គ្រឹះស្ថានមធ្យមសិក្សាចំនួន១៤ ក្នុងនោះ​មាននៅខេត្តសៀមរាបចំនួន០៤ ខេត្តស្ទឹងត្រែងចំនួន០៥ និងខេត្តរតនគិរីចំនួន០៥ កំពុងអនុវត្តគម្រោងគាំទ្រការអប់រំពេញមួយជីវិត និងការងារសមរម្យ តាមរយៈកម្មវិធីមគ្គុទ្ទេសក៍ អាជីព និងការផ្ដល់ប្រឹក្សាកម្រិតមធ្យមសិក្សា ក្រោមកិច្ចសហការរបស់ក្រសួងអប់រំនិងអង្គការភ្លែនអន្តរជាតិកម្ពុជា។ ក្នុងនោះ គម្រោងសាកល្បងចាប់ផ្តើមអនុវត្តពីថ្ងៃទី​០១ កញ្ញា ២០២៣ ដល់ថ្ងៃទី ៣០​មិថុនា​ ឆ្នាំ២០២៤ និងមានសក្កានុពលក្នុងការពង្រីកចំនួនសាលា​និងពេលវាលារហូតដល់ខែមិថុនា ឆ្នាំ២០២៦។

លោក យី គឹមថាន នាយករងប្រចាំប្រទេសទទួលបន្ទុកផ្នែកកម្មវិធី នៃអង្គការភ្លែនអន្តរជាតិកម្ពុជា មានប្រសាសន៍ថា សិស្សានុសិស្សនៅតាមអនុវិទ្យាល័យមិនទាន់មានផែនការជីវិតច្បាស់លាស់នៅឡើយ ដោយ​ពួកគេមិនដឹងថាខ្លួនចង់រៀនអ្វី? មិនដឹងថាគួររៀនជំនាញអ្វីដើម្បីជោគជ័យក្នុងជីវិត។ ដូច្នេះការអនុវត្តគម្រោងគាំទ្រការអប់រំពេញមួយ​ជីវិត និង​ការងារសមរម្យ គឺស្របតាមផែនការយុទ្ធសាស្ត្រវិស័យអប់រំឆ្នាំ២០១៩-២០២៣ ក្នុងការពង្រឹងគុណភាពនៃការអប់រំបំណិន ជំនាញរឹង និងជំនាញទន់ ដើម្បីជួយសិស្សានុសិស្សក្រោយបញ្ចប់មធ្យមសិក្សាមានផែនការជីវិតច្បាស់លាស់ ចេះជ្រើសរើសផ្លូវសិក្សា អាជីព មុខរបរ នាពេលអនាគតបានល្អប្រសើរ ជាពិសេសគាំទ្រដល់ការសិក្សាពេញមួយជីវិត។

បើតាមលោក យី គឹមថាន គម្រោងនេះមានគោលបំណងផ្ដោតសំខាន់លើការពង្រឹងគុណសម្បទាផ្ទាល់ខ្លួនរបស់យុវជនម្នាក់ៗ រួមមាន  ការជំរុញវឌ្ឍនភាពលើលទ្ធផលសិក្សា (អភិវឌ្ឍការអប់រំ) ការពង្រឹងប្រសិទ្ធភាពជ្រើសរើសផ្លូវសិក្សាឈានឆ្ពោះទៅចាប់យកការងារ-អាជីពជាក់លាក់ (អភិវឌ្ឍអាជីព) និងការគាំទ្រឥរិយាបថវិជ្ជមាន ដឹកនាំជីវិតក្នុងសង្គមស៊ីវីល័យ (អភិវឌ្ឍបុគ្គលិកលក្ខណៈ/ទំនាក់ទំនងសង្គម) របស់យុវជនក្នុងដំណាក់កាលពួកគេស្ថិតក្នុងសាលារៀន។ តាមរយៈការដឹកនាំ និងអនុវត្តសកម្មភាពមគ្គុទ្ទេសក៍អាជីព និងការផ្ដល់ប្រឹក្សារបស់គ្រូប្រឹក្សាតាមសាលារៀន និងភាគីពាក់ព័ន្ធ លទ្ធផលសិក្សារបស់សិស្ស បញ្ហាសុខុមាលភាពសង្គម ការឆ្លងភូមិសិក្សាប្រកបដោយសុវត្ថិភាព ការទប់ស្កាត់អត្រាសិស្សបោះបង់នៅតាមសាលារៀន ការអប់រំបរិយាបន្ន បញ្ហាយេនឌ័រ និងការអប់រំពេញមួយជីវិត នឹងត្រូវបានជ្រោមជ្រែងលើកកម្ពស់ សំដៅសម្រេចឱ្យបាននូវស្ដង់ដារសាលារៀនមានប្រសិទ្ធភាព។

“ខ្ញុំរំពឹងថានឹងមានការយល់ដឹងកាន់តែច្រើនរបស់សិស្សានុសិស្ស ជំរុញឱ្យពួកគាត់មានទេពកោសល្យ មានគោលបំណងក្នុងជីវិត ដឹងអំពីការអប់រំលើជំនាញបណ្ដុះបណ្ដាលបច្ចេកទេស និងវិជ្ជាជីវិៈ (TVET) ក្នុងប្រទេសកម្ពុជា និងជំនាញនៅតាមសាកលវិទ្យាល័យ ដើម្បីសម្រេចបំណងសម្រាប់ការជ្រើសរើសអាជីពរបស់ខ្លួននៅថ្ងៃអនាគត”

