ទីភ្នាក់ងារជាតិមុខរបរ និងការងារ (NEA) និងក្រុមហ៊ុន Westline Education Group (WEG) បានសហការរៀបចំកម្មវិធីប្រកួត​និយាយសាធារណៈសម្រាប់សិស្សវិទ្យាល័យ ក្រោម​មូលបទ “ផលិតភាពជាតិការងារ ដើម្បីអនាគតកម្ពុជា” ដើម្បីបញ្រ្ជាបគំនិតអំពី “ផលិតភាពការងារ” ដល់យុវជនដែលជាកម្លាំងពលកម្មត្រៀមចូលទីផ្សារការងារនាពេលខាងមុខ។

លោកជំទាវ អ៊ូច ជាច័ន្ទមល្លិកា ប្រធានទីភ្នាក់ងារជាតិមុខរបរ និងការងារ នៃក្រសួងការងារនិងបណ្តុះបណ្តាលវិជ្ជាជីវៈ មានប្រសាសន៍ថា ការរៀបចំកម្មវិធីនេះឡើង គឺដោយសារតែ​មើលឃើញថា ផលិតភាពការងារកាន់តែមានសារៈសំខាន់ នៅ​ស្ទើរ​គ្រប់វិស័យ ទាំងក្នុងវិស័យ​ឯកជន រោងចក្រ​សហគ្រាស ក៏​ដូចជា​នៅ​ក្នុងក្រុមហ៊ុន។ លោកជំទាវបន្តថា ការបញ្រ្ជាបពាក្យ “ផលិតភាពការងារ” នេះម្តងបន្តិចៗ ចាប់ពីសិស្សវិទ្យាល័យ នឹងជួយរួមចំណែកធ្វើ​ឱ្យ​ប្រទេស​កម្ពុជា​មាន​នូវកម្លាំងពលកម្ម ដែលមានផលិតភាពខ្ពស់។

លោកជំទាវទទួលស្គាល់ថា គំនិតនេះ “ស៊ីជម្រៅបន្តិចសម្រាប់ប្អូនៗដែលនៅកម្រិតវ័យថ្នាក់វិទ្យាល័យ” ប៉ុន្តែយើង គួរតែចាប់ផ្តើមគិតអំពីផលិតភាពការងារចាប់ពីវ័យកំពុងសិក្សានេះទៅ ដើម្បីឱ្យយុវជនបានដឹងថា តើអ្វីទៅជាផលិតភាពការងារ ហើយ​មាន​កត្តាអ្វីខ្លះដែលជំរុញផលិតភាព និងរបៀបត្រៀមខ្លួននៅពេលចូលទីផ្សារការងារនាពេលអនាគត។

“ពាក្យផលិតភាពការងារជាពាក្យសាមញ្ញ ប៉ុន្តែបើយើងគិតឱ្យជ្រៅ វាមានកត្តាពាក់ព័ន្ធច្រើន មានទាំងកត្តាជំនាញ កត្តាបច្ចេកវិទ្យា ឬកត្តាផ្សេងៗដែលជំរុញឱ្យបុគ្គលម្នាក់ៗធ្វើយ៉ាងម៉េចដើម្បីឱ្យមានផលិតភាព”

លោកឧកញ៉ាបណ្ឌិត ប៉ិច បូឡែន អគ្គនាយកក្រុមហ៊ុន វេសឡាញ អេឌ្យូខេសិន គ្រុប បានសម្តែងការគាំទ្រចំពោះគំនិតផ្តួចផ្តើមនេះ។ លោកឧកញ៉ាមានប្រសាសន៍ថា ផលិតភាព​ជាអ្វីដែលយើងគ្រប់គ្នាត្រូវស្រាវជ្រាវគិត ជាពិសេស​ក្មួយៗ ព្រោះអនាគត​របស់កម្ពុជាទៅមុខ គឺពឹងទៅលើក្មួយៗ​គ្រប់គ្នា។

លោកឧកញ៉ាសង្កត់ធ្ងន់ថា ពីមុន​យើងគ្រប់គ្នា​តែងគិតថា ខំរៀន​ឱ្យ​មានចំណេះ មានជំនាញ ប៉ុន្តែបច្ចុប្បន្ន​គ្រាន់តែមាន​ចំណេះ មានតែជំនាញ គឺវាមិនទាន់គ្រប់គ្រាន់នោះទេ។ បើតាមលោកឧកញ៉ាបណ្ឌិត ប៉ិច បូឡែន ​មូលបទពី “ផលិតភាពជាតិការងារ” អាចនឹងធ្ងន់បន្តិចសម្រាប់ក្មួយៗ ប៉ុន្តែ​ដើម្បី​ជួយ​អភិវឌ្ឍសង្គម​សេដ្ឋកិច្ច​របស់យើង​ដើរឱ្យ​ខ្លាំង មានប្រៀបជាង​បណ្តា​ប្រទេស​ជិតខាងមួយ​ចំនួន យើង​ត្រូវយល់ពីពាក្យ​ផលិតភាពគឺជាអ្វី ហើយ​ត្រូវ​ត្រៀមខ្លួន​យ៉ាង​ដូចម្តេចដើម្បីលើក​កម្ពស់ផលិតភាពរបស់យើង។

សូមជំរាបជូនថា កម្មវិធីប្រកួតនិយាយសាធារណៈសម្រាប់សិស្សវិទ្យាល័យ ត្រូវ​រៀបចំឡើងក្រោមកិច្ចសហការជាមួយ ទីភ្នាក់ងារជាតិមុខរបរ (NEA) សមាគមវាយនភ័ណ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) សហព័ន្ធនិយោជកនិងសមាគមពាណិជ្ជកម្មកម្ពុជា CAMFEBA វិទ្យាស្ថានបណ្តុះបណ្តាលវិស័យកាត់ដេរនៅកម្ពុជា(CGTI) និងអង្គការ PSE បណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប។ កម្មវិធីនេះមានគោលបំណងដើម្បីលើកទឹកចិត្តឱ្យសិស្សានុសិស្ស​ឱ្យ​មានភាពក្លាហានក្នុងចូលរួម​បង្ហាញទស្សនៈផ្ទាល់ខ្លួន និងបង្កើតស្មារតីរួមអំពីតួនាទីផលិតភាពក្នុងការកសាងអនាគតប្រទេស។ តាមរយៈការចូលរួមក្នុងកម្មវិធីនេះ សិស្សានុសិស្សនឹងទទួលបានមិនត្រឹមតែការយល់ដឹងកាន់តែច្បាស់អំពីផលិតភាពការងារប៉ុណ្ណោះទេ ប៉ុន្តែថែមទាំងបង្កើននូវទំនុកចិត្តផ្ទាល់ខ្លួន គំនឹតជាអ្នកដឹកនាំ ការគិតគូរស៊ីជម្រៅ (Critical Thinking) និងស្មារតីទទួលខុសត្រូវជាពលរដ្ឋសកម្ម ដែល​ផ្តល់អត្ថប្រយោជន៍ដល់ទាំងការសិក្សា និងអាជីពរបស់ពួកគេក្នុងអនាគត៕