ខណៈដែលបញ្ញាសិប្បនិម្មិត (AI) ក៏​ដូចជាបដិវត្តន៍ការអប់រំកំពុងតែចាប់ផ្តើម ក្ដីបារម្ភអំពីទិន្នន័យ ឯកជនភាព ភាពលំអៀង និងការជំនួសការងាររបស់មនុស្សក៏​កំពុងតែកើនឡើងដូចគ្នាដែរ។ ជុំវិញគុណសម្បត្តិ និងគុណវិបត្តិរបស់បច្ចេកវិទ្យា AI បានជំរុញ​ឱ្យប្រទេសនានាជុំវិញពិភពលោក ចាប់ផ្ដើមគិតគូរ និងរៀបចំគោលនយោបាយអប់រំ ដើម្បីសម្របទៅនឹងការមកដល់នៃបច្ចេកវិទ្យានេះ និងប្រកួតប្រជែងក្នុងសេដ្ឋកិច្ច AI ។

ជាក់ស្ដែង យុទ្ធសាស្ត្រ «Smart Nation» របស់ប្រទេសសិង្ហបុរី មានគោលបំណងជំរុញប្រទេសនេះឱ្យក្លាយជាប្រទេសឈានមុខគេលើពិភពលោកក្នុងវិស័យ AI នៅឆ្នាំ២០៣០ តាមរយៈការប្រមូលផ្ដុំអ្នកស្រាវជ្រាវ រដ្ឋាភិបាល និងឧស្សាហកម្ម។ គោលដៅមួយ គឺជួយគ្រូបង្រៀនឱ្យងាយស្រួលរៀបចំ និងពង្រឹងការអប់រំ សម្រាប់សិស្សគ្រប់គ្នា។ ការប្រើ AI ដើម្បីជាដៃគូក្នុងការសិក្សា នឹងផ្ដល់នូវមតិកែលម្អ និងការលើកទឹកចិត្ត តាមតម្រូវការសិស្ស ការដាក់ពិន្ទុដោយស្វ័យប្រវត្តិ និងប្រព័ន្ធម៉ាស៊ីនចេះរៀន។ កម្មវិធីមួយក្នុងចំណោមកម្មវិធី ដែលគួរឱ្យចាប់អារម្មណ៍បំផុតរបស់ Gen AI ក្នុងការអប់រំ គឺសមត្ថភាពក្នុងការសម្រួលមេរៀនឱ្យស្របតាមតម្រូវការរបស់សិស្សម្នាក់ៗ។

ប្រទេសកូរ៉េខាងត្បូងបានអនុវត្តប្រព័ន្ធ ដែលមាន AI ជាមូលដ្ឋាន (AI-based system) ដើម្បីជួយសម្រួលការធ្វើការងារផ្ទះ និងកិច្ចការស្រាវជ្រាវ ដោយផ្អែកលើកម្រិត នៃការយល់ដឹងរបស់សិស្ស និង «ទំនោរ និងអាកប្បកិរិយានៃការសិក្សា»។ កុមារម្នាក់ៗនឹងមានគ្រូបង្រៀន AI ផ្ទាល់ខ្លួន ព្រមទាំង អាចចូលប្រើវេទិកាសិក្សាតាមអ៊ីនធឺណិត ដែលអនុញ្ញាតឱ្យគ្រូបង្រៀន អាចផ្ដោតអារម្មណ៍លើការបណ្ដុះបណ្ដាលបញ្ញាផ្នែកអារម្មណ៍ និងសង្គម។ រដ្ឋមន្ត្រីក្រសួងអប់រំ កូរ៉េខាងត្បូង បានលើកឡើងថា ការផ្លាស់ប្ដូរនេះ គឺចាំបាច់ ដើម្បីបើកឱកាសឱ្យសាលារដ្ឋ ដែលបច្ចុប្បន្នផ្ដោតលើការទន្ទេញចាំ អាចផ្ដល់ឱ្យសិស្សនូវរបៀបរៀន បែបផ្ទាល់ខ្លួន និងកាន់តែស៊ីជម្រៅ ដែលនេះជារបៀបដែលសាលាឯកជនផ្ដល់ឱ្យសិស្ស។

នៅក្នុងប្រទេសឥណ្ឌា ក្រុមហ៊ុនបច្ចេកវិទ្យា ed Embibe ប្រើបច្ចេកវិទ្យា AI ដើម្បីបញ្ជាក់ពីភាពត្រឹមត្រូវ នៃការដោះស្រាយលំហាត់គណិតវិទ្យា និងវិទ្យាសាស្ត្រ ដែលមានលក្ខណៈស្មុគស្មាញ។ សិស្សអាចប្រើស្មាតហ្វូន ដើម្បីស្កេនអត្ថបទពីសៀវភៅសិក្សា ហើយកម្មវិធីនេះ ប្រើរូបភាព 3-D ដើម្បីជួយឱ្យសិស្សមើលឃើញរូបភាពមេរៀន កាន់តែច្បាស់។ AI ក៏ត្រូវបានគេប្រើនៅក្នុងប្រទេសឥណ្ឌា ដើម្បីព្យាករណ៍អំពីការវិវត្តន៍សមត្ថភាពសិស្សផងដែរ។