លោក យី គឹមថាន នាយករដ្ឋប្រចាំប្រទេស នៃអង្គការភ្លែនអន្តរជាតិកម្ពុជា

លោក យី គឹមថាន បន្ថែមថា គម្រោងអនុវត្តក្នុងខេត្តខេត្តសៀមរាប រួមមាន វិទ្យាល័យតេជោហ៊ុនសែនអង្គរធំ, វិទ្យាល័យបន្ទាយស្រី, វិទ្យាល័យអង្គរជុំ និងវិទ្យាល័យ២៨មករា ដែលមានសិស្សសរុប ៥,៧២២ នាក់ ស្រី ៣,២៥៨ នាក់ និងគ្រូបង្រៀនសរុប ១៧៧ នាក់ ស្រី ៦៦ នាក់។ ខេត្តស្ទឹងត្រែង រួមមាន វិទ្យាល័យព្រះគោ, វិទ្យាល័យសេសានសុវត្ថិភាព, វិទ្យាល័យហ៊ុនសែនកោះស្រឡាយ, វិទ្យាល័យអូរស្វាយ និងវិទ្យាល័យសៀមប៉ាង ដែលមានសិស្សសរុប ៥,៧២២ នាក់ ស្រី ៣,២៥៨ នាក់ និងគ្រូបង្រៀនសរុប ១៧៧ នាក់ ស្រី ៦៦ នាក់។ និងខេត្តរតនគិរី រួមមាន វិទ្យាល័យប៊ូថងអូរជុំ, វិទ្យាល័យបរកែវ, វិទ្យាល័យវីរៈជ័យ, វិទ្យាល័យតាវែង និងវិទ្យាល័យអណ្ដូងមាស។ គម្រោងរំពឹងថា នឹងផ្ដល់ផលជះជាវិជ្ជមានទៅដល់ក្រុមគោលដៅទទួលផល គ្រឹះស្ថានមធ្យមសិក្សាចំនួន ១៤ ដែលមានសិស្សសរុប ១០,២០០ នាក់ ស្រី ៥,៥២៤ នាក់ និងគ្រូបង្រៀនសរុប ៣៣៩ នាក់ ស្រី ១២០នាក់។

នាយករងប្រចាំប្រទេសទទួលបន្ទុកផ្នែកកម្មវិធី នៃអង្គការភ្លែនអន្តរជាតិកម្ពុជា បន្តថា ដើម្បីសម្រេចបាននូវគោលបំណងទាំងនេះសកម្មភាពពាក់ព័ន្ធរួមមាន ការរៀបចំវេទិកាតម្រង់ទិសអំពីអាជីព មុខរបរ និងការសិក្សាជំនាញ ការរៀបចំពិព័រណ៍តម្រង់ទិសវិជ្ជាជីវៈ កម្មវិធីអប់រំបំណិនជីវិតតាមមូលដ្ឋាន និងកម្មវិធីអប់រំសហគ្រិនភាពជាដើម។ គម្រោងនឹងរៀបចំសិក្ខាសាលាតម្រង់ទិសដល់មន្ត្រីអប់រំស្រុក ខេត្ត និងនាយកសាលារៀនគោលដៅ ស្ដីពីការអនុវត្តកម្មវិធីមគ្គុទ្ទេសក៍អាជីពនិងការផ្ដល់ប្រឹក្សា និងតួនាទីភារកិច្ចអ្នកពាក់ព័ន្ធ បណ្ដុះបណ្ដាលស្ដីពីមគ្គុទ្ទេសក៍អាជីពនិងការផ្ដល់ប្រឹក្សា កម្រិតមធ្យមសិក្សា ដល់គ្រូប្រឹក្សាតាមសាលារៀន បង្កើតភាពជាដៃគូរវាងសាលារៀន និងសហគមន៍មូលដ្ឋាន តាមរយៈការរៀបចំព្រឹត្តិការណ៍ពិព័រណ៍ចែករំលែកបទពិសោធន៍ និងរៀបចំហេដ្ឋារចនាសម្ព័ន្ធផ្ដល់សេវាមគ្គុទ្ទេសក៍អាជីព និងការផ្ដល់ប្រឹក្សា។

គួរជម្រាបជូនថា គិតត្រឹមឆ្នាំសិក្សា២០២១-២០២២ កម្ពុជាមានគ្រឹះស្ថានមធ្យមសិក្សាសាធារណៈសរុបចំនួន ១,៨១២ ក្នុងនោះ អនុវិទ្យាល័យមានចំនួន ១,២៥៣ និងវិទ្យាល័យមានចំនួន ៥៥៩ ។ រហូតមកដល់ពេលនេះមានគ្រឹះស្ថានមធ្យមសិក្សាសាធារណៈចំនួន ១១៥ ទូទាំងប្រទេស បាននឹងកំពុងអនុវត្តកម្មវិធីមគ្គុទ្ទេសក៍អាជីពនិងការផ្ដល់ប្រឹក្សា ដែលមានគ្រូប្រឹក្សាតាមសាលារៀនចំនួន ៣០៣ នាក់ ស្រី ១៣៧ នាក់ ជាប្រតិបត្តិករអនុវត្តផ្ទាល់កម្រិតសាលារៀន៕