ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កម្ពុជាតាមរយៈក្រសួងកសិកម្ម រុក្ខាប្រមាញ និងនេសាទ បានទទួលវិញ្ញាបនបត្រកំណត់ត្រាពិភពលោកលើប្រភេទត្រីបបែលមេគង្គដែលមានទំហំបំផុត និងមានទម្ងន់ធ្ងន់ជាងគេបំផុតពីស្ថាប័ន Guinness World Records នៅថ្ងៃទី១៤ ខែវិច្ឆិកា ឆ្នាំ២០២៤ ប្រព្រឹត្តិទៅនៅសណ្ឋាគារហ៊ីម៉ាវ៉ារី រាជធានីភ្នំពេញ ។
“បូណ៌មី” ជាឈ្មោះត្រីបបែលយក្សទឹកសាបមានទម្ងន់ ៣០០គីឡូក្រាម និងជាមច្ឆាជាតិកម្រជិតផុតពូជ ដែលអ្នកនេសាទចាប់បាននៅថ្ងៃទី១៣ ខែមិថុនាឆ្នាំ២០២២ នៅឃុំកោះព្រះ ស្រុកសៀមបូក ខេត្តស្ទឹងត្រែង ។ ក្រុមស្រាវជ្រាវបានប្រសិទ្ធនាមត្រីបបែលដ៏ធំនេះថា “បូណ៌មី” និងលែងភ្លាមៗទៅទន្លេវិញនៅថ្ងៃ ១៥កើតពេញបូណ៌មី បន្ទាប់ពីសិក្សាកត់ត្រាព័ត៌មានរួចរាល់ ។
លោក យី ជុងវៃ តំណាង GUINNESS WORLD RECORDS មានប្រសាសន៍ថា ផ្អែកតាមរបាយការណ៍ និងព័ត៌មានពាក់ព័ន្ធនានា ត្រីបបែលញីរបស់កម្ពុជាពិតជាមានខ្នាតធំដែលមិនធ្លាប់ជួបលើពិភពលោក ។ ការបំបែកកំណត់ត្រាត្រីបបែលយក្សធំជាងគេលើពិភពលោកនេះ អាចបញ្ជាក់បានថា កម្ពុជាកាន់តែមានឈ្មោះបោះសំឡេងទៅកាន់ពិភពលោក និងជាប្រទេសមានធនធានមច្ឆជាតិកម្រ ព្រមទាំងមានធនធានជីវៈចម្រុះសម្បូរបែបផងដែរ ។
ព័ត៌មានកំណត់ត្រាពិភពលោក Guinness World Records បានបញ្ជាក់ថា ត្រីបបែលទឹកសាបធំជាងគេឈ្មោះ “បូណ៌មី” មានទម្ងន់ ៣០០គីឡូក្រាម មានប្រវែងបណ្តោយ ៣. ៩៨ម៉ែត្រ និងទទឹងខ្លួនប្រវែង ២.២០ ម៉ែត្រ ។ នេះជាត្រីបបែលទឹកសាបទន្លេមេគង្គដែលធំជាងគេបង្អស់ក្នុងប្រវត្តិសាស្ត្រ ។ កាលពីឆ្នាំ២០០៥ កន្លងទៅត្រីរាជ (Mekong giant catfish) ត្រូវគេបានចាប់បាននៅទន្លេមេគង្គប្រទេសថៃ មានទម្ងន់ ២៩៣គីឡូ ដែលត្រីនេះស្រាលជាងត្រីបបែលបូណ៌មី ។
ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា វិញ្ញាបនបត្រកំណត់ត្រាពិភពលោកដែលកម្ពុជាទទួលបាននៅថ្ងៃនេះ អាចសបញ្ជាក់ពីកិច្ចខិតខំប្រឹងប្រែងរបស់កម្ពុជាក្នុងការអភិរក្សជីវៈចម្រុះ និងធនធានត្រីទឹកសាបឱ្យមាននិរន្តភាព ។ ទន្ទឹមគ្នានេះ ឯកឧត្តមរដ្ឋលេខាធិការ ក៏បានលើកឡើងពីក្តីព្រួយបារម្ភជារួមលើសុខភាពទន្លេមេគង្គ ដែលកំពុងរងផលប៉ះពាល់ផ្សេងៗ រួមមាន ការប្រែប្រួលអាកាសធាតុ ការអភិវឌ្ឍន៍នានា ការចាក់ដីចូលទន្លេ ការបំពុលទឹកដោយសំណល់សំរាមប្លាស្ទិកជាដើម ។ បញ្ហាទាំងអស់នេះ គ្រប់ភាគីទាំងអស់ត្រូវចូលរួមដោះស្រាយដើម្បីសុខភាពទន្លេ ។
គួរបញ្ជាក់ថា បច្ចុប្បន្នប្រភេទធនធានជលផលដែលកំពុងរងគ្រោះថ្នាក់នៅកម្ពុជា (សម្តៅដល់ត្រីទឹកសាប) មានបីប្រភេទ គឺទី១ ត្រីបបែលយក្ស ទី២ ត្រីរាជ និងទី៣ ត្រីគល់រាំង ។ ទន្លេមេគង្គកម្ពុជាមានអន្លង់ត្រីជាច្រើនដែលប្រមូលផ្តុំដោយមច្ឆាជាតិចម្រុះស្ថិតនៅតាមលំហូរខ្សែទឹក ។ ប្រភេទត្រីបបែលទឹកសាបនេះក៏មានវត្តមានរស់នៅតាមដងទន្លេមេគង្គប្រទេសថៃ ឡាវ ម៉ាឡេស៊ី និងឥណ្ឌូនេស៊ីផងដែរ ។ ស្របគ្នានេះដែរ អង្គការសហភាពអន្តរជាតិដើម្បីអភិរក្សធម្មជាតិ (IUCN) បានចាត់ចំណាត់ថ្នាក់ត្រីប្រភេទនេះចូលក្នុងប្រភេទសត្វកម្រ ដែលត្រូវអភិរក្សដូចសត្វផ្សោតទឹកសាប ៕
