ការធ្វើចលនារាងកាយជាមួយមិត្តស្និទ្ធស្នាល ឬក្រុមមនុស្សចម្រុះ បានផ្តល់ភាពងាយស្រួលក្នុងការពង្រឹងទម្លាប់ហាត់ប្រាណឱ្យមានភាពទៀងទាត់ ថែមទាំងជាទីវិវឌ្ឍន៍នៃសុខភាពរាងកាយបានល្អមួយកម្រិតបន្ថែមទៀត។ យោងតាមគេហទំព័រ CNET បានឱ្យដឹងថា មានមនុស្សជាច្រើនពួកគេពិបាកតឹងតែងក្នុងការធ្វើលំហាត់ប្រាណជាប្រចាំថ្ងៃ បើលោកអ្នកកំពុងតែប្រឈមនឹងបញ្ហាទាំងនេះ គឺគ្រាន់តែចាំថា មិនមែនមានតែយើងម្នាក់នោះទេ ហើយក៏មិនចាំបាច់ទៅហាត់ប្រាណតែម្នាក់ឯងដែរ ប្រសិនបើមានគ្នារួចហើយ ពីព្រោះថា ការធ្វើលំហាត់ប្រាណជាមួយមិត្ត និងក្រុមមនុស្សណាម្នាក់ តែងតែផ្តល់នៅបទពិសោធន៍ខុសប្លែកគ្នាជាប្រចាំ។ ខាងក្រោមជាអត្ថប្រយោជន៍៥ចំណុច ដែលទទួលបានពីការហាត់ប្រាណជាមួយមនុស្សម្នាដទៃ ឬការហាត់ប្រាណជាក្រុម។

១. បង្កើនបានជាកាតព្វកិច្ច និងភាពទៀងទាត់ ៖ ត្បិតថា ការហាត់ប្រាណជាក្រុម គឺជាកត្តាសំខាន់ជួយជំរុញទឹកចិត្តក៏ពិតមែន ប៉ុន្តែក៏ត្រូវទទួលស្គាល់ដែរថា មិនមានមនុស្សនៅចាំជំរុញទឹកចិត្តបានរហូតនោះទេ។ យ៉ាងណាក៏ដោយ តាមរយៈការជំរុញពីពួកគាត់កន្លងមក វាបានរក្សាទម្លាប់ និងភាពទៀងទាត់រួចស្រេចទៅហើយ ជារួមគឺមានន័យថា ការហាត់ប្រាណលក្ខណៈក្រុមៗ ជាបំណែកនៃការបណ្តុះមូលដ្ឋានគ្រឹះនៃភាពទៀងទាត់ឱ្យមានស្មារតីហាត់ប្រាណបានប្រចាំថ្ងៃ ។ ការចំណាយពេលហាត់ប្រាណជាមួយមិត្ត និងសមាជិកគ្រួសារ ជាចំណែកជួយរក្សារយៈពេលនៃការហាត់ប្រាណបានយូរអង្វែង និងជំរុញឱ្យមានអារម្មណ៍ល្អៗចំពោះខ្លួនឯងតាមរយៈការបង្កើតទំនាក់ទំនងសង្គម ការស្គាល់ចំណូលចិត្តនៃប្រភេទលំហាត់ប្រាណរបស់មនុស្សម្នាក់ៗ។

២. មានវិធីក្នុងការបង្ហាញចេញនិងបន្តអនុវត្តន៍ ៖ សកម្មភាពធ្វើលំហាត់ប្រាណ និងផុសចេញមកជាបន្តបន្ទាប់ នៅពេលយើងមានគ្នានៅក្បែរកំឡុងពេលធ្វើលំហាត់ប្រាណ ដោយហេតុថា ការហាត់ប្រាណជាមួយនរណាម្នាក់ វាជំរុញឱ្យមនុស្សមានការប្រឹងប្រែង និងធ្វើបានល្អជាងមុន។ រៀងរាល់ពេលដែលយើងមានកម្លាំងជំរុញចិត្ត នោះយើងក៏នឹងពន្លឿនសេចក្ដីប្រឹងប្រែងជាខ្លាំងក្នុងការធ្វើអ្វីមួយ ហើយលទ្ធផលដែលមនុស្សទន្ទឹងចង់បានវាកាន់តែខិតមក ជិតទៅៗ។

