ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យុវជនខ្មែរមួយក្រុមដែលមានសមាជិក៥នាក់ បានបង្ហាញស្នាដៃគម្រោងកម្មវិធីទូរស័ព្ទមួយ ដែលអាចជួយធ្វើការផ្ទៀងផ្ទាត់ ទប់ស្កាត់ក្នុងការឆបោកតាមប្រព័ន្ធអនឡាញ (Scamming) ដែលពិភពលោកកំពុងមានការព្រួយបារម្ភ ដោយដាក់ឈ្មោះថា KOMNOT ។
គម្រោងកម្មវិធីទូរស័ព្ទដៃ ផ្ទៀងផ្ទាត់បញ្ចៀសការឆបោកតាមប្រពន្ធអនឡាញ KOMNOT នេះ បានជាប់ជ័យលាភីលេខ២ ក្នុងការប្រកួតប្រជែងបច្ចេកវិទ្យានវានុវត្តន៍ រដូវកាលទី៣ ដែលរៀបចំឡើងដោយសាកលវិទ្យាល័យខេមតិច សហការជាមួយសហគ្រិនខ្មែរ (KE) កាលពីចុងខែមករា កន្លងទៅនេះ។
កញ្ញា សំណាង សុខគីនីន និស្សិតឆ្នាំទី៣ ជំនាញសុវត្ថិភាពបណ្តាញ នៃបណ្ឌិត្យសភាបច្ចេកវិទ្យាឌីជីថលកម្ពុជា និងជាតំណាងក្រុម “KOMNOT” និយាយថា កត្តាជំរុញឱ្យក្រុមបង្កើតកម្មវិធីទូរស័ព្ទដៃ ឈ្មោះថា “KOMNOT” នេះឡើង ដោយសារក្រុមរបស់ខ្លួនឃើញមានមតិពីប្រទេសជិតខាងនិយាយមិនល្អពីកម្ពុជាពាក់ព័ន្ធនឹងការឆបោកតាមប្រព័ន្ធអនឡាញ (Scammer)។
កញ្ញា សុខគីនីន បន្ថែមថា ក្នុងនាមជាយុវជនខ្មែរ ការបង្កើតកម្មវិធីទូរស័ព្ទដៃ “KOMNOT” គឺជាការចូលរួមចំណែកតូចមួយក្នុងការដោះស្រាយបញ្ហានេះ និងជួយការពារកុំឱ្យប្រជាជនខ្មែររងគ្រោះដោយសារបញ្ហា Scammer។
តំណាងក្រុម “KOMNOT” រូបនេះ បញ្ជាក់ថា លក្ខណៈពិសេសរបស់កម្មវិធីទូរស័ព្ទដៃនេះ គឺប្រើប្រាស់ Power AI, Machine learning ដើម្បីផ្ទៀងផ្ទាត់សារ រូបភាព ឬ Link ថា ជា Scammer ឬមិនមែន។ សម្រាប់វិធីប្រើប្រាស់ គឺងាយស្រួល ដោយគ្រាន់តែថតចម្លងសារ ឬLink ដែលទទួលបានពីជនមិនស្គាល់អត្តសញ្ញាណ រួចដាក់ទៅក្នុងកម្មវិធី “KOMNOT” នោះកម្មវិធីនឹងផ្ទៀងផ្ទាត់ជាការស្រេច។
«ឥឡូវប្រទេសរបស់យើងល្បីរឿង Scam ដំណោះស្រាយរបស់យើងគឺដោះស្រាយបញ្ហាដ៏ឈឺចាប់មួយហ្នឹង!»។
បើតាមនិស្សិតឆ្នាំទី៣ រូបនេះ កម្មវិធីទូរស័ព្ទដៃ “KOMNOT” ផ្ទៀងផ្ទាត់ការឆបោកតាមប្រព័ន្ធអនឡាញនេះ កំពុងធ្វើតេស្តសាកល្បងបានប្រហែល ៦០ភាគរយ ហើយគ្រោងនឹងដាក់ឱ្យប្រើប្រាស់ទូលំទូលាយនៅឆ្នាំ២០២៧ខាងមុខ៕