ប្រទេសនានាក៏កំពុងវិនិយោគទឹកប្រាក់យ៉ាងច្រើនក្នុងកម្មវិធីរៀបចំគ្រូបង្រៀន AI និងតម្រូវការកម្មវិធីសិក្សាថ្នាក់ជាតិផងដែរ។ ថ្មីៗនេះ សិង្ហបុរីបានប្រកាសពីគំនិតផ្ដួចផ្ដើមថ្នាក់ជាតិមួយ ដើម្បីកសាងអក្ខរកម្ម AI ក្នុងចំណោមសិស្ស និងគ្រូបង្រៀន ដើម្បីធានាថា ពួកគេយល់អំពីហានិភ័យ និងអត្ថប្រយោជន៍នៃបច្ចេកវិទ្យានេះ។ នៅឆ្នាំ២០២៦ ការបណ្ដុះបណ្ដាលជំនាញ AI ក្នុងវិស័យអប់រំទៅដល់គ្រូបង្រៀន នឹងធ្វើឡើងគ្រប់កម្រិត នៅសិង្ហបុរី។

ដោយឡែក កូរ៉េខាងត្បូងកំពុងវិនិយោគទឹកប្រាក់យ៉ាងច្រើន ដើម្បីបណ្ដុះបណ្ដាលជំនាញនេះ ដល់សិស្ស។ នៅឆ្នាំ២០២៥ ប្រទេសនេះ មានគោលបំណងដំណើរការវគ្គសិក្សា AI នៅក្នុងកម្មវិធីសិក្សាថ្នាក់ជាតិរបស់ខ្លួន នៅគ្រប់កម្រិតទាំងអស់ និងចាប់ផ្ដើមអនុវត្តនៅថ្នាក់វិទ្យាល័យមុនគេ។

ចំពោះប្រទេសហ្វាំងឡង់ ដែលជាប្រទេសទទួលបានការកោតសរសេរសម្រាប់ប្រព័ន្ធអប់រំ ដែលមានគុណភាពខ្ពស់ បានទទួលយកបច្ចេកវិទ្យា AI ជាមួយនឹងការប្ដេជ្ញាចិត្តថ្នាក់ជាតិយ៉ាងម៉ឹងម៉ាត់ក្នុងការអប់រំប្រជាពលរដ្ឋរបស់ខ្លួន តាមរយៈការផ្ដល់វគ្គសិក្សាដោយឥតគិតថ្លៃ។

នៅក្នុងប្រទេសចិន រដ្ឋាភិបាលបានបណ្ដាក់ទុនយ៉ាងច្រើន តាមរយៈការកាត់បន្ថយពន្ធ និងការលើកទឹកចិត្តផ្សេងទៀត ទៅលើឧបករណ៍ AI ដូចជា វេទិកាបង្រៀន Squirrel AI ដែលពឹងផ្អែកលើសំណុំទិន្នន័យទ្រង់ទ្រាយធំ និងការឃ្លាំមើលដោយកាមេរ៉ា។ បច្ចេកវិទ្យា AI ក្នុងវិស័យអប់រំ ដែលចិនបានផលិត ភាគច្រើនផ្ដោតលើការពង្រឹង ការអនុវត្តតេស្តស្ដង់ដា ដូច្នេះសម្រាប់សិស្សដែលគ្រួសាររបស់គេមានលទ្ធភាពឱ្យរៀនដោយប្រើបច្ចេកវិទ្យានេះ អាចវិវត្តន៍សមត្ថភាពលឿនជាងសិស្សដទៃ។ ដោយឡែកនៅក្នុងប្រទេសចិន បញ្ហាក្រមសីលធម៌ សិទ្ធិទទួលបានសមធម៌ ឯកជនភាព និងហានិភ័យដែលបណ្ដាលមកពី AI ផ្សេងទៀត មិនមែនជារឿងអាទិភាព ដែលចិនគិតគូរនោះទេ។

ផ្ទុយទៅវិញ កម្មវិធី AI in learning របស់ប្រទេសហ្វាំងឡង់ ដែលបង្កើតឡើងដោយការសហការពីសំណាក់ក្រុមហ៊ុនអន្តរជាតិ និងក្រុមហ៊ុនជាច្រើន មានគោលបំណង លើកកម្ពស់សមធម៌ និងគុណភាពនៃការសិក្សាក្នុងស្រុក និងជាសកល។

ចំពោះរដ្ឋាភិបាលអាម៉េរិក ក៏បានគិតគូរអំពីការដាក់ AI ទៅក្នុងផែនការបច្ចេកវិទ្យាអប់រំជាតិរបស់ខ្លួនដែរ ដោយផ្ដោតលើការកាត់បន្ថយហានិភ័យ និងបង្កើនឱកាសឱ្យបានច្រើនបំផុត តាមរយៈការប្រើប្រាស់ AI ដើម្បីធ្វើឱ្យសិស្សអាម៉េរិក អាចត្រៀមខ្លួន និងប្រកួតប្រជែងក្នុងយុគសម័យសេដ្ឋកិច្ច AI ៕