ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប កាន់តែខិតជិតមកដល់ ហើយបញ្ហាមួយចំនួនដែលបេក្ខជនតែងជួបនៅពេលរៀនត្រៀមប្រឡង គឺច្រើនតែពិបាករកឯកសារ ពិបាកសួរសំណួរនៅពេលមានចម្ងល់ មិនដឹងតេស្តសមត្ថភាពតាមវិធីណាជាដើម។
ដើម្បីរួមចំណែកជួយផ្ដល់គន្លឹះងាយៗក្នុងការរៀនសូត្រសម្រាប់សិស្សានុសិស្សដែលជាបេក្ខជនប្រឡងបាក់ឌុប ខាងមុខនេះ AMS Education សូមបង្ហាញនូវកម្មវិធីទូរស័ព្ទដៃ (App) ក៏ដូចជាគេហទំព័រចំនួន៥ ដែលផ្ដល់ភាពងាយស្រួលក្នុងការស្វ័យសិក្សា ៖
១. App MoEYS E-learning៖ កម្មវិធីស្វ័យសិក្សានេះ បង្កើតឡើងដោយក្រសួងអប់រំ យុវជន និងកីឡា ដែលមានវីដេអូសិក្សាពីថ្នាក់ទី១ ដល់ថ្នាក់ទី១២។ លើសពីនេះ មានសៀវភៅសិក្សាអេឡិចត្រូនិច ដូចជា សៀវភៅសិក្សាគោល សៀវភៅកំណែអំណានទូទៅ ចំណេះដឹងសកល រឿងនិទាន កម្មវិធីតេស្តសមត្ថភាពសិស្ស និងទំព័រព័ត៌មានអប់រំ។ កម្មវិធីទូរស័ព្ទដៃនេះ ងាយស្រួយក្នុងការស្វ័យសិក្សាបន្ថែមសម្រាប់ត្រៀមប្រឡងបាក់ឌុប រួមមានថ្នាក់វិទ្យាសាស្រ្ត និងថ្នាក់វិទ្យាសាស្រ្តសង្គម។
២. App អក្សរសិល្ប៍ខ្មែរ ៖ កម្មវិធីនេះ ងាយស្រួលស្វ័យសិក្សានៅផ្ទះបន្ថែមអំពីមុខវិជ្ជាអក្សរសាស្រ្តខ្មែរ ។ ក្នុងនោះ ជួយពន្យល់គន្លឹះតែងសេចក្ដី អក្សរសិល្ប៍សង្ខេប ក៏ដូចជាការសិក្សាពីអត្ថបទអក្សរសិល្ប៍។ ម៉្យាងវិញទៀត មានពន្យល់ទាក់ទងនឹងវិធីសាស្រ្តតែងសេចក្ដី ផ្ដោតលើប្រធានបែបពន្យល់ ប្រធានបែបពិភាក្សា ប្រធានបែបប្រៀបធៀប។ លើសពីនេះ ជួយសិស្សានុសិស្សដឹងពីរបៀបសរសេរប្រធាននីមួយៗ និងទម្រង់នៃការដាក់ពិន្ទុ។
៣. App បាក់ឌុប ៖ កម្មវិធីនេះ មានមុខវិជ្ជាជាច្រើនស្របតាមកម្មវិធីសិក្សា រួមមានអក្សរសាស្រ្តខ្មែរ គណិតវិទ្យា រូបវិទ្យា គីមីវិទ្យា ជីវវិទ្យា ប្រវត្តិវិទ្យា សីលធម៌-ពលរដ្ឋ ផែនដីវិទ្យា ភាសាអង់គ្លេស និងភាសាបារាំង។ លើសពីនេះ កម្មវិធីក៏មានដាក់បញ្ចូលវិញ្ញាសាប្រឡង ការតេស្តសមត្ថភាព សម្រាប់សិស្សានុសិស្សចូលទៅស្វ័យសិក្សា និងធ្វើលំហាត់។
៤. App Tesdopi ៖ កម្មវិធីទូរស័ព្ទដៃនេះ បង្កើតឡើងដើម្បីឱ្យសិស្សអនុវត្តបន្ថែមលើមេរៀន និងលំហាត់មុខវិជ្ជាភាសាខ្មែរ គណិតវិទ្យា វិទ្យាសាស្ត្រថ្នាក់ទី៧ ដល់ទី១២ ក្នុងកម្មវិធីសិក្សាគោល។ នៅក្នុង TESDOPI មានកម្មវិធីរបៀបរៀនបែបថ្មី, មេរៀនខ្លីៗងាយយល់, ធ្វើលំហាត់ជាង ២ម៉ឺនលំហាត់, តាមដានរបាយការណ៍ និងធ្វើវិញ្ញាសាត្រៀមប្រឡង។ កម្មវិធីនេះ ងាយស្រួលសម្រាប់សិស្សានុសិស្សក្នុងការរៀនសូត្រ មានមេរៀនត្រៀមប្រឡង តេស្តសមត្ថភាព និងបណ្ណាល័យផងដែរ។
៥. Lim AppKh ៖ កម្មវិធីនេះប្រមូលផ្តុំទៅដោយលំហាត់លីមីតជាច្រើនដែលដកស្រង់ចេញពីឯកសារគណិតវិទ្យាផ្សេងៗ។ កម្មវិធីនេះ មានលំហាត់លីមីតមានគ្រប់អនុគមន៍ រៀនហើយធ្វើតេស្តសមត្ថភាព មានមេរៀនជំនួយ និងរូបមន្តទូទៅ។ ជាពិសេស ជួយសិស្សានុសិស្សដោះស្រាយលំហាត់លីមីតបានយ៉ាងងាយស្រួល៕
