លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ដំណើរការកំណែសន្លឹកកិច្ចការបេក្ខជនប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប នៅមណ្ឌលកំណែចំនួន ១០ បានប្រព្រឹត្តទៅតាមប្រក្រតី ហើយសង្ឃឹមថា នឹងបញ្ចប់តាមផែនការគ្រោងទុក។

អ្នកនាំពាក្យក្រសួងអប់រំ យុវជន និងកីឡា បញ្ជាក់បន្ថែមថា គិតមកត្រឹមល្ងាចថ្ងៃទី១៦ មណ្ឌលកំណែចំនួន ៦ បានបញ្ចប់ជាស្ថាពរ រីឯមណ្ឌលកំណែចំនួន ៤ទៀត រំពឹងថានឹងបញ្ចប់នៅថ្ងៃទី១៧ តាមការគ្រោងទុក។

លោកជំទាវ ឃួន វិច្ឆិកា បន្ថែមថា ដើម្បីរក្សាភាពសុក្រិតក្នុងដំណើរការកំណែសន្លឹកកិច្ចការបេក្ខជនប្រឡងបាក់ឌុប ក្រសួងអប់រំបានអនុវត្ត រួមមាន ទី១. ដំណើរការកំណែមានការចូលរួមអង្កេតការពីអង្គភាពប្រឆាំងអំពើពុករលួយ ទី២. សន្លឹកកិច្ចការបេក្ខជនត្រូវបានដាក់ឱ្យកែនៅតាមមណ្ឌលកំណែតាមមុខវិជ្ជាផ្សេងៗគ្នា ទី៣. ការចុះលេខសម្ងាត់ ទី៤. ការរៀបចំក្រុមបែងចែកសន្លឹកកិច្ចការដើម្បីបែងចែកសន្លឹកកិច្ចការ និងមិនអនុញ្ញាតឱ្យក្រុមកំណែនីមួយៗជ្រើសរើសសន្លឹកកិច្ចការតាមចិត្តចង់បាន ទី៥. ការកែដោយគ្រូបង្រៀនឯកទេស ពិសេសគ្រូបង្រៀនថ្នាក់ទី១២ ទី៦. ការរៀបចំឱ្យមានក្រុមបច្ចេកទេសកំណែដើម្បីពិនិត្យពីភាពសុក្រឹតនៃដំណើរការកែ ទី៧. ការស្រង់ពិន្ទុចូលសន្លឹកសម្រង់ពិន្ទុដែលមានតែមបាកូដ និងទី៨. ដំណើរការបូកស្រង់ដែលមានភាពសម្ងាត់ និងយន្តការត្រួតពិនិត្យច្បាស់លាស់។

បើតាមក្រសួងអប់រំ លោកគ្រូ អ្នកគ្រូ ដែលជាប្រធានក្រុមដឹកនាំធ្វើអត្រាកំណែទាំងអស់ បានធ្វើការបែងចែកសមាជិកបន្តជាក្រុមតូច និងធ្វើការណែនាំដល់សមាជិកទាំងឱ្យបំពេញភារកិច្ចឱ្យបានត្រឹមត្រូវ និងយកចិត្តទុកដាក់ក្រោមស្មារតីទទួលខុសត្រូវខ្ពស់ ដោយមិនត្រូវយកភ្ជាប់មកជាមួយនូវទូរស័ព្ទដៃ និងឧបករណ៍អេឡិចត្រូនិកចូលបន្ទប់កំណែ ដើម្បីជៀសវាងការបង្ហោះរាល់សំណៅកិច្ចការបេក្ខជន ឬអត្រាកំណែតាមបណ្ដាញសង្គម។

គួរជម្រាបជូនថា ក្រសួង​អប់រំ យុវជន ​និង​កីឡា ​បាន​ដំណើរការ​កំណែនៃការប្រឡងមធ្យមសិក្សា​ទុតិយភូមិ​សម័យ​ប្រឡង ៨ តុលា ២០២៤ ចាប់ពី​ថ្ងៃទី​១១ ​ដល់​ថ្ងៃទី ​១៧ ខែ​តុលា ឆ្នាំ​២០២៤​ និង​ដំណើរការ​ស្រង់​បូក​ពិន្ទុ​ដោយ​កុំព្យូទ័រ និង​ផ្ទៀងផ្ទាត់​ពិន្ទុ​ប្រព្រឹត្តទៅ ចាប់ពី​ថ្ងៃទី១៨ ខែតុលា ឆ្នាំ​២០២៤ ដល់​ថ្ងៃទី​២៨ ខែតុលា ឆ្នាំ​២០២៤​ មុននឹង​ប្រកាស​លទ្ធផល​នៅ​ថ្ងៃទី៣០ ខែ​តុលា ឆ្នាំ​ ២០២៤ ពេល​រសៀល​នៅរាជធានី​ភ្នំពេញ និង​ខេត្តកណ្តាល និង​នៅ​ថ្ងៃទី​៣១ ខែតុលា ឆ្នាំ​២០២៤ សម្រាប់​ខេត្ត​ផ្សេងៗ​នៅ​ទូទាំង​ប្រទេស៕