ក្រសួងអប់រំ យុវជន និងកីឡា កាលពីពេលថ្មីៗនេះ បានជូនដំណឹង​ដល់​លោកគ្រូ​ អ្នក​គ្រូ ដែល​កំពុង​បង្រៀន​នៅ​តាម​សាលារៀន​បឋមសិក្សា មធ្យមសិក្សា ឬសាលា​គរុកោសល្យ​នៅទូទាំង​ប្រទេសថា សម្រាប់ឆ្នាំ​២០២៥នេះ កម្មវិធីអាហារូបករណ៍ Teacher Training Students របស់ក្រសួងអប់រំ វប្បធម៌ កីឡា វិទ្យាសាស្រ្ត និង​បច្ចេកវិទ្យា នៃ​ប្រទេស​ជប៉ុន នឹងផ្តល់អាហារូបករណ៍មួយ​ចំនួន​ដល់គ្រូបង្រៀន​កម្ពុជា ដើម្បីទៅ​សិក្សា​ស្រាវជ្រាវ​លើវិស័យ​អប់រំនៅ​ប្រទេស​ជប៉ុន ចាប់ពីខែកញ្ញា ឬតុលា ឆ្នាំ២០២៥។

អ្នកដែលជាប់អាហារូបករណ៍​នេះ នឹងទទួល​បានប្រាក់​អាហារូបករណ៍​សម្រាប់​ផ្គត់ផ្គង់​ការ​រស់នៅ រ៉ាប់រង​ថ្លៃសេវាសុខភាព ការ​ស្នាក់នៅ និងថ្លៃសំបុត្រ​យន្ត​ហោះ​ទៅមក កម្ពុជា ជប៉ុន កម្ពុជា។

មុខវិជ្ជាដែលត្រូវ​សិក្សា​ស្រាវជ្រាវ រួមមាន ៖ Educational administration and finance school Management, Educational methods (Instruction, learning system theory, curriculum, educational assessment), Specialized subject research (Mathematics, Physics, Chemistry, Gymnastics), Observational Tours and practice (Class observation, participation in special educatiional activities, tour of educational research facilities)។

លក្ខខណ្ឌ នៃការ​ចុះឈ្មោះ ៖ មានសញ្ជាតិខ្មែរ, បាន​បញ្ចប់​ការ​សិក្សា​ពី​សាលា​គរុកោសល្យ​ណាមួយ និង​កំពុង​បង្រៀន​នៅ​តាម​សាលា​រៀន​បឋមសិក្សា សាលា​រៀនមធ្យមសិក្សា ឬ​សាលា​គរុកោសល្យ​នានា​នៅ​កម្ពុជា ដែល​មាន​រយៈពេល​បំពេញ​ការងារ​យ៉ាង​តិច៥ឆ្នាំ គិត​ដល់ថ្ងៃទី១ ខែតុលា ឆ្នាំ២០២៥, មានអាយុ​មិនលើសពី ៣៥ឆ្នាំ (កើតត្រឹម ឬក្រោយថ្ងៃទី២ ខែមេសា ឆ្នាំ១៩៩០), មានចំណេះដឹងភាសាអង់គ្លេស​កម្រិតមធ្យម និង​មានឆន្ទៈ​សិក្សា​ភាសាជប៉ុន, មានសុខភាពល្អ​បរិបូរណ៌ ទាំងកាយសម្បទា និង​សតិបញ្ញា។

កាលបរិច្ឆេទ និង​ទីកន្លែងទទួលពាក្យ ៖ បេក្ខជន​ដែល​មាន​ចំណាប់អារម្មណ៍​ចំពោះ​កម្មវិធីអាហារូបករណ៍នេះ សូមទាញ​យកពាក្យ​ស្នើ​សុំ​អាហារូបករណ៍​ជាភាសាអង់គ្លេស​ពី https://www.studyinjapan.go.jp/en/smap-stopj-applications-teacher.html ក្នុងគេហទំព័រ​របស់ស្ថានទូតជប៉ុនប្រចាំ​ព្រះរាជាណាចក្រ​កម្ពុជា និង​ពាក្យ​សុំ​ប្រឡង​អាហារូបករណ៍​ជាភាសាខ្មែរ មក​បំពេញ​ដោយ​ចាំបាច់​ត្រូវ​ភ្ជាប់​មក​ជាមួយ​ព្រឹត្តិបត្រ​ពិន្ទុ​ពីសាលា​គរុកោសល្យណាមួយ ដែលបេក្ខជន​បានសិក្សា (មជ្ឈមណ្ឌលគរុកោសល្យភូមិភាគ សាលា​គរុកោសល្យ និង​វិក្រឹតការខេត្ត​ជាដើម) រួច​យកទៅ​ដាក់នៅ​នាយកដ្ឋាន​សហប្រតិបត្តិការ​អន្តរជាតិ និង​កិច្ច​ការ​អាស៊ាន ដែលមានអាស៧ដ្ឋានអគារលេខ២៣ ផ្លូវលេខ ៣៦០ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ ឱ្យបានមុនថ្ងៃទី១៧ ខែមករា ឆ្នាំ២០២៥ វេលាម៉ោង៤រសៀល។

សម្រាប់ព័ត៌មានបន្ថែម​ពីកម្មវិធីអាហារូបករណ៍ បេក្ខជន​អាច​ទាក់ទង​សាកសួរ​តាម​ទូរស័ព្ទលេខ ០៩៨ ៩៨៩ ៧៨៩ ឬទាក់ទង​នាយកដ្ឋានសហប្រតិបត្តិការ​អន្តរជាតិ និង​កិច្ចការ​អាស៊ាន​៕