ក្រសួងប្រៃសណីយ៍ និងទូរគមនាគមន៍ បានរកឃើញ ម្ចាស់ជ័យលាភីឆ្នើមចំនួន៣រូប ទទួលបានជ័យលាភីក្នុងការប្រកួតប្រជែងសរសេរសំបុត្រថ្នាក់ជាតិលើកទី៣ ឆ្នាំ២០២៤ ក្រោយការវាយតម្លៃយ៉ាងសុក្រឹតពីគណៈកម្មការប្រកួត។

សម្រាប់បេក្ខជនជ័យលាភីលេខ១ បានទៅលើ យុវតី ទ្រី វួចឆេង មកពីសាលាអន្តរជាតិ CIA First , ជ័យលាភីលេខ២ បានទៅលើ យុវតី ប្រាក់ឆន សិទ្ធិការ្យ មកពីសាលា KCE , ជ័យលាភីលេខ៣ បានទៅលើ យុវជន អៀម វីនឈីវ មកពីសាលាអន្តរជាតិ CIA First។

សំណេររបស់បេក្ខជនជ័យលាភីលេខ១ គណៈកម្មការបានជ្រើសរើសជាតំណាងរបស់កម្ពុជា និងបានផ្ញើទៅចូលរួមប្រកួតប្រជែងកម្រិតអន្តរជាតិដែលរៀបចំដោយសហភាពប្រៃសណីយ៍សកល (Universal Postal Union) ដែលមានការចូលរួមប្រកួតប្រជែងពីបណ្ដាប្រទេសចំនួន ១៩២ នៅលើពិភពលោក ហើយលទ្ធផលនៃការប្រកួតនឹងត្រូវប្រកាសនៅក្នុង ខែតុលា ឆ្នាំ២០២៤ ខាងមុខ។

ឯកឧត្តម ឯក វណ្ណឌី រដ្ឋលេខាធិការក្រសួងប្រៃសណីយ៍និងទូរគមនាគមន៍ បានកោតសរសើរ និងវាយតម្លៃខ្ពស់ ហើយបានលើកទឹកចិត្តដល់ក្មួយៗជ័យលាភីទាំងអស់ត្រូវខិតខំព្យាយាមរៀនសូត្របន្ថែមទៀត ដើម្បីឱ្យក្លាយជាសិស្សល្អ មិត្តល្អ កូនល្អ និងពលរដ្ឋល្អ ដែលជាទំពាំងស្នងឬស្សីនាពេលអនាគត។

ឯកឧត្តម បន្ថែមថា ឆ្នាំ២០២៤នេះ គឺជាលើកទី៣ ដែលក្រសួងប្រៃសណីយ៍ និងទូរគមនាគមន៍ បានរៀបចំកម្មវិធីប្រកួតប្រជែង សរសេរ សំបុត្រថ្នាក់ជាតិនេះ ។ ឯកឧត្តម បន្តថា វិស័យប្រៃសណីយ៍ ជាវិស័យមានសក្តានុពលរួមចំណែកដល់ការទ្រទ្រង់កំណើនសេដ្ឋកិច្ចជាតិ និងការលើកកម្ពស់ជីវភាពប្រចាំថ្ងៃរបស់ប្រជាជនទូទាំងពិភពលោកដោយបានផ្សារភ្ជាប់រវាងទីក្រុង និងជនបទ តាមរយៈការអភិវឌ្ឍបណ្តាញសេវាប្រៃសណីយ៍ ។ ការអភិវឌ្ឍវិស័យនេះ ប្រកបដោយចីរភាព និងគ្របដណ្តប់ជាសកល គឺជាប្រធានបទមួយ ដែលក្រសួងបានផ្តោតការយកចិត្តទុកដាក់ មិនត្រឹមតែក្នុងប្រទេសប៉ុណ្ណោះទេ ថែមទាំងក្នុងក្របខ័ណ្ឌ តំបន់ និងអន្តរជាតិ។

គួរជម្រាបជូនថា ការប្រកួតប្រជែងសរសេរសំបុត្រថ្នាក់ជាតិ រៀបចំឡើងក្នុងគោលបំណងលើកកម្ពស់សមត្ថភាពគំនិតច្នៃប្រឌិតសិស្សានុសិស្សលើការស្រាវជ្រាវ ទេពកោសល្យក្នុងការសរសេរ ការវិភាគលើបញ្ហា ការដោះស្រាយបញ្ហា និងស្វែងរកដំណោះស្រាយ ព្រមទាំងអាចស្វែងយល់ពីការប្រើប្រាស់សេវាបញ្ញើប្រៃសណីយ៍។ ក្នុងនោះជ័យលាភីលេខ១ ទទួលបានមេដាយចំនួន១ សៀវភៅតែមប្រិ៍ចំនួន១ វិញ្ញាបនបត្រចំនួន១ កាបូប១ ថវិកាចំនួន ៣លានរៀល, ជ័យលាភីលេខ២ ទទួលបាន មេដាយចំនួន១ សៀវភៅតែមប្រិ៍ចំនួន១ វិញ្ញាបនបត្រចំនួន១ កាបូប១ ថវិកាចំនួន ២លាន រៀល, ជ័យលាភីលេខ៣ ទទួលបាន មេដាយចំនួន១ សៀវភៅតែមប្រិ៍ចំនួន១ វិញ្ញាបនបត្រចំនួន១ កាបូប១ ថវិកាចំនួន ១លានរៀល។ ក្នុងនោះ ជ័យលាភីលេខ៤ ដល់ លេខ១០ ទទួលបានវិញ្ញាបនបត្រ១ កាបូប១ ថវិកាចំនួន ៤សែនរៀល៕