ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានលើកទឹកចិត្តទៅដល់ក្រុមហ៊ុន សហគ្រាសក្នុងស្រុក ងាកមកប្រើប្រាស់ធនធានមនុស្សនៅក្នុងស្រុក ដែលវានឹងជួយទៅដល់ការងារសង្គម បង្កើនប្រសិទ្ធភាពខ្សែចង្វាក់ផលិតកម្ម និងធានានិរន្តរភាព។
ក្នុងឱកាសចូលរួមជាអធិបតីពិធីបើកវគ្គបណ្តុះបណ្តាលការងារកំបោរក្នុងវិស័យសំណង់ដែលជាកិច្ចសហការរវាងវិទ្យាស្ថានជាតិពហុបច្ចេកទេសកម្ពុជា (NPIC) និងក្រុមហ៊ុនជីបម៉ុងអ៊ិនស៊ី ស៊ីមេន កាលពីពេលថ្មីៗនេះ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ នៅក្នុងពិភពលោកនេះ កំណើនមុនគេបំផុត ហើយជាក្បាលម៉ាស៊ីន គឺភាគច្រើនពាក់ព័ន្ធនឹងការអភិវឌ្ឍអចលនទ្រព្យ ប៉ុន្តែវិស័យនេះ នៅរៀងរាល់២០ឆ្នាំម្តង គឺវាត្រូវធ្លាក់ចុះម្តងដោយសារកំណើនខ្ពស់ពេក តែពេលវេលានេះ គឺជាពេលវេលាដែលល្អសម្រាប់ក្រុមហ៊ុនយកឱកាសពង្រីកនូវធនធានមនុស្សក្នុងស្រុក ដើម្បីផ្តល់ឱកាសឱ្យធនធានមនុស្សនៅក្នុងស្រុកអាចធ្វើការងារជំនួសអ្នកឯកទេសមកពីខាងក្រៅផង ហើយនៅពេលដែលយើងប្រើប្រាស់ធនធានក្នុងស្រុក ក៏ធ្វើឱ្យតម្លៃនៃការសាងសង់ ឬផលិតកម្មថោកជាងមុនផងដែរ។
តាមប្រសាសន៍របស់ ឯកឧត្តមរដ្ឋមន្រ្តីក្រសួងការងារ ការបណ្តុះបណ្តាល និងប្រើប្រាស់ធនធានមនុស្សនៅក្នុងស្រុក គឺជាការមើលឃើញវែងឆ្ងាយ និងត្រឹមត្រូវ ព្រោះតែការប្រើប្រាស់ធនធានមនុស្សក្នុងស្រុក នឹងជួយទៅដល់ការងារសង្គមផង, បង្កើនប្រសិទ្ធភាព នៃការគ្រប់គ្រង ក៏ដូចជាខ្សែសង្វាក់ផលិតកម្មផង។
ការប្រើប្រាស់ធនធានរបស់យើងនៅក្នុងស្រុក គឺធានានិរន្តរភាព បើទោះជាមានវិបត្តិអ្វីកើតឡើង យើងជាអ្នកនៅក្នុងស្រុកជាមួយគ្នា មិនរត់ចោលគ្នា… បើយើងប្រើកម្លាំងពីខាងក្រៅច្រើន ទី១ តម្លៃថ្លៃ ទី២ មិនប្រាកដថា គេនៅជាមួយយើងគ្រប់កាលៈទេសៈ…
ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ
យោងតាមរបាយការណ៍របស់ក្រសួងការងារ និងបណ្តុះបណ្តាលវិជ្ជាជីវៈ នៅឆ្នាំ២០២៣ កម្មករនិយោជិតខ្មែរដែលកំពុងបម្រើការងារនៅតាមរោងចក្រ សហគ្រាសក្នុងស្រុក មានសរុបចំនួន ជាង៣៤ម៉ឺននាក់ (៣៤៣ ៦៩៨នាក់) ជាមួយគ្នានេះ ជនបរទេសដែលកំពុងធ្វើការនៅតាមរោងចក្រ សហគ្រាស នៅកម្ពុជា មានសរុបចំនួនជាង ៣ម៉ឺននាក់ (៣២ ៤២៥នាក់) ។ ដោយឡែកសម្រាប់ការបណ្តុះបណ្តាលជំនាញបច្ចេកទេស និងវិជ្ជាជីវៈ វិញ នៅឆ្នាំ២០២៣ បានបណ្តុះបណ្តាលសិក្ខាកាម សិស្ស និស្សិត សរុបចំនួនជាង ៥ម៉ឺននាក់ (៥៤៤៣៨នាក់) ក្នុងនោះវគ្គខ្លីមានចំនួនជាង២ម៉ឺននាក់ (២៥៩០៤នាក់) និងវគ្គវែងមានចំនួនជិត ៣ម៉ឺននាក់ (២៨៥៣៤នាក់)៕
