កុមាររៀននៅមត្តេយ្យសិក្សាមានរយៈពេល១ឆ្នាំដល់៣ឆ្នាំ ហើយរយៈពេលដ៏សំខាន់នេះ ផ្ដល់ឱ្យគ្រូបង្រៀនផ្នែកថែទាំ និងអប់រំកុមារតូចនូវឱកាស ដើម្បីធ្វើឱ្យលទ្ធផលសិក្សា និងការអភិវឌ្ឍរបស់កុមារតូចមានភាពល្អប្រសើរឡើង និងរៀបចំពួកគេជាស្រេចសម្រាប់ការអប់រំនៅបឋមសិក្សា។ ទន្ទឹមគ្នានេះ គ្រូបង្រៀនផ្នែកថែទាំ និងអប់រំកុមារតូច ចាំបាច់ត្រូវមានសមត្ថភាព និងលក្ខខណៈសម្បត្តិល្អ ដែលត្រូវអភិវឌ្ឍចំណេះដឹង និងជំនាញជាប្រចាំ។

បើតាមឯកសារពង្រឹងគុណភាពសិក្សាដំបូង ភាគ១ ស្ដីពី ក្រមខ័ណ្ឌសមត្ថភាពគ្រូបង្រៀនផ្នែកថែទាំ និងអប់រំកុមារតូច (ECCE) សម្រាប់ប្រទេសតំបន់អាស៊ីអាគ្នេយ៍ បានបង្ហាញពីលក្ខណៈសម្បត្តិមួយចំនួនរបស់គ្រូថែទាំ និងអប់រំកុមារតូច ត្រូវអនុវត្តរួមមាន៖

១. ចំណេះដឹងជំនាញ ការប្រតិបត្តិគរុកោសល្យ និងការវាយតម្លៃ ៖ គ្រូថែទាំ និងអប់រំកុមារតូច ត្រូវមានការយល់ដឹងអំពីការរៀនសូត្រ និងការអភិវឌ្ឍគ្រប់ផ្នែក ជួយសម្រួលដល់ការរៀនសូត្រ និងអភិវឌ្ឍរបស់កុមារ ដែលមានសមត្ថភាពពាក់ព័ន្ធនឹងវិធីសាស្រ្តបង្រៀនដែលរួមបញ្ចូលការប្រើប្រាស់ឧបករណ៍វាយតម្លៃ វិធីសាស្រ្ត និងលទ្ធផលដើម្បីជួយគាំទ្រការរៀនសូត្រ និងការអភិវឌ្ឍរបស់កុមារ។ ទន្ទឹមនោះ សមត្ថភាពគាំទ្រ និងជំរុញ រួមមាន យល់ដឹងអំពីសិទ្ធិកុមារ ផ្ដោតការយកចិត្តទុកដាក់ចំពោះសិស្សលើសកម្មភាពរៀន និងបង្រៀន ផ្សារភ្ជាប់ខ្លួនឯងនូវចំណេះដឹងលើការរៀន និងការអភិវឌ្ឍកុមារគ្រប់ផ្នែក រួមបញ្ចូលទ្រឹស្ដីនៃការអភិវឌ្ឍកុមារតូច និងចំណេះដឹងពាក់ព័ន្ធច្បាប់ គោលនយោបាយ និងបទដ្ឋាននៃការថែទាំ និងអប់រំកុមារតូច ។ល។ លើសពីនេះ ចេះប្រើប្រាស់សកម្មភាពផ្នែកលើការលេងជាមូលដ្ឋាន និងវិធីសាស្រ្តបង្រៀនដែលជំរុញឱ្យមានការគិតស៊ីជម្រៅ និងច្នៃប្រឌិត ការធ្វើសេចក្ដីសម្រេចចិត្ត ការដោះស្រាយបញ្ហា និងជួយឱ្យកុមារក្លាយជាអ្នកសិក្សាសកម្ម។

