ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងឱកាសចូលរួមពិធីបិទសន្និបាតមន្ទីរអប់រំ យុវជន និងកីឡា ខេត្តបាត់ដំបង កាលពីសប្តាហ៍កន្លងទៅនេះ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានណែនាំទៅដល់់សាលារៀន ក៏ដូចជាបុគ្គលិកអប់រំគ្រប់លំដាប់ថ្នាក់ បន្តយកចិត្តទុកដាក់លើសុខភាព និងការលូតលាស់របស់សិស្សឱ្យបានហ្មត់ចត់ គិតចាប់តាំងពីវ័យកុមារចូលរៀន។
ឯកឧត្តម ហង់ជួន ណារ៉ុន មានប្រសាសន៍ថា កុមារដែលមានសុខភាពល្អ គឺជាធនធានមនុស្សដែលមិនអាចខ្វះបាន សម្រាប់ការអភិវឌ្ឍប្រទេសជាតិនាពេលអនាគត។ ឯកឧត្តមរដ្ឋមន្រ្តីមានប្រសាសន៍ដោយសង្កត់ធ្ងន់ថា ចំណីអាហារល្អ នាំមកនូវសុខភាពល្អ និងសម្រេចបានលទ្ធផលសិក្សាល្អ ដូច្នេះ សាលាទាំងអស់ត្រូវពង្រឹងវិធានការហាមឃាត់ការទទួលទាន ការចែកចាយ ការដាក់តាំងលក់ និងការផ្សព្វផ្សាយពាណិជ្ជកម្មផលិតផលភេសជ្ជៈប៉ូវកម្លាំងគ្រប់ប្រភេទ ទាំងនៅក្នុង និងជុំវិញបរិវេណគ្រឹះស្ថានសិក្សាចំណេះដឹងទូទៅ។
វិធានការលើកកម្ពស់សុវត្ថិភាពចំណីអាហារតាមសាលារៀន ត្រូវបានក្រសួងអប់រំ ដាក់ចេញកាលពីចុងឆ្នាំ២០១៩ ដោយហាមមិនឱ្យគ្រឹះស្ថានសិក្សានានារបស់រដ្ឋដាក់តាំងលក់ចំណីអាហារចំនួន ៦