ស្រ្តីអាយុ៨៧ឆ្នាំម្នាក់ នៅក្នុងប្រទេសកូរ៉េខាងត្បូង គ្រោងនឹងចុះឈ្មោះចូលរៀននៅសាកលវិទ្យាល័យ បន្ទាប់ពីបញ្ចប់ការសិក្សាថ្នាក់វិទ្យាល័យកាលពីសប្ដាហ៍មុន ពោលគឺ ៧ឆ្នាំបន្ទាប់ពីបានចូលរៀនវិញ។

លោកស្រី Kim Gap-nyeo បានបញ្ចប់ការសិក្សាពីវិទ្យាល័យ Ilsung Women’s High School ដែលជាស្ថាប័នអប់រំសម្រាប់មនុស្សចាស់ នៅទីក្រុងសេអ៊ូល នៅថ្ងៃទី២៥ ខែកុម្ភៈ ហើយលោកស្រីនឹងបន្តសិក្សាជំនាញ សុខុមាលភាពសង្គម (Social Welfare) នៅសាកលវិទ្យាល័យ Sookmyung Women’s University ក្នុងខែមីនានេះ។

លោកស្រីបានផ្ដល់កិច្ចសម្ភាសន៍ជាមួយកាសែត Korea Times ថា សម្រាប់ការសិក្សានេះ លោកស្រីមិនមានគោលដៅអ្វីនោះទេ លោកស្រីគ្រាន់តែរីករាយនឹងការសិក្សា និងចង់ជួបជុំជាមួយមនុស្សឱ្យបានច្រើនប៉ុណ្ណោះ។

រឿងរ៉ាវរបស់លោកស្រី ទទួលបានការចាប់អារម្មណ៍យ៉ាងខ្លាំងពីសំណាក់ប្រជាជនកូរ៉េ បន្ទាប់ពីលោកស្រីបានបង្ហាញខ្លួន ក្នុងកម្មវិធីទូរទស្សន៍មួយឈ្មោះថា “You Quiz on the Block” នៅលើប៉ុស្តិ៍ tvN កាលពីខែតុលាឆ្នាំមុន។ ដោយលោកស្រី បានប្រាប់ពិធីករ ដែលសម្ភាសន៍លោកស្រីថា ជីវិតរបស់លោកស្រី ហាក់មើលឃើញពិភពលោកទូលាយជាងមុន បន្ទាប់ពីបានចូលរៀន។

លោកស្រី Kim កើតនៅឆ្នាំ ១៩៣៨ ក្នុងតំបន់ Cheongwon County ខេត្ត Chungcheong ខាងជើង។ ក្នុងវ័យកុមារភាព លោកស្រី បានចូលរៀនថ្នាក់បឋមសិក្សានៅឆ្នាំ១៩៤៥ ប៉ុន្តែត្រូវឈប់ពាក់កណ្ដាលទី ដើម្បីជួយឪពុកម្ដាយធ្វើស្រែចម្ការ និងមើលថែប្អូនប្រុស។

នៅអាយុ ១៧ឆ្នាំ បន្ទាប់ពីឪពុករបស់លោកស្រី បានទទួលមរណភាព ហើយគ្រួសារក៏មានបញ្ហាហិរញ្ញវត្ថុផង លោកស្រី បានផ្លាស់ទៅរស់នៅទីក្រុង Busan ដើម្បីធ្វើបុគ្គលិកបម្រើការក្នុងហាងលក់ស្បែកជើងមួយកន្លែង។ មួយឆ្នាំក្រោយមក លោកស្រីបានផ្លាស់ទៅរស់នៅទីក្រុងសេអ៊ូល ដោយរៀបការនៅទីនោះ និងទទួលបានចំណងដៃកូន ៥នាក់។

លោកស្រីនិយាយថា ក្រោយមានគួ្រសារ លោកស្រីបានប្រឹងប្រែងធ្វើការយ៉ាងខ្លាំងនៅក្នុងផ្សារ រោងចក្រអាហារសម្រន់ និងកន្លែងផលិតគីមឈី ដើម្បីផ្គត់ផ្គង់គ្រួសារ។

នៅឆ្នាំ១៩៨៥ ប្ដីលោកស្រីបានទទួលមរណភាព បន្ទាប់ពីមានជំងឺប្រចាំកាយរយៈពេល ១៥ឆ្នាំ។ ចាប់ពីពេលនោះមក លោកស្រី បានធ្វើការជាអ្នកសម្អាតខ្នងនៅកន្លែងងូតទឹកសាធារណៈអស់រយៈពេល ២៣ឆ្នាំ ដើម្បីចិញ្ចឹមកូនទាំង ៥នាក់ និងផ្គត់ផ្គង់ការសិក្សាពួកគេ។

នៅអាយុ ៨០ឆ្នាំ លោកស្រី Kim បានសម្រេចចិត្តត្រឡប់ទៅរៀនវិញ។ តាមរយៈការណែនាំពីមិត្តភក្ដិម្នាក់ លោកស្រីបានចុះឈ្មោះចូលរៀននៅបឋមសិក្សា Yangwon ដែលជាស្ថាប័នអប់រំ សម្រាប់មនុស្សចាស់។  

ដំបូងឡើយ គាត់គ្រាន់តែចូលរៀន ដើម្បីចេះអាន និងសរសេរប៉ុណ្ណោះ ប៉ុន្តែបន្ទាប់ពីបានចូលរៀន លោកស្រីកាន់តែស្រឡាញ់ការសិក្សា និងចង់រៀនសូត្រ ឱ្យបានជ្រៅជ្រះបន្ថែមទៀត។

គ្រូបង្រៀនតាមផ្ទះរបស់លោកស្រី នៅកម្រិតវិទ្យាល័យ Ilsung Girls ‘Kang Rae-kyung ​បានរៀបរាប់អំពី លោកស្រី Kim ថា ជាសិស្សគម្រូ ប្រឹងប្រែងសិក្សា កម្រអវត្តមាន ឬមិនអើពើនឹងកិច្ចការសាលាណាស់, នេះបើយោងតាម កាសែត Korea Time។

លោកស្រីគីម ថែមទាំងទទួលបានពានរង្វាន់ “Perseverance Award” និង “Grace Award” ក្នុងអំឡុងពេលពិធីបញ្ចប់ការសិក្សារបស់លោកស្រីទៀតផង៕