ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សិង្ហបុរី និងហុងកុង គឺជាប្រទេស ដែលមានអត្រាកុមារអានសៀវភៅច្រើនជាងគេលើពិភពលោក។ នេះបើយោងតាម Progress in International Reading Literacy Study (PIRLS) ដែលបោះពុម្ពផ្សាយជារៀងរាល់ ៥ឆ្នាំម្ដង។ រុស្ស៊ីនៅចំណាត់ថ្នាក់លេខ ៣ ខណៈអង់គ្លេសឡើងពីចំណាត់ថ្នាក់លេខ៨ មកលេខ៤ រីឯហ្វាំងឡង់ ស្ថិតនៅចំណាត់ថ្នាក់ទី ៥។
RLRLS បានតាមដាននិន្នាការនៃការអានជុំវិញពិភពលោក ចាប់តាំពីឆ្នាំ២០០១មកម្ល៉េះ។ យ៉ាងណាមិញរបាយការណ៍ ដែលត្រូវបោះពុម្ពផ្សាយនៅឆ្នាំ ២០២១ បានពន្យាពេលមកបោះពុម្ពនៅឆ្នាំ២០២៣នេះវិញ ដោយសារតែបញ្ហាវីរុសរាតត្បាតសកល។ ក្នុងរបាយការណ៍បានវាយតម្លៃសិស្ស ដែលមានអាយុចន្លោះពី ៩ ទៅ ១០ឆ្នាំ ប្រមាណ ៤០ម៉ឺននាក់មកពីជុំវិញពិភពលោក។ ជាលទ្ធផល សិស្សក្នុងប្រទេសសិង្ហបុរី ទទួលបានពិន្ទុ ៥៨៧ ខណៈហុងកុងទទួលបានពិន្ទុ ៥៧៣ បើប្រៀបធៀបទៅនឹងពិន្ទុមធ្យម ៥០០ ពិន្ទុ។ ក្នុងការសិក្សាបានបង្ហាញថា សិស្សនៅអាហ្វ្រិកខាងត្បូងទទួលបានពិន្ទុទាបជាងគេ គឺ ២៨៨ពិន្ទុ។
ជារួមលទ្ធផល បានបង្ហាញពីការរីកចម្រើននៅគ្រប់ប្រទេសទាំងអស់។ នៅក្នុងប្រទេសភាគច្រើន យ៉ាងហោចណាស់ សិស្សចំនួន ៨៥ភាគរយ អាចមានលទ្ធភាពអានអត្ថបទបាន។ លើសពីនេះ ប្រហែលមួយភាគបីនៃសិស្សក្នុងប្រទេស ភាគច្រើនអាចយល់អំពីអត្ថន័យនៃអត្ថបទក្រោយពេលអាន។
អ្វីដែលគួរឱ្យកត់សម្គាល់នោះ គឺក្នុងចំណោមប្រទេសដែលបានចូលរួមវាយតម្លៃពិន្ទុចំនួន ៥៧ប្រទេស គេបានរកឃើញថា ក្មេងស្រីទទួលបានពិន្ទុជាមធ្យមខ្ពស់ជាងក្មេងប្រុសចំនួន ១៩ពិន្ទុ។ ក្នុងរបាយការណ៍បានលើកឡើងថា «ក្មេងស្រីមានសមិទ្ធផលនៃការអានជាមធ្យមខ្ពស់ជាងក្មេងប្រុសស្ទើរតែគ្រប់ប្រទេស»។ យ៉ាងណាមិញ សមិទ្ធផលនៃការអានរវាងក្មេងប្រុស និងក្មេងស្រី មានភាពប្រហាក់ប្រហែលគ្នា នៅប្រទេស អេស្ប៉ាញ សាធារណរដ្ឋឆេក អ៊ីស្រាអែល ម៉ាលតា និងអ៊ីរ៉ង់។
តាមរយៈការសិក្សាបានបង្ហាញថា កុមារដែលចូលចិត្តអានសៀវភៅ មានលទ្ធផលនៃការសិក្សាល្អជាងកុមារដែលមិនចូលចិត្តអាន។ ទន្ទឹមនឹងនេះ ការគាំទ្រពីសំណាក់អាណាព្យាបាលនៅផ្ទះ គឺជារឿងសំខាន់បំផុតមួយ ដែលជួយឱ្យកុមារចូលចិត្តអានសៀវភៅ៕
