យោងតាមការចុះផ្សាយ​របស់ betterhealth បានបង្ហាញថា ការមានទម្លាប់ជិះកង់ឱ្យបានញឹកញាប់ គឺជាវិធីសាស្រ្តមួយ អាចកាត់បន្ថយការប្រឈមនៃបញ្ហាសុខភាពនានា ជំរុញសុខភាពល្អ បង្កើនបាននូវ​ភាពទាន់សម័យ ឬក៏ផាសុកភាពក្នុងការរស់នៅប្រចាំថ្ងៃ។ «ជិះកង់គឺជាសុខភាព» ថែមទាំងអាចអនុវត្តន៍បានសម្រាប់មនុស្សគ្រប់វ័យទៀតផង ដោយគិចចាប់តាំងពីកុមារភាព រហូតដល់យុវវ័យ ឬមនុស្សចាស់។ ហើយវាក៏ផ្តល់នូវភាពរីករាយ ការចំណាយក៏តិច និងល្អសម្រាប់បរិស្ថានទាំងមូលផងដែរ។

គ្រាន់តែចំណាយពេលត្រឹមតែ ពីរទៅបួនម៉ោង ក្នុងមួយអាទិត្យ ដើម្បីសាកល្បងសម្រេចបាននូវលទ្ធផលជាវិជ្ជមាន វាអាចនឹងទទួលបានអត្ថប្រយោជន៍ច្រើនជាងផលប៉ះពាល់ ព្រោះជាធម្មតា អ្វីក៏ដោយ តែងតែមានផលវិជ្ជមាននិងអវិជ្ជមាន តួយ៉ាងការជិះកង់ក៏អាចបង្កឱ្យមានរបួសស្នាមខ្លះៗដែរ ប៉ុន្តែមិនទាំងស្រុងនោះទេ គឺអាស្រ័យលើការប្រុងប្រយ័ត្ន។ និយាយអំពីអត្ថប្រយោជន៍វិញ ការជិះកង់ អាចជួយឱ្យមានការកម្តៅសាច់ដុំ ព្រោះកំឡុងពេលជិះ តម្រូវឱ្យលោកអ្នក ប្រើប្រាស់សាច់ដុំទាំងអស់ យកទៅធាក់ឈ្នាន់ដើម្បីឱ្យកង់ទៅមុខបាន។ បន្ថែមពីនោះកីឡាជិះកង់ ផ្តល់នូវភាពងាយស្រួល ខុសពីកីឡាដទៃ ព្រោះការជិះកង់មិនតម្រូវឱ្យមានជំនាញរឹងមាំខ្លាំងខាងផ្នែករាងកាយ ហើយមនុស្សជាច្រើនស្គាល់អំពីរបៀបនៃការជិះកង់ ព្រោះនៅពេលដែលលោកអ្នកអាចរៀនចេះហើយ ទោះជាលើកដំបូង ក៏អាចចងចាំពីរបៀបជិះកង់បានជារៀងរហូត។

បន្ថែមពីនោះ ការជិះកង់ វាល្អដើម្បីពង្រឹងដល់ភាពអត់ធ្មត់ កាយសម្បទារឹងមាំ ហើយជាសកម្មភាពមួយដែលមានលក្ខណៈសប្បាយៗតាមរយៈការជិះកង់ទៅកន្លែងឆ្ងាយៗ ជិះជាក្រុម និងទៅកន្លែងមានបរិយាកាសខុសប្លែកពីកន្លែងដែលខ្លួនស្នាក់នៅជាដើម ដែលវាផ្ទុះពីកីឡាមួយចំនួន តម្រូវឱ្យនៅតែមួយកន្លែង។ ការជិះកង់ ប្រៀបបាននឹងការចំណាយពេលដ៏មានប្រសិទ្ធភាពមួយ បើសិនជាយើងប្រើប្រាស់វាជាយាន្តជំនិះពេលទៅធ្វើការ គឺអាចកាត់បន្ថយការចំណាយថវិកាផ្ទាល់ខ្លួនបានមួយកម្រិតទៀត។ ហើយបើមនុស្សភាគច្រើនបានអនុវត្តន៍បែបនេះ នោះឡានក្រុង ឬរថយន្តប្រើប្រាស់ប្រេងដែលបញ្ចេញជាតិគីមី(ឧស្ម័នផ្សែងពុល) នឹងត្រូវបានកាត់បន្ថយដូចគ្នា ដែល​នេះក៏​សរបញ្ជាក់ឱ្យឃើញថា ការជិះកង់គឺជាចំណែកមួយ ជួយដល់បរិស្ថាន។

ក្នុងករណីដែលមានឱកាសជិះកង់បានទៀងទាត់ប្រចាំថ្ងៃ នោះវានឹងជួយបង្កើននូវចង្វាក់ ឬសម្ពាធបេះដូងឱ្យ​មានដំណើរការស្របនឹងសុខភាពល្អ, សាច់ដុំរឹងមាំ រាងកាយបត់បែននិងស្វាហាប់ កាត់បន្ថយបញ្ហាស្រ្តេស គ្រប់គ្រងឥរិយាបថបានល្អ ធ្វើឱ្យឆ្អឹងរឹងមាំ កាត់បន្ថយបញ្ហាលើសទម្ងន់ ការពារពីជំងឺនានា និងកាត់បន្ថយភាពតានតឹងនិងការបាក់ទឹកចិត្ត។ ជារួម ការជិះកង់ អាចជួយអភិវឌ្ឍន៍ទាំងសុខភាពផ្លូវកាយ និងផ្លូវចិត្ត ថែមទាំងអាចជៀសវាងអំពីបញ្ហាសុខភាពជាច្រើនទៀត៕