២. បរិយាកាសរៀនសូត្រ ៖ គ្រូបង្រៀនផ្នែកថែទាំ និងអប់រំកុមារតូច ចាំបាច់ត្រូវផ្ដល់ និងបង្កើតបរិយាកាសរៀនសូត្រ និងការអភិវឌ្ឍប្រកបដោយភាពអំណោយផល ដែលគិតគូរលើផ្នែកសង្គមនិងអារម្មណ៍ និងតម្រូវការលូតលាស់ផ្នែករាងកាយរបស់កុមារ ហើយដែលអនុញ្ញាតឱ្យកុមារមានអារម្មណ៍ថា ទទួលបានការចិញ្ចឹមបីបាច់សុវត្ថិភាព និងការការពារ។ លើសពីនេះទៀត ធានានូវបរិយាបន្នសម្រាប់អ្នកសិក្សាទាំងអស់ គ្រូអាចផ្ដល់នូវបរិកាសរៀនសូត្រ និងអាចបង្ហាញពីការប្រតិបត្តិប្រកបដោយបរិយាបន្ននានា ដែលជួយជំរុញដល់ការដាក់បញ្ចូលកុមារទាំងអស់ ជាពិសេសកុមារដែលមានតម្រូវការពិសេសក្នុងសកម្មភាពរៀនសូត្រ និងអភិវឌ្ឍន៍។

៣. ការចូលរួម និងកិច្ចសហការ ៖ គ្រូបង្រៀនផ្នែកថែទាំ និងអប់រំកុមារតូចដែលមានសមត្ថភាពអាចចូលរួមជាមួយតួអង្គពាក់ព័ន្ធក្នុងការអភិវឌ្ឍកុមារដោយហេតុផលផ្សេងៗគ្នា។ ឧទាហរណ៍ ការអាចរក្សាទំនាក់ទំនងជាប្រចាំជាមួយសមាជិកគ្រួសារ អាណាព្យាបាលឬអ្នកថែទាំកុមារស្របច្បាប់ ដើម្បីផ្ដល់ព័ត៌មានត្រឡប់លើបញ្ហានានាទាក់ទងនឹងការអភិវឌ្ឍរបស់កុមារក៏ដូចជាពង្រីកបទពិសោធន៍រៀនសូត្រនៅផ្ទះរបស់ពួកគេ។ លើសពីនេះទៅទៀត គ្រូបង្រៀនផ្នែកថែទាំ និងអប់រំកុមារតូចអាចសហការជាមួយមិត្តរួមការងារ រួមមានគ្រូបង្រៀននៅកម្រិតមត្តេយ្យសិក្សា និងបឋមសិក្សាផ្សេងទៀត ដើម្បីចែករំលែកចំណេះដឹងពាក់ព័ន្ធការអភិវឌ្ឍរបស់កុមារ ព្រមទាំងធានានូវលទ្ធផលនៃការសិក្សាជាប់ជាប្រចាំនៅពេលដែលពួកគេផ្លាស់ទៅសាលារៀននៅបឋមសិក្សា។

៤. ការអភិវឌ្ឍវិជ្ជាជីវៈ ៖ គ្រូបង្រៀនផ្នែកថែទាំ និងអប់រំកុមារតូច ដែលមានសមត្ថភាពអាចបង្ហាញអំពីការប្តេជ្ញាចិត្តក្នុងការអភិវឌ្ឍខ្លួនឯងនិងការអនុវត្តវិជ្ជាជីវៈជាប់ជានិច្ច ក្នុងនាមជាអ្នកធ្វើកិច្ចការផ្នែកថែទាំ និងអប់រំកុមារតូច។ ចំណុចនេះសំដៅដល់ការចូលរួមវគ្គបណ្តុះបណ្តាលវិក្រឹត្យការ ឬការបង្កើនកម្រិតវិញ្ញាបនបត្រនៃការសិក្សាផងដែរ។ គន្លឹះនៃសកម្មភាពអភិវឌ្ឍន៍វិជ្ជាជីវៈរបស់គ្រូបង្រៀនផ្នែកថែទាំ និងអប់រំកុមារតូចអាស្រ័យលើការរប្ដេជ្ញាចិត្តក្នុងការធ្វើខ្លួនឯងឱ្យសកម្ម បន្តរៀនសូត្រជាប់ជាប្រចាំពេញមួយជីវិត និងអភិវឌ្ឍជំនាញផ្ទាល់ខ្លួនឱ្យកាន់តែប្រសើរឡើង៕