យោងតាមការស្ទង់មតិថ្មីៗនេះបានឱ្យដឹងថា ចក្រភពអង់គ្លេសនៅតែបន្តជាទិសដៅកំពូលសម្រាប់និស្សិតអន្តរជាតិបន្តការសិក្សា ដោយសារកេរ្តិ៍ឈ្មោះល្អលើការអប់រំមានគុណភាពខ្ពស់ បរិយាកាសផ្ដល់ភាពកក់ក្ដៅ និងឱកាសការងារក្រោយបញ្ចប់ការសិក្សា។

ការស្ទង់មតិដោយ ApplyBoard ដែលបានចេញផ្សាយ ក្នុងខែកញ្ញាបង្ហាញថា ៨២ភាគរយ នៃអ្នកជំនាញ ដែលត្រូវបានជ្រើសរើសឱ្យចូលបម្រើការងារជិត ៤០០នាក់ នៅទូទាំងពិភពលោកយល់ស្របថា ចក្រភពអង់គ្លេស នៅតែជាជម្រើសដ៏គួរឱ្យទាក់ទាញបំផុត សម្រាប់និស្សិត ដែលកំពុងស្វែងរកការអប់រំកម្រិតខ្ពស់នៅបរទេស។

នៅក្នុងត្រីមាសទីមួយ នៃឆ្នាំ២០២៥ ចក្រភពអង់គ្លេស មានភាពទាក់ទាញជាពិសេស ដែលត្រូវបានគាំទ្រ ដោយការស្វាគមន៍នូវវោហាសាស្ត្រ និងស្ថិរភាពគោលនយោបាយទាក់ទងរបស់រដ្ឋាភិបាល។ យោងតាមការស្ទង់មតិ ៥១ភាគរយ នៃអ្នកឆ្លើយតបបានលើកឡើងថា ចក្រភពអង់គ្លេស «មានភាពទាក់ទាញខ្លាំង»។ ខណៈពេលដែល ៣៦ភាគរយ យល់ថា ចក្រភពអង់គ្លេស «មានភាពទាក់ទាញ»។

នៅត្រីមាសទី៣ ចក្រភពអង់គ្លេស នៅតែនាំមុខគេ ដោយ ៤៥ភាគរយ និយាយថា ប្រទេសនេះ មានភាពទាក់ទាញខ្លាំង សម្រាប់បន្តការសិក្សា និង ៣៧ភាគរយ យល់ថាប្រទេសនេះ មានភាពទាក់ទាញ។

ប្រទេសកាណាដា បានវ៉ាដាច់សហរដ្ឋអាមេរិក ជាគោលដៅទី១ ដែលនិស្សិតអន្តរជាតិចង់បន្តការសិក្សាខ្លាំងបំផុត។

លើសពីនេះ ទិន្នន័យពីការិយាល័យ Home Office របស់ចក្រភពអង់គ្លេសបានបង្ហាញពីការកើនឡើង ១៦ភាគរយ ពាក្យសុំទិដ្ឋាការសិស្សនៅក្នុងត្រីមាសទី២ ឆ្នាំ២០២៥ បើធៀបទៅនឹងឆ្នាំមុន ដែលមានពាក្យស្នើសុំជិត ៦៣,០០០ ត្រូវបានស្នើ។

ការស្ទង់មតិរបស់ ApplyBoard ក៏បានបង្ហាញផងដែរថា ៨៦,៩ភាគរយ នៃអ្នកឆ្លើយតបមានអារម្មណ៍ថា ចក្រភពអង់គ្លេស គឺជាគោលដៅបើកចំហ សុវត្ថិភាព និងស្វាគមន៍សម្រាប់និស្សិតអន្តរជាតិ នៅរដូវស្លឹកឈើជ្រុះឆ្នាំ២០២៥។ ខណៈពេលដែលលទ្ធផលនេះ ធា្លក់ចុះបន្តិចពី ៨៨,១ភាគរយ នៅក្នុងត្រីមាសទី១ ហើយនៅតែជាអត្រាខ្ពស់បំផុត បើធៀបទៅនឹងប្រទេសផ្សេងទៀត រួមមាន អូស្ត្រាលី កាណាដា អាល្លឺម៉ង់ អៀរឡង់ និងសហរដ្ឋអាមេរិក។

