ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
រដ្ឋាភិបាលនូវែលសេឡង់ បានប្រកាសកាលពីសប្ដាហ៍មុនថា ប្រទេសនូវែលសេឡង់ គ្រោងបង្កើនទីផ្សារអប់រំសម្រាប់និស្សិតអន្តរជាតិ លើសចំនួនបច្ចុប្បន្នទ្វេដង នៅឆ្នាំ២០៣៤ ។
រដ្ឋមន្ត្រីក្រសួងអប់រំលោកស្រី Erica Stanford បាននិយាយនៅក្នុងសេចក្ដីថ្លែងការណ៍មួយថា ជាមួយនឹងការកើនឡើងចំនួន នៃការចុះឈ្មោះរបស់និស្សិតអន្តរជាតិដែលកើនឡើងជាលំដាប់ចាប់តាំងពីឆ្នាំ២០២៣មក រដ្ឋាភិបាលចង់បង្កើនចំណូលពីការកើនឡើងនេះ ដើម្បីអាចទទួលបានប្រាក់ចំណូល ៤,៣២ពាន់លានដុល្លារ នៅឆ្នាំ២០៣៤។
ការប្រកាសនេះ ធ្វើឡើងនៅពេលដែលប្រទេសអូស្ត្រាលី និងអាមេរិក ដែលជាគោលដៅដ៏ពេញនិយមសម្រាប់ការបន្តការសិក្សារបស់និស្សិតអន្តរជាតិ មានបំណងកាត់បន្ថយចំនួននិស្សិតបរទេស ដែលសិក្សាក្នុងប្រទេសខ្លួន។ ខណៈសាកលវិទ្យាល័យក្នុងប្រទេសជាច្រើន កំពុងប្រកួតប្រជែងគ្នា ក្នុងការធ្វើទីផ្សារ ដើម្បីទាញប្រយោជន៍ពីការរឹតបន្តឹងនេះ។
លោកស្រី Stanford បានបន្ថែមថា ក្នុងរយៈពេលដ៏ខ្លីខាងមុខ ការអប់រំនូវែលសេឡង់នឹងផ្ដោតលើកិច្ចខិតខំប្រឹងប្រែងផ្សព្វផ្សាយពីទីផ្សារ ដ៏មានសក្តានុពលរបស់ខ្លួន ដើម្បីបង្កើនចំនួននិស្សិត។
ទីផ្សារអប់រំអន្តរជាតិរបស់ប្រទេសនូវែលសេឡង់បច្ចុប្បន្ន មានតម្លៃ ៣,៦ពាន់លានដុល្លារ នូវែលសេឡង់ ដែលនេះជាចំណូលសំខាន់មួយ សម្រាប់សេដ្ឋកិច្ចជាតិ។ រដ្ឋាភិបាលចង់ឃើញការចុះឈ្មោះនិស្សិតអន្តរជាតិ កើនឡើងពី ៨៣,៧០០នាក់នៅឆ្នាំ២០២៤ ដល់ ១០៥,០០០នាក់ នៅឆ្នាំ២០២៧ និង ១១៩,០០០នាក់ នៅឆ្នាំ២០៣៤ ដែលចំនួននេះ នឹងបង្កើនផលចំណេញទេ្វដងសម្រាប់សេដ្ឋកិច្ចនូវែលសេឡង់។
ដើម្បីលើកទឹកចិត្តដល់និស្សិតបរទេសកាន់តែច្រើនឱ្យមកបន្តការសិក្សាក្នុងប្រទេសនូវែលសេឡង់ រដ្ឋាភិបាល គ្រោងបង្កើនម៉ោងធ្វើការ សម្រាប់និស្សិតអន្តរជាតិ ដោយបង្កើនម៉ោងធ្វើការពី ២០ ទៅ ២៥ម៉ោង។ លើសពីនេះ រដ្ឋាភិបាល ក៏បានគិតគូរអំពីការពង្រីកសិទ្ធិ ទទួលបានការងារធ្វើសម្រាប់និស្សិតថ្នាក់ឧត្តមសិក្សាផងដែរ ក្នុងនោះទាំងនិស្សិតផ្លាស់ប្ដូរការសិក្សា និងនិសិ្សតបន្តការសិក្សា គឺសុទ្ធតែមានសិទ្ធិទទួលបានការងារ។
រដ្ឋបាលប្រធានាធិបតីអាមេរិក លោក ដូណាល់ ត្រាំ បានទប់ស្កាត់ទិដ្ឋាការសម្រាប់និស្សិតបរទេស ជាពិសេសអ្នកដែលមកពីប្រទេសចិន។ កាលពីខែឧសភា សេតវិមានបានដកហូតលទ្ធភាពរបស់សាកលវិទ្យាល័យ Harvard ក្នុងការចុះឈ្មោះនិស្សិតបរទេស ដែលនេះជាវិធានការមួយ ត្រូវបានរារាំងដោយចៅក្រមសហព័ន្ធ។
រដ្ឋាភិបាលអូស្ត្រាលីបានកំណត់ចំនួននិស្សិតអន្តរជាតិថ្មីចូលរៀនដល់ ២៧០,០០០នាក់ សម្រាប់ឆ្នាំ២០២៥ ក្នុងកិច្ចខិតខំប្រឹងប្រែង ដើម្បីរក្សាកំណត់ត្រានៃការចំណាកស្រុក ដែលបានរួមចំណែកដល់ការកើនឡើងនៃតម្លៃផ្ទះជួល។
សម្រាប់ប្រទេសនូវែលសេឡង់ ដែលបានប្រឈមជាមួយនឹងកំណើនដ៏យឺតយ៉ាវផ្នែកសេដ្ឋកិច្ច ការផ្លាស់ប្ដូរនេះ គឺជាវិធានការចុងក្រោយបំផុត ក្នុងការធ្វើឱ្យប្រសើរឡើងផ្នែកសេដ្ឋកិច្ច ដែលមានបញ្ហា។ បន្ទាប់ពីការធ្វើកំណែទម្រង់ការកំណត់ទិដ្ឋាការ ដើម្បីលើកទឹកចិត្តអ្នកជំនាញឌីជីថល និងទាក់ទាញវិនិយោគបរទេស៕
