មហាសេដ្ឋីពិភពលោក Elon Musk មានគម្រោងបើកសាកលវិទ្យាល័យថ្មីមួយ ដែលផ្ដោតលើការបណ្ដុះបណ្ដាលជំនាញ STEM នៅរដ្ឋតិចសាស់ (Texas) សហរដ្ឋអាមេរិក នេះបើយោងតាមឯកសារពន្ធដែលបានបង្ហាញជាសាធារណៈ។

សារព័ត៌មាន Bloomberg បានរាយការណ៍ថា នៅក្នុងឯកសារបានបង្ហាញថា លោក Elon Musk បានបរិចា្ចគទឹកប្រាក់ ១០០លានដុល្លារ ទៅដល់អង្គការសប្បុរសធម៌របស់គាត់ ដែលមានឈ្មោះថា The Foundation ដើម្បីបង្កើតសាលាបឋមសិក្សា និងមធ្យមសិក្សា ដែលផ្តោតលើការបង្រៀនជំនាញ STEM នៅទីក្រុង Austin បន្ទាប់មកនឹងស្វែងរកការទទួលស្គាល់ពីសមាគម Southern Association of Colleges and Schools Commission on Colleges ដើម្បីបើកដំណើរការសាកលវិទ្យាល័យ។

អង្គការ The Foundation បានលើកឡើងថា កម្មវិធីសិក្សាសម្រាប់សាលា និងសាកលវិទ្យាល័យ នឹងរួមបញ្ចូលនូវការបង្រៀនបែបផ្លូវការដោយគ្រូ ដែលមានបទពិសោធន៍លើមុខវិជ្ជាគណិតវិទ្យា វិទ្យាសាស្ត្រ វិស្វកម្ម និងរូបវិទ្យា។ ទន្ទឹងនឹងនេះ ដំណើរការរៀននឹងប្រើប្រាស់បច្ចេកវិទ្យា Simulation, ការស្រាវជ្រាវ ដើម្បីអភិវឌ្ឍ (Case Study), គម្រោងបង្កើត និងរចនា (fabrication/design projects) និងការពិសោធន៍ ដោយនៅក្នុងដំណាក់កាលបង្កើតដំបូងនេះ សាលាមានបំណងទទួលសិស្សឱ្យចុះឈ្មោះចូលរៀនចំនួន ៥០នាក់។

សម្រាប់គម្រោងនេះ សាលាមិនចង់ឱ្យថ្លៃសិក្សាគឺជាឧបសគ្គ សម្រាប់សិស្សឡើយ។ ដូច្នេះ ប្រសិនបើសិស្សណាម្នាក់ ដែលត្រូវបានអនុញ្ញាតឱ្យចូលរៀននៅសាលា គេនឹងអាចរៀនដោយមិនគិតថ្លៃ ព្រមទាំងអាចទទួលបានជំនួយផ្នែកហិរញ្ញវត្ថុ ទៅតាមលទ្ធភាព និងធនធានដែលសាលាមាន។ ខណៈសាលា នឹងត្រូវដំណើរការតាមរយៈការបរិច្ចាគពីសាធារណជន និងថ្លៃឈ្នួលសាលា។

នៅក្នុងបទសម្ភាសន៍ឆ្នាំ២០១៥ នៅទីក្រុងប៉េងកាំង លោក Musk បានលើកឡើងថា គាត់បានចុះឈ្មោះ កូនទាំងប្រាំនាក់របស់លោកនៅ Ad Astra ដែលឥឡូវមានឈ្មោះថា Astra Nova ។ នេះគឺជាសាលាដែលផ្ដោតលើការពិសោធន៍មិនរកប្រាក់ចំណេញមួយផ្សេងទៀតរបស់មហាសេដ្ឋីរូបនេះ ដែលគាត់បានបង្កើតឡើងនៅទីក្រុង Hawthorne រដ្ឋ California នៅក្នុងបរិវេណ ក្រុមហ៊ុន Space X របស់គាត់៕