ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បុរសជនជាតិចិនម្នាក់ បានធ្វើឱ្យប្រព័ន្ធផ្សព្វផ្សាយសង្គមក្នុងប្រទេសចិន មានការភ្ញាក់ផ្អើលអំពីស្នាដៃសិក្សាដ៏គួរឱ្យកត់សម្គាល់របស់គាត់ ដោយលោកទទួលបានសញ្ញាបត្រក្រោយបណ្ឌិតចំនួន ២ បណ្ឌិត៤ និងថ្នាក់អនុបណ្ឌិតចំនួន ៤ និងមានឈ្មោះជាសមាជិក នៅក្នុងស្ថាប័នសិក្សាជាង ២០ កន្លែង។
លោក Zhao Zijian អាយុ ២៩ឆ្នាំ បានបង្កឱ្យមានការជជែកវែកញែកជាសាធារណៈយ៉ាងខ្លាំង បន្ទាប់ពីវិទ្យាស្ថានស្រាវជ្រាវវប្បធម៌ និងសិល្បៈជាតិម៉ុងហ្គោល បានប្រកាសតែងតាំងលោកជាអ្នកស្រាវជ្រាវ និងបានបង្ហាញពីប្រវត្តិនៃការសិក្សាមិនគួរឱ្យជឿរបស់គាត់។
Zhao បាននិយាយថា លោកបានទទួលសញ្ញាបត្របណ្ឌិតផ្នែក សិល្បៈ ចិត្តវិទ្យា ការអប់រំ និងការសិក្សាព្រះគុម្ពី។ លោកបានសង្កត់ធ្ងន់ជាពិសេស អំពីស្ថាប័នចំនួន ២ ដែលលោកបានបញ្ចប់ការសិក្សាថ្នាក់បណ្ឌិត គឺ សាកលវិទ្យាល័យ កាតូលិក ក្នុងប្រទេសកូរ៉េខាងត្បូង និងសាកលវិទ្យាល័យ Lyceum នៃប្រទេសហ្វីលីពីន។
គាត់ក៏បានអះអាងដែរថា គាត់ទទួលបានសញ្ញាបត្រថ្នាក់អនុបណ្ឌិតជាច្រើន ក្នុងផ្នែកផ្សេងៗគ្នា រួមមាន ផ្នែកទំនាក់ទំនង ការសិក្សាពុទ្ធសាសនា និងការសិក្សាអំពីចិត្ត ពីសាកលវិទ្យាល័យហុងកុង, សាកលវិទ្យាល័យបាទីស្ទ (Baptist University) និងសាកលវិទ្យាល័យ ២ទៀត ក្នុងប្រទេសអេស្ប៉ាយ រួមមាន សាកលវិទ្យាល័យ ហ្សារាហ្គោហ្សា (Zaragoza) និងសាកលវិទ្យាល័យ Miguel de Cervantes European ។
បន្ថែមពីលើសញ្ញាបត្ររបស់គាត់ លោក Zhao មានឈ្មោះជាសមាជិកនៅស្ថាប័នសង្គមសិក្សាចំនួន ២២ ផ្សេងគ្នា នៅក្នុងវិស័យជាច្រើន ដូចជា សេដ្ឋកិច្ច និងវេជ្ជសាស្ត្រជាដើម។ លើសពីនេះ លោកបានបោះពុម្ពអត្ថបទសិក្សា កម្រិតខ្ពស់ចំនួន ២៤ ថែមទៀត។
ក្រោយពីបានដឹងអំពីអត្តសញ្ញាណ និងប្រវត្តិរបស់លោក Zhao ដែលមានអាយុត្រឹម ២៩ឆ្នាំ មនុស្សជាច្រើន បានវែកញែកថា ប្រវត្តិការសិក្សារបស់លោក គឺជារឿងមួយ ដែលផ្ទុយពីការពិត ខណៈការសិក្សាថ្នាក់បណ្ឌិត យ៉ាងហោចណាស់ ត្រូវចំណាយពេល ៤ឆ្នាំ ដើម្បីបញ្ចប់ការសិក្សាដោយជោគជ័យ។
ក្រោយពីផ្ទុះការវែកញែកខ្លាំងពីសំណាក់សាធារណៈជន វិទ្យាស្ថានបានផ្អាកកិច្ចសហការជាមួយនឹង Zhao ជាបណ្ដោះអាសន្នមួយរយៈ ដើម្បីបើកការស៊ើបអង្កេតលើគុណវុឌ្ឍិសិក្សារបស់គាត់។
ក្រោយពីបានសិក្សាអំពីប្រវត្តិរបស់លោក Zhao យ៉ាងម៉ត់ចត់ នៅថ្ងៃទី១២ តុលា លោក Yi Fujun ប្រធានវិទ្យាស្ថានស្រាវជ្រាវវប្បធម៌ និងសិល្បៈជាតិម៉ុងហ្គោល បានផ្ដល់ព័ត៌មានដល់សារព័ត៌មាន China Newsweek ថា គ្មានការក្លែងបន្លំណាមួយអំពីគុណវុឌ្ឍិសិក្សារបស់ លោក Zhao នោះទេ។ លោកបានបញ្ជាក់បន្ថែមថា ថ្នាក់អនុបណ្ឌិតទាំងបួនរបស់ Zhao បានឆ្លងកាត់ការផ្ទៀងផ្ទាត់ និងទទួលស្គាល់ជាផ្លូវការពីមជ្ឈមណ្ឌលសេវាកម្មចិនសម្រាប់ការផ្លាស់ប្ដូរអាហារូបករណ៍ (CSCSE)។
ដោយឡែកចំពោះសញ្ញាបត្របណ្ឌិត មានតែមួយប៉ុណ្ណោះដែលទទួលបានការបញ្ជាក់ និងទទួលស្គាល់ជាផ្លូវការ ខណៈសញ្ញាបត្របណ្ឌិតមួយជំនាញទៀត កំពុងស្ថិតក្នុងដំណើរការនៃការបញ្ជាក់។ បើតាមលោក Yin បានឱ្យដឹងថា លោក Zhao មិនមានគម្រោងបញ្ជាក់សញ្ញាបត្របណ្ឌិត ២ផ្សេងទៀតរបស់លោកនោះទេ។
លោក Yin បានបញ្ជាក់បន្ថែមថា លោក Zhao បំពេញគ្រប់លក្ខខណ្ឌទាំងអស់ ដែលវិទ្យាស្ថានរបស់លោកទាមទារ សម្រាប់ការកាន់តំណែងជាអ្នកស្រាវជ្រាវ ហើយបានសម្ដែងការសោកស្ដាយ ចំពោះបញ្ហា ដែលបានកើនឡើង។ ទន្ទឹមនឹងនេះ លោក Zhao មិនបានចេញមុខបកស្រាយអ្វីទាំងអស់ នៅអំឡុងពេលផ្ទុះការវែកញែកនេះ៕
