លោក ពុយ គា ដែល​គេ​ដឹងថា ជាអ្នក​ដែល​មានបទពិសោធន៍ចាស់វស្សាផ្នែកសារព័ត៌មាន និងថែមទាំងបានសរសេរ និង​រៀបរៀងសៀវភៅជាច្រើនក្បាល​ដូចជា ចម្បាំងត្រជាក់រវាងអាមេរិក និងចិន, មហាយក្សចិន, ប្រវត្តិសាស្រ្តកម្ពុជា និង​សៀវភៅ អាថ៌កំបាំងក្រៅឆាក ជាដើម បានមានប្រសាសន៍ថា នៅក្នុងបរិបទសង្គមសព្វថ្ងៃហាក់មានការភ័ន្តច្រឡំជាច្រើន រវាងអ្នកសរសេរសៀវភៅ ឬនិពន្ធសៀវភៅ។ បើតាម​លោក ពុយ គា ការសរសេរសៀវភៅមានច្រើនទម្រង់ដូចជា អ្នកនិពន្ធ អ្នកចងក្រង អ្នករៀបរៀង និងអ្នកបោះពុម្ភ ហេតុដូច្នេះហើយមិនមែនឱ្យតែអ្នកសរសេរសៀវភៅ គឺសុទ្ធតែជាអ្នកនិពន្ធនោះទេ។

ក្នុងនោះលោក ពុយ គា បានរំលេចនូវ​ទម្រង់នៃការ​សរសេរ​សៀវភៅទាំង៤នោះ ដូចជា ៖

១. អ្នកនិពន្ធសៀវភៅ ៖ ដែលអាចឱ្យរហ័សនាមថាជាអ្នកនិពន្ធសៀវភៅបាន ទាល់តែអ្នកសរសេរនោះមានការស្រាវជ្រាវ ឬបានជួបនឹងស្ថានភាព សកម្មភាពផ្ទាល់ បន្ទាប់មកសរសេររំលេចជាខ្លឹមសារចេញមក។ មួយវិញទៀត ដែលអាចកំណត់ថា ជាអ្នកនិពន្ធ គឺមានន័យថា ជាការសរសេរបញ្ចូលអត្ថន័យថ្មីៗ ប្លែកៗ ដែលមិនធ្លាប់មានពីមុនមក។ ជារួមមានន័យថា អ្នកនិពន្ធសៀវភៅ គឺជាស្មេរបង្ហាញនូវ​រូបភាពអត្ថន័យថ្មីៗ។

២. អ្នកចងក្រងសៀវភៅ ៖ អ្នកចងក្រងសៀវភៅមានភាពខុសប្លែកពីអ្នកនិពន្ធសៀវភៅត្រង់ថា មិនចាំបាច់រិះរកន័យថ្មីៗនោះទេ ប៉ុន្តែអាចចម្លងខ្លឹមសារពីមជ្ឈដ្ឋានផ្សេងៗ ឬការបកប្រែពីភាសា មួយទៅភាសាមួយ ដើម្បីយកមកធ្វើជាសៀវភៅបាន ដោយគ្រាន់តែបញ្ជាក់នូវ​ប្រភពដើម។ នៅចំណុចនេះដែល លោក ពុយ គា សង្កេតឃើញថា បច្ចុប្បន្ននេះ អ្នកចងក្រងសៀវភៅមានបរិមាណច្រើន ហើយក៏មានពេលខ្លះគេយល់ច្រឡំថា អ្នកចងក្រងជាអ្នកនិពន្ធទៀតផង។

៣. អ្នករៀបរៀងសៀវភៅ ៖ ចំពោះអ្នករៀបរៀងសៀវភៅ គឺជាអ្នករចនាបទស្នាដៃចាស់ៗ ឱ្យមានសោភ័ណភាពល្អជាងមុនតាមរយៈការសរសេរ រៀបរៀង ជារូបរាងសៀវភៅ ឬក៏អត្ថបទដែលមិនបានប្រមូលផ្តុំឱ្យមានន័យរួម នោះក៏គេអាចរៀបវាឱ្យទៅជាសៀវភៅបានដែរ វាប្រៀបដូចជាការកែរបស់ចាស់ៗ ឱ្យមានភាពទាក់ទាញជាងមុន និងងាយស្រួលស្វែងរកជាងមុន។ លោក ពុយ គា បានលើកឧទារហរណ៍តាមរយៈករណីជាក់ស្តែងរបស់លោកថា កន្លងមក លោក ក៏បានរៀបរៀងសៀវភៅមួយក្បាលមានចំណងជើងថា ( បណ្តាំក្រមង៉ុយ) ដើម្បីបង្ហាញឱ្យឃើញថា លោកបានបែកចែកប្រភេទទម្រង់នៃសៀវភៅនីមួយៗ។

៤. អ្នកបោះពុម្ពសៀវភៅ ៖ ចំណែកអ្នកបោះពុម្ពសៀវភៅវិញ គឺមិនចាំបាច់ជាអ្នកសរសេរដោយផ្ទាល់នោះទេ ប៉ុន្តែមានតួនាទីក្នុងការបោះពុម្ពឱ្យលេចចេញជារូបរាងសៀវភៅ។ លោកក៏បានលើកបទពិសោធន៍ជាក់ស្តែងមកបង្ហាញ ដោយកន្លងមកលោកបានបោះពុម្ភសៀវភៅមួយក្បាលមានចំណងជើងថា «មហាយក្សចិន» ដោយខ្លឹមសារទាំងស្រុងក្នុងសៀវភៅនោះ ត្រូវបានសរសេរដោយ លោក ហ្សង់ ហ្រង់ស័រតាន់ ប៉ុន្តែរូបលោកមានតួនាទីធ្វើយ៉ាងណាឱ្យសៀវភៅនោះបានបោះពុម្ពផ្សាយ៕