មនុស្សយើងម្នាក់ៗតែងតែជួបប្រទះនូវអារម្មណ៍ធុញថប់ ដោយ​មិន​អាចជៀសបាន ។ ការមានអារម្មណ៍ធុញថប់ធ្វើ​ឱ្យ​ជីវិតរបស់យើងជួបការលំបាកជាច្រើន ហើយតែងតែឆាប់មានអារម្មណ៍មួរម៉ៅ ស្រ្តេស និងឆាប់ខឹង ដែលវាអាចធ្វើ​ឱ្យ​ប៉ះពាល់ដល់ទំនាក់ទំនងជាមួយក្រុមគ្រួសារ មិត្តភ័ក្រ្ត ឬក្រុមការងារ។ ខាងក្រោមនេះ គឺជាវិធីចំនួន៥ ដើម្បីដោះស្រាយបញ្ហាទាំងនេះ។

១. ធ្វើ​ខ្លួន​ឱ្យ​ក្លាយជា​អ្នកជំនាញក្នុងការ​បន្ធូរអារម្មណ៍

យើងត្រូវដឹងពីបច្ចេកទេសដើម្បីបន្ធូរអារម្មណ៍របស់យើង ព្រោះជួនកាល ការលេងហ្គេម មើលទូរទស្សន៍ មិន​អាចជួយ​អ្នកបានទេ ដូចនេះ យើងអាចបន្ធូរអារម្មណ៍មានដូចជាការដកដង្ហើមវែងៗ ការហាត់ថៃជី ឬយូរហ្គា ដែលវិធីទាំងនេះអាចមានឥទ្ធិពល នៃរូបរាងកាយទៅលើផ្លូវចិត្ត។

២. សម្រាក ញ៉ាំអាហារបំប៉ន និងហាត់ប្រាណ

តើអ្នកចង់ឱ្យ​ផ្លូវចិត្ត និង​ខ្លួន​ប្រាណរបស់អ្នក​មានអារម្មណ៍សនិ្តភាព និង​មាំទាំបានគ្រប់គ្រាន់​ក្នុងការ​ទ្រទ្រង់នឹង​ភាពឡើងចុះ នៃជីវិតរបស់អ្នក ឬទេ? ចូរសម្រាក​ឱ្យ​បានត្រឹមត្រូវ​តាមដែលអ្នកត្រូវការ ដោយមិន​ច្រើនជ្រុលពេក ឬតិចពេកនោះទេ។ អ្នក​ក៏​គួរ​បរិភោគអាហារឱ្យ​បានល្អ ដោយធ្វើ​ការជ្រើសរើសផ្លែឈើ បន្លែជាតិប្រូតេអ៊ីន និង​គ្រាប់ធញ្ញជាតិ​សម្រាប់ការ​ទទួលបាននូវ​ថាមពល​ក្នុងពេល​ដ៏​យូរ (ជំនួសឱ្យការទទួលយកថាមពល ក្នុងរយៈពេល​ខ្លី​ដែលបាន​មក​ពីជាតិស្ករ ឬកាហ្វេអ៊ីនច្រើនជ្រុល) ។ រួចអ្នកត្រូវធ្វើលំហាត់ប្រាណ ដើម្បីបញ្ជូនអុកស៊ីសែន​ទៅកាន់គ្រប់កោសិកានៅក្នុងរាងកាយ ដូច្នេះខួរក្បាល និង​ខ្លួន​ប្រាណរបស់អ្នក​អាចដំណើរការបានយ៉ាងល្អបំផុត។

៣. រក្សាទំនាក់ទំនងជាមួយ​នឹងអ្នកដទៃ

ត្រូវមានទំនាក់ទំនង ដោយ​ការ​ចេញដើរលេងជាមួយមិត្តភ័ក្រ្ត ក្រុមគ្រួសារ ដើម្បីលំហែអារម្មណ៍ឱ្យ​រីករាយ​ ដែលវិធីនេះអាចជួយ​យើង​ឱ្យ​រីករាយ​រួចផុតពីការខ្វល់ខ្វាយ ជាពិសេស​អារម្មណ៍ធុញថប់ និង​ស្រ្តេស។

៤. ផ្សាភ្ជាប់ខ្លួន​ទៅនឹងធម្មជាតិ

ការដើរកំសាន្ត​ក្នុង​សួនច្បារ ឬការដើរលេងតាមព្រៃភ្នំ អាចជួយអ្នក​រាល់គ្នា​ឱ្យ​មានអារម្មណ៍ថា មានសេចក្តីសុខ និង​ស្រស់ថ្លាក្នុងអារម្មណ៍។ ជ្រើសរើស​កន្លែង​ដែលអ្នក​មានអារម្មណ៍ថា មានសុវត្ថិភាព ដូច្នេះ​អ្នក​អាចសម្រាក និង​រីករាយ​ជាមួយ​នឹង​មជ្ឈដ្ឋាន​ជុំវិញ​ខ្លួនអ្នក​។ ការ​ដើរកំសាន្ត ដើរឆ្លង​កាត់ព្រៃភ្នំ ជិះកង់ នឹងផ្តល់​ឱ្យ​អ្នក​នូវ​ផលប្រយោជន៍បន្ថែមទៀត នៃការ​ធ្វើលំហាត់ប្រាណ។ អ្នក​អាចបបួលមិត្តភក្តិ​ម្នាក់ ឬពីរនាក់ទៅជាមួយ​អ្នក និង​រីករាយជាមួយ​អារម្មណ៍ផ្សារភ្ជាប់នឹងអ្នកដទៃ​ផងដែរ។

៥. គិតក្នុងផ្លូវវិជ្ជមាន

វិធីដ៏ពិសេសក្នុងការរក្សាផ្លូវចិត្តយើង​ឱ្យ​ចាកឆ្ងាយពីក្តីព្រួយបារម្ភ គឺការផ្តោតគំនិតរបស់យើងទៅ​លើ​រឿងដែលល្អស្រស់ស្អាត និង​វិជ្ជមាន។ សូមអនុញ្ញាតឱ្យខ្លួនអ្នក​មានក្តីសុបិន ការប៉ងប្រាថ្នា និង​ភាពស្រមើស្រមៃនូវភាពដ៏ល្អបំផុត​ដែលអាចកើតមាន៕