សហរដ្ឋអាមេរិក ដែលជាដៃគូប្រជែងដ៏សំខាន់តាំងពីដើមមក កំពុងមានការថយចុះចំនួន អ្នកចាប់អារម្មណ៍មកបន្តការសិក្សានៅប្រទេសនេះ។ មានតែពាក់កណ្ដាលនៃអ្នកឆ្លើយតបការស្ទង់មតិប៉ុណ្ណោះ ដែលបានចាត់ទុកថា អាមេរិកជាគោលដៅ ដែលពួកគេទទួលបានការស្វាគមន៍។

ការផ្លាស់ប្ដូរនេះ គឺភាគច្រើនដោយសារតែគោលនយោបាយរឹតត្បិតកាន់តែខ្លាំងឡើង លើនិស្សិតអន្តរជាតិ ជាពិសេសបន្ទាប់ពីការដាក់សម្ពាធលើកទី២ របស់ប្រធានាធិបតី ត្រាំ។ ការផ្លាស់ប្ដូរថ្មីបំផុត ការណែនាំអំពី ថ្លៃសេវា ១ម៉ឺន ដុល្លារអាមេរិក លើញត្តិទិដ្ឋាការ H-1B ថ្មី បានចូលជាធរមាននៅថ្ងៃទី២១ ខែកញ្ញា ដែលធ្វើឱ្យដំណើរការកាន់តែស្មុគស្មាញទៀត សម្រាប់និយោជក កំពុងស្វែរកពលករបរទេស ដែលមានការអប់រំខ្ពស់។

ភាពជោគជ័យរបស់ចក្រភពអង់គ្លេស ក្នុងការទាក់ទាញនិស្សិតអន្តរជាតិ គឺភាគច្រើន ត្រូវបានសន្មតថា ជាឧត្តមភាពសិក្សារបស់ខ្លួន កិត្យានុភាពសកល និងកម្មវិធីចម្រុះ។ យោងតាម QS International Student Survey 2024 ជិតពាក់កណ្ដាល (49ភាគរយ) នៃអនាគតនិស្សិត ចាប់អារម្មណ៍ចង់បន្តការិក្សានៅចក្រភពអង់គ្លេស។ កេរ្តិ៍ឈ្មោះដ៏រឹងមាំរបស់ប្រទេសនេះ ជុំវិញគុណភាពនៃការបង្រៀន និងបរិយាកាសពហុវប្បធម៌ គឺជាកត្តាសំខាន់ ដែលជំរុញឱ្យនិស្សិតជាច្រើនចាប់អារម្មណ៍។

លើសពីនេះ ឱកាសការងារ ក្រោយពីបញ្ចប់ការសិក្សា របស់ចក្រភពអង់គ្លេស នៅតែជាចំណុចទាក់ទាញដ៏សំខាន់។ ទិដ្ឋាការ Graduate Route ដែលអនុញ្ញាតឱ្យនិស្សិតអន្តរជាតិស្នាក់នៅរយៈពេល ២ឆ្នាំ បន្ទាប់ពីបញ្ចប់ការសិក្សា (បច្ចុប្បន្នកំពុងស្ថិតក្រោមការពិចារណា សម្រាប់ការកាត់បន្ថយមកត្រឹម ១៨ ខែ) ផ្ដល់ឱកាសសម្រាប់និស្សិត ដើម្បីទទួលបានបទពិសោធន៍ការងារ។

ទំនាក់ទំនងដ៏យូរអង្វែងរបស់ចក្រភពអង់គ្លេសជាមួយ ឥណ្ឌាក៏បានរួមចំណែក ដល់ការទាក់ទាញកាន់តែខ្លាំងឡើងរបស់អង់គ្លេសផងដែរ ដោយនិស្សិតឥណ្ឌាមានចំនួនយ៉ាងច្រើន នៅក្នុងការចុះឈ្មោះនេះ។ នៅត្រីមាសទី២ នៃឆ្នាំ២០២៥ និស្សិតឥណ្ឌាជាង ១៥,០០០នាក់ បានទទួលទិដ្ឋាការ ដើម្បីបន្តការសិក្សានៅចក្រភពអង់គ្លេស ដែលកើនឡើង ៤៤ភាគរយ ធៀបនឹងឆ្នាំមុន។ ជាលទ្ធផល ឥណ្ឌាបានក្លាយជាប្រភពនៃនិស្សិតអន្តរជាតិដ៏ធំបំផុតនៅក្នុងចក្រភពអង់គ្លេស៕