ពិភពលោក កំពុងស្ថិតនៅចំណុចមួយដ៏សំខាន់ ដែលសង្គម និងឧស្សាហកម្មកំពុងផ្លាស់ប្ដូរយ៉ាងឆាប់រហ័ស ។ ការផ្លាស់ប្ដូរប្រព័ន្ធថាមពលរបស់យើងឱ្យកាន់តែស្អាត ខណៈពេលដែលបំពេញតម្រូវការថាមពលសម្រាប់មនុស្សគ្រប់គ្នា ដោយធានាឱ្យបាននូវអនាគតប្រកបដោយស្ថិរភាព និងសុវត្ថិភាព តម្រូវឱ្យមានការផ្លាស់ប្ដូរទ្រង់ទ្រាយធំនៅក្នុងវិស័យឧស្សាហកម្ម និងសង្គម។

រដ្ឋាភិបាល អ្នកដឹកនាំធុរកិច្ច និងអង្គការសង្គមស៊ីវិលទាំងអស់ កំពុងជួបបញ្ហា លើការផ្លាស់ប្ដូរប្រព័ន្ធនេះ។ ទោះជាយ៉ាងណាក៏ដោយ បុគ្គលសំខាន់ និងងាយរងផលប៉ះពាល់ នៃការផ្លាស់ប្ដូរទាំងនេះ ត្រូវតែយល់ពីការផ្លាស់ប្ដូរ និងរបៀបដែលប្រព័ន្ធថាមពលមានឥទ្ធិពលទៅលើជីវិតរស់នៅរបស់គេ។

ហេតុអ្វីបានជាចំណេះដឹងអំពីថាមពល (Energy Literacy) មានសារៈសំខាន់?

ចំណេះដឹងអំពីថាមពល គឺជាគន្លឹះក្នុងការពង្រីកការយល់ដឹងអំពីភាពស្មុគស្មាញនៅពីក្រោយប្រព័ន្ធថាមពល ។ ចាប់ពីទម្លាប់នៃការប្រើប្រាស់របស់បុគ្គល រហូតដល់ការទទួលយកហេដ្ឋារចនាសម្ព័ន្ធថាមពលថ្មី ដើម្បីការបង្កើតការងារ ប្រព័ន្ធថាមពលមានឥទ្ធិពលស្ទើរតែគ្រប់ផ្នែកនៃសកម្មភាពប្រចាំថ្ងៃរបស់មនុស្ស។ ដូច្នេះ វាមានសារៈសំខាន់ណាស់ ក្នុងការបង្កើនការយល់ដឹងជាសាធារណៈអំពីលក្ខណៈចម្រុះនៃប្រព័ន្ធថាមពល ដើម្បីកសាងប្រព័ន្ធថាមពលនាពេលអនាគតសម្រាប់ទាំងអស់គ្នា។

ការវិនិយោគលើការផ្លាស់ប្ដូរថាមពល នឹងនាំមកនូវការទទួលបានផលសេដ្ឋកិច្ចសង្គម ដែលមានលក្ខណៈយូរអង្វែង។ បុគ្គលម្នាក់ៗ គឺជាគន្លឹះក្នុងការសម្រេចបាននូវការផ្លាស់ប្ដូរយ៉ាងឆាប់រហ័ស ប្រកបដោយសមភាព និងការរួមបញ្ចូល។

ខណៈពេលដែលសមធម៌ថាមពល និងការរួមបញ្ចូលមានសារៈសំខាន់ក្នុងការកសាងប្រព័ន្ធថាមពលដ៏រឹងមាំ ធន់ និងទាន់ពេលវេលាសម្រាប់គោលដៅឆ្នាំ២០៣០។ ភាគីពាក់ព័ន្ធនៅកម្រិតផ្សេងៗគ្នា រួមមានបុគ្គល សហគមន៍ អាជីវកម្ម និងរដ្ឋាភិបាល ត្រូវតែចូលរួមជាធ្លុងមួយ ខណៈដែលការផ្លាស់ប្ដូរថាមពលនឹងចាប់ផ្ដើមនៅកម្រិតផ្សេងៗគ្នា។

តើគេអាចធ្វើមាត្រដ្ឋាន បានដោយរបៀបណា?

ការរួមបញ្ចូលដោយសមធម៌ និងបរិយាបន្ន យ៉ាងរឹងមាំទៅក្នុងអាជីវកម្ម និងសេដ្ឋកិច្ច មានសារៈសំខាន់ក្នុងការជំរុញឱកាសអាជីវកម្ម។ ទោះជាយ៉ាងណាក៏ដោយ​ ការអភិវឌ្ឍសេដ្ឋកិច្ច និងការគាំទ្រសាធារណៈកាន់តែទូលំទូលាយ សម្រាប់ការផ្លាស់ប្ដូរថាមពលត្រូវតែកើតឡើងស្របគ្នា សម្រាប់វឌ្ឍនភាពឆាប់រហ័ស ដែលទាមទារឱ្យមានសកម្មភាពគ្រប់ផ្នែកទាំងអស់នៃប្រព័ន្ធថាមពល ដើម្បីកំណត់ល្បឿន សម្រាប់ការឈានដល់ចំណុចសំខាន់ក្នុងឆ្នាំ២០៣០ និង២០៥០។

ការផ្លាស់ប្ដូរឆ្ពោះទៅរកប្រព័ន្ធថាមពលនាពេលអនាគតនឹងក្លាយជាដំណើរការពហុវិមាត្រ ដែលខុសគ្នាតាមទីផ្សារ និងប្រទេស។ មនុស្សគ្រប់គ្នា នឹងជំរុញវា ហើយត្រូវតែចូលរួមសកម្មភាពយ៉ាងសកម្ម ក្នុងនោះ មានអ្នកប្រើប្រាស់ អ្នកជំនាញហិរញ្ញវត្ថុ អ្នកបង្កើតថ្មី អ្នកផលិត និងអ្នកបង្កើតគោលនយោបាយ។

ទន្ទឹមនឹងនេះ WE Forum បានបង្ហាញ វិធីសាស្ត្រមួយចំនួន ដែលត្រូវអនុវត្ត ដើម្បីសម្រេចបាននូវប្រព័ន្ធថាមពលប្រកបដោយសុវត្ថិភាព សមធម៌ និងនិរន្តរភាពនៅឆ្នាំ ២០៥០ ៖

• ការផ្លាស់ប្ដូរតម្រូវការថាមពល និងបង្កើនប្រសិទ្ធភាពទ្វេដង
• អនុញ្ញាតឱ្យមានការដាក់ពង្រាយយ៉ាងឆាប់រហ័ស និងប្រកបដោយទំនួសខុសត្រូវនៃការផ្គត់ផ្គង់ថាមពលស្អាត និងហេដ្ឋារចនាសម្ព័ន្ធដឹកជញ្ជូន
• ការពង្រឹងករណីសេដ្ឋកិច្ច និងអាជីវកម្មសម្រាប់ការផ្លាស់ប្ដូរ
• ជំរុញការផ្លាស់ប្ដូរឧស្សាហកម្ម ដែលដោះសោតម្លៃប្រព័ន្ធ
• ពង្រីក និងដាក់ពង្រាយបច្ចេកវិទ្យា និងការបង្កើតថ្មី។

ការជំរុញការផ្លាស់ប្ដូរថាមពល ប្រកបដោយសមធម៌ គឺជាគន្លឹះក្នុងការពង្រីកមាត្រដ្ឋាន ចំណែកការបង្កើនចំណេះដឹងអំពីថាមពលទូទៅ គឺជាធាតុស្នូលដ៏សំខាន់៕