ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការអប់រំប្រកបដោយបរិយាបន្ន សម្រាប់មនុស្សមានពិការភាព ផ្តល់នូវឱកាសស្មើភាពគ្នា និងទទួលស្គាល់នូវសារៈសំខាន់នៃការចូលរួមចំណែករបស់ពួកគេ ទៅក្នុងការអភិវឌ្ឍប្រកបដោយចីរភាពរបស់ប្រទេស។ បច្ចុប្បន្ននៅកម្ពុជា ការអនុវត្តកម្មវិធីអប់រំពិសេស គឺមាននៅវិទ្យាល័យអប់រំពិសេសចំនួន៦សាលា ក្នុងនោះកម្រិតមត្តេយ្យសិក្សាមាន ២០៩នាក់ ស្រី៤៧នាក់ នៅខេត្តកណ្តាល កំពង់ចាម សៀមរាប បាត់ដំបង និងរាជធានីភ្នំពេញ។
ក្នុងបាឋកថាពិសេសស្តីពី «តួនាទីនៃការអប់រំកុមារតូចក្នុងការលើកកម្ពស់គុណភាពអប់រំនៅកម្ពុជា» លោកជំទាវ គឹម សេដ្ឋានី រដ្ឋលេខាធិការប្រចាំការក្រសួងអប់រំ យុវជន និងកីឡា បានបង្ហាញថា កុមារមានពិការភាពនៅសាលាមត្តេយ្យសិក្សាសាធាណៈទូទាំងប្រទេសបច្ចុប្បន្ននេះមានចំនួន ៧២០នាក់ ស្រី ២៨៦នាក់ ក្នុងនោះទទួលបានការគាំទ្រសេវាការអប់រំបរិយាបន្ន ៤៤,៥៨ភាគរយ។ កុមារមានពិការភាពនៅមត្តេយ្យសិក្សាសហគមន៍ចំនួន ២៤០នាក់ ស្រី ១០៦នាក់ ក្នុងនោះទទួលបានការគាំទ្រសេវាការអប់រំបរិយាបន្ន ៥៨ភាគរយ ក្នុងសាលាគោលដៅនៅខេត្តសៀមរាប កំពង់ធំ រតនគិរី ក្រចេះ បាត់ដំបង បន្ទាយមានជ័យ កំពង់ឆ្នាំង ព្រៃវែង ព្រះសីហនុ ឧត្តរមានជ័យ និងរាជធានីភ្នំពេញ។
បើតាមផែនការយុទ្ធសាស្ត្រវិស័យអប់រំ ២០២៤-២០២៨ ដើម្បីធានាបាននូវការផ្ដល់សេវាអប់រំពិសេសប្រកបដោយគុណភាព ក្រសួងអប់រំបានដាក់ចេញនូវផែនការចំនួន ៤ចំណុច រួមមាន៖
ទី១. ពង្រឹងវិទ្យាស្ថានជាតិអប់រំពិសេស និងនាយកដ្ឋានអប់រំពិសេស ៖ ការរៀបចំគោលនយោបាយស្តីពីការអប់រំកុមារមានពិការភាព គោលនយោបាយស្តីពីការអប់រំបរិយាបន្ន ឯកសារជំនួយស្មារតីសម្រាប់គ្រូបង្រៀនវិទ្យាល័យអប់រំពិសេសឯកសារជំនួយសម្រាប់ការកំណត់អត្តសញ្ញាណកុមារមានពិការភាពក្រោមអាយុ ៥ឆ្នាំ និងសម្របសម្រួលកិច្ចសហការជាមួយដៃគូអភិវឌ្ឍ និងអ្នកពាក់ព័ន្ធគ្រប់លំដាប់ថ្នាក់។
ទី២. ការបន្តវិនិយោគលើវិទ្យាល័យអប់រំពិសេស ៖ ដើម្បីអនុវត្តកម្មវិធីអប់រំដល់កុមារមានពិការភាពនៅទូទាំងប្រទេស រួមទាំងកុមារខ្សោយសតិបញ្ញា និងអូទីហ្សឹម និងការអនុវត្តកម្មវិធីសមាហរណកម្ម ដោយកុមារត្រូវរៀននៅគ្រឹះស្ថានសិក្សាសាធារណៈពាក់កណ្ដាលថ្ងៃ និងនៅសាលារៀនអប់រំពិសេសពាក់កណ្ដាលថ្ងៃទៀត។
ទី៣. ការផ្តល់ប្រាក់ឧបត្ថម្ភពិសេស ៖ ការផ្តល់ប្រាក់ឧបត្ថម្ភពិសេសចំនួន ៨សែនរៀល លើបៀវត្សគ្រូបង្រៀន ដែលកើនឡើងជាលំដាប់ ដើម្បីថែរក្សាអ្នកឯកទេសខាងផ្នែកអប់រំពិសេស។
ទី៤. ការបន្តកិច្ចសហប្រតិបត្តិការអន្តរជាតិ ៖ សហការជាមួយអង្គការគ្រួសារថ្មី ក្នុងការធ្វើសវនកម្មគុណភាពប្រចាំឆ្នាំ និងសហការជាមួយដៃគូអន្ដរជាតិ ក្នុងការពិនិត្យត្រចៀក និងគាំទ្របច្ចេកទេស។
យោងតាមរបាយការណ៍របស់អង្គការសុខភាពពិភពលោក (WHO) នៅទូទាំងសកលលោក ក្នុងចំណោមកុមារ ១០នាក់មានកុមារម្នាក់ មានពិការភាព ដែលសរុបមានចំនួន ២៤០លាននាក់ ក្នុងនោះជិតពាក់កណ្តាលរស់នៅតំបន់អាស៊ីអាគ្នេយ៍។ នៅកម្ពុជាក៏ដូចជាប្រទេសជាច្រើនក្នុងសកលលោកដែរ គឺកុមារមានពិការភាព មានលទ្ធភាពបានចូលរៀនតិចជាងកុមារគ្មានពិការភាព និងមានគម្លាតខុសគ្នានៃការចូលរៀន និងការបញ្ចប់ការសិក្សា រវាងកុមារមានពិការភាព និងកុមារគ្មានពិការភាព។ យោងតាមជំរឿនទូទៅប្រជាជននៅកម្ពុជាឆ្នាំ២០១៩ ពលរដ្ឋដែលមានអាយុចាប់ពី៥ឆ្នាំឡើងចំនួន ៦៨៩.៥៣២នាក់ ត្រូវគេរកឃើញថាមានពិការភាព ដែលនៅក្នុងនោះប្រហែល ៣៧៥០០ នាក់ជាកុមារអាយុចាប់ពី៥ ដល់ ១៤ឆ្នាំ។
គួរជំរាបជូនថា ផែនការសកម្មភាពស្តីពីការអប់រំបរិយាបន្ន២០២៤-២០២៨ ជាសមិទ្ធផលថ្មីដ៏មានសារៈសំខាន់មួយទៀតនៅក្នុងវិស័យអប់រំកម្ពុជា។ សមិទ្ធផលនេះ បានបង្ហាញពីការប្ដេជ្ញាចិត្តខ្ពស់របស់ក្រសួងអប់រំ យុវជន និងកីឡា ក្នុងការធានាឱ្យមានការផ្ដល់សេវាអប់រំប្រកបដោយគុណភាព បរិយាបន្ន និងសមធម៌សម្រាប់ទាំងអស់គ្នា ស្របតាមគោលដៅអភិវឌ្ឍន៍ដោយចីរភាពទី៤៕
