៍ពីកំណើនសេដ្ឋកិច្ចបានគ្រប់រូប សំដៅឆ្លើយតបទៅតាមសេចក្តីប្រាថ្នារបស់ខ្លួនដែលមានប្រាក់ចំណូល និង​កម្រិតជីវភាពកាន់តែខ្ពស់ និង​ការរស់នៅប្រកបដោយសេចក្តីថ្លៃថ្នូរ។

ក្នុងនោះសម្តេចក៏បានបញ្ជាក់ដែរថា ការផ្តល់ការបណ្តុះបណ្តាលជំនាញវិជ្ជាជីវៈ និងបច្ចេកទេស​ជូនដល់យុវជនមកពីគ្រួសារក្រីក្រ និង​គ្រួសារងាយរង​ហានិភ័យ​ទូទាំងប្រទេស គឺមានតួនាទីចម្បង៣ ទី១ គឺការផ្តល់ការបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយ​រងហា​និភ័យ ទី២ ជួយកាត់បន្ថយគម្លាតជំនាញ និង​លើក​កម្ពស់ផលិតភាពនៅក្នុងសកម្មភាពផលិតកម្ម និង​អាជីវកម្ម ខណៈ​ដែលកម្ពុជាកំពុងខិតខំប្រែក្លាយពីឧស្សាហកម្មអតិពលកម្ម ទៅជាឧស្សាហកម្មដែលពឹងផ្អែកលើជំនាញ និងទី៣ ជំរុញកំណើនសេដ្ឋកិច្ចខ្ពស់ តាមរយៈ​ការផ្តល់នូវកម្លាំងពលកម្មជំនាញ ដើម្បីគាំទ្រការអភិវឌ្ឍឧស្សាហកម្មដែលមានតម្លៃបន្ថែមខ្ពស់ជាងមុន។

សម្តេចធិបតី ហ៊ុន ម៉ាណែត នាយករដ្ឋមន្រ្តី ក៏​បានអំពាវនាវ​ដល់មាតាបិតា អាណាព្យាបាល ពិសេសយុវជននៅក្នុងគ្រួសារក្រីក្រ គ្រួសារងាយរងហានិភ័យជួយជំរុញលើកទឹកចិត្ត ឱ្យ​មក​ចុះឈ្មោះចូលរៀន និងរៀនឱ្យបានទៀងទាត់ ដើម្បីទទួលបានជំនាញមួយពិតប្រាកដដែលអាចទទួលបានការងារ និង​មុខរបរសមរម្យ និង​មានស្ថិរភាពចំណូល។

ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា ការបណ្តុះបណ្តាលជំនាញបច្ចេកទេស និងវិជ្ជាជីវៈ ជាមធ្យោបាយ​ជួយឱ្យយុវជនអាចចាប់យកឱកាសការងារបានឆាប់រហ័ស និងជំរុញការចូលរួមចំណែករបស់យុវជនបានកាន់តែទូលំទូលាយក្នុងការអភិវឌ្ឍសង្គម និងសេដ្ឋកិច្ចជាតិ ព្រមទាំងជាស្ពានផ្តល់ឱកាស“ការសិក្សាពេញមួយជីវិត” ដល់បងប្អូនកម្មករនិយោជិត តាមរយៈកម្មវិធីផ្លាស់ប្តូរជំនាញ បង្កើនជំនាញ និងបង្កើនផលិតភាពពេញមួយជីវិតទោះបីជាកំពុងមានការងារធ្វើក៏ដោយ។

ជាមួយគ្នានេះ ឯកឧត្តម ហេង សួរ ក៏​បានបញ្ជាក់ដែរថា កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ដល់ក្រុមគោលដៅយុវជនមកពីគ្រួសារក្រីក្រ និងគ្រួសារងាយរងហានិភ័យនៅទូទាំងប្រទេស ចំនួន ១,៥លាននាក់ គឺមិនបង់ថ្លៃសិក្សា និងទទួលបាននូវប្រាក់ឧបត្ថម្ភប្រចាំខែ គឺប្រៀបដូចជាការបង្រៀនដល់យុវជនជាក្រុមគោលដៅឱ្យចេះស្ទូចត្រី បន្ថែមពីលើកម្មវិធីបើកផ្តល់សាច់ប្រាក់ដល់ក្រុមគ្រួសារក្រីក្រជាង៧០ម៉ឺនគ្រួសារ ដែលរាជរដ្ឋាភិបាលកំពុងអនុវត្ត ឬនិយាយមួយបែបថាកំពុងផ្តល់ត្រីជូនយុវជនជាក្រុមគោលដៅ និងក្រុមគ្រួសារពួកគាត់៕