ទីបំផុតទៅនាយកដ្ឋានអភិវឌ្ឍកម្មវិធីយុវជន នៃក្រសួងអប់រំ យុវជន និងកីឡា បានរកឃើញបេក្ខជន៣ក្រុម មកពីសាកលវិទ្យាល័យផ្សេងគ្នាជាប់ជ័យលាភីឆ្នើមក្នុងកម្មវិធីយុវជនអ៊ីជិន (E-Gen) ដែល​ជាកម្មវិធីប្រកួតប្រជែងក្នុង​ការ​អភិវឌ្ឍគំនិតច្នៃប្រឌិត បង្កើតថ្មី និង​សហគ្រិនភាព​ក្នុងវិស័យឌីជីថល។

បេក្ខជន៣ក្រុម ដែលបានជាប់ជ័យលាភីឆ្លើមក្នុងកម្មវិធីយុវជនអ៊ីជិន (E-Gen) រួមមាន ជ័យលាភីលេខ១ បានទៅលើក្រុមបេក្ខជនមកពីសាកលវិទ្យាល័យភូមិន្ទភ្នំពេញ, ជ័យលាភីលេខ២ បានទៅលើក្រុមបេក្ខជនមកពីសាកលវិទ្យាល័យខេមតិច និងជ័យលាភីលេខ៣ បានទៅលើក្រុមបេក្ខជនមកពីសាកលវិទ្យាល័យជាតិគ្រប់គ្រង។

ក្នុងពិធីប្រកាសជ័យលាភី កម្មវិធីយុវជនអ៊ីជិន (E-Gen) ឯកឧត្តម វង ភិរុណ អនុរដ្ឋលេខាធិការ នៃក្រសួងអប់រំ យុវជន និងកីឡា បានមានប្រសាសន៍ថា គម្រោងដែលក្មួយៗបានបង្កើតឡើងសុទ្ធតែមានផលជះវិជ្ជមានដល់សហគមន៍ ជាពិសេសជួយបង្កើនប្រសិទ្ធភាពការងារ កាត់បន្ថយហានិភ័យ និងអាចពង្រីកមុខរបរបន្ថែមទៀតបាន។

ឯកឧត្តម វង ភិរុណ បន្ថែមថា ក្នុងយុគ្គសម័យបច្ចេកវិទ្យានេះ កម្មវិធីយុវជនអ៊ីជិន (E-Gen) បានចូលរួមចំណែកយ៉ាងសកម្មក្នុងការអភិវឌ្ឍមូលធនឌីជីថលសម្រាប់ព្រះរាជាណាចក្រកម្ពុជា។ ឯកឧត្តម វង ភិរុណ ក៏បានលើកទឹកចិត្តក្មួយៗបន្តពង្រឹងសមត្ថភាព និងអភិវឌ្ឍគម្រោងនេះបន្តទៀត ដើម្បីអាចយកទៅប្រើប្រាស់ជាប្រយោជន៍ដល់សហគមន៍។

គួរ​ជំរាបជូនថា កម្មវិធីយុវជនអ៊ីជិន (E-Gen) ចាប់ផ្តើមតាំងពីខែឧសភា ឆ្នាំ២០២៤ ដោយមានវគ្គសំខាន់ៗចំនួន៣បន្តបន្ទាប់គ្នាសម្រាប់បំប៉នសមត្ថភាព និងអភិវឌ្ឍបំណិនដល់យុវជន តាមរយៈវគ្គសិក្ខាសាលាបំប៉នសមត្ថភាព ការសិក្សាស្រាវជ្រាវពីបញ្ហារបស់សហគមន៍ ការចុះសង្កេតផ្ទាល់ដល់សហគមន៍ និងការបង្កើតដំណោះស្រាយប្រកបដោយនវានុវត្តន៍ដោយប្រើបច្ចេកវិទ្យា IoT, Machine Learning, និងបច្ចេកវិទ្យាបញ្ញាសិប្បនិម្មិត ព្រមទាំងឆ្លងកាត់ការវាយតម្លៃយ៉ាងល្អិតល្អន់ពីសាស្ត្រាចារ្យវាយតម្លៃចំនួន៥រូប។

កម្មវិធី «យុវជនអ៊ីជិន (E-Gen)» ជាកម្មវិធីមួយដែលបានផ្តួចផ្តើមដោយនាយកដ្ឋានអភិវឌ្ឍកម្មវិធីយុវជន នៃអគ្គនាយកដ្ឋានយុវជន ក្រសួងអប់រំ យុវជន និងកីឡា កាលពីឆ្នាំ២០២៤ ក្នុងគោលបំណងផ្តល់ ជាថ្នាលសម្រាប់ប្រមូលផ្តុំអ្នកជំនាញ ដើម្បីផ្តល់ចំណេះដឹង ជំនាញផ្នែកឌីជីថល ដល់យុវជន និងជាថ្នាលសម្រាប់បណ្តុះគំនិតនវានុវត្តន៍ ក្នុងការស្វែងរកដំណោះស្រាយប្រកបដោយប្រសិទ្ធិភាពសម្រាប់សហគមន៍៕