៣. បណ្ដុះភាពរីករាយ និងបង្កលក្ខណៈចម្រុះ ៖ ការហាត់ប្រាណមានគ្នីគ្នាច្រើន បានបង្កនូវភាពរីករាយយ៉ាងសំបូរបែបជាមួយគ្នា លោកអ្នកអាចនឹងឃើញខ្លួនឯងមានសំណើច មានស្នាមញញឹម និងមានអនុស្សាវរីយ៍ល្អៗ កំឡុងពេលហាត់ប្រាណ ជាពិសេសជាមួយមនុស្សដែលអ្នកចូលចិត្តតែម្តង។ របាយការណ៍មួយក៏បានបង្ហាញដែរថា មនុស្សដែលមានឱកាសហាត់ប្រាណជាមួយមិត្តសំឡាញ់ ឬស្វាមីដៃគូរភរិយា ពួកគេតែងតែទទួលបាននូវអារម្មណ៍រីករាយ ជាងក្រុមមនុស្សដែលហាត់ប្រាណតែម្នាក់ឯង។ នៅពេលដែលមនុស្សកាន់តែរីករាយជាមួយនឹងខ្លួនឯង មនុស្សនឹងបន្តធ្វើសកម្មភាពទាំងនោះ កាន់តែមោះមុតច្រើនមួយអន្លើទៀត។ បន្ថែមពីនោះ វាក៏ជាកត្តាជំរុញឱ្យអ្នកហ៊ានសាកល្បងនូវសកម្មភាពថ្មីៗបន្ថែមរៀងរាល់ពេលដែលអ្នកបានស្គាល់មនុស្សថ្មីៗមកចូលរួមហាត់ជាមួយ។ ហើយអារម្មណ៍ដែលទទួលបានពីការសាកល្បងថ្មីៗទាំងនេះហើយ ជាចំណែកមួយ ជួយការពារលោកអ្នកឱ្យជៀសចាក មិនឱ្យមានអារម្មណ៍ស្មុគស្មាញ និងមិនបោះបង់ទម្លាប់នៃការហាត់ប្រាណចោល។

៤. ប៉ូវសុខភាពខួរក្បាល ៖ កាលដែលមានមនុស្សជាក្រុមៗមកធ្វើលំហាត់ប្រាណជាមួយ វាមានគុណតម្លៃលើសអំពីការគ្រាន់តែមកហាត់ប្រាណធម្មតាៗ វាប្រៀបបីដូចជាមានវគ្គមួយសម្រាប់ជួបជុំដើម្បីនិយាយគ្នាលេងដូច្នោះដែរ ជាពិសេសជាឱកាសក្នុងការភ្ជាប់ទំនាក់ទំនងជាមួយមនុស្សដែលមានវ័យប្រហាក់ប្រហែលគ្នា។

៥. មានសុវត្ថិភាព ៖ កាលដែលធ្វើលំហាត់ប្រាណម្នាក់ឯង គឺជាជម្រើសផ្ទាល់ខ្លួនមួយ ហើយកាលដែលមានមនុស្សម្នាបន្តគាំទ្រ បំពេញបន្ថែមរាល់ចំណុចខ្វះខាត ជាពិសេសនៅពេលដែលយើងត្រូវការបទពិសោធបន្ថែម ។ ហាត់ប្រាណជាក្រុមរឹងរឹតតែសំខាន់សម្រាប់អ្នកដែលចង់មានជំនាញ និងមានរបៀបហាត់ដែលជាក់លាក់ត្រឹមត្រូវមួយ ។ មិនតែប៉ុណ្ណោះ វាថែមទាំងធ្វើឱ្យអ្នកមានអារម្មណ៍ថាសុវត្ថិភាព ជាមួយនឹងសមាជិក រួមទាំងហ៊ានសាកល្បងសកម្មភាពជាច្រើននៅខាងក្រៅ ។ ជារួមឱ្យតែមានជាសកម្មភាពធ្វើឱ្យរាងកាយមានចលនា គឺសុទ្ធសឹងតែជាទម្លាប់ល្អ មិនថាអនុវត្តន៍ម្នាក់ឯង ឬក៏ជាមួយអ្នកដទៃនោះទេ ប៉ុន្តែបើអ្នកមានបញ្ហាប្រឈមក្នុងការរក្សាឱ្យមានភាពទៀងទាត់ នោះការទៅខាងក្រៅដើម្បីធ្វើលំហាត់ប្រាណវាជួយជំរុញឱ្យលោកអ្នក កាន់តែមានកម្លាំងចិត្ត រួមទាំងបង្កឱ្យបរិយាកាសសម្បូរដោយភាពរីករាយ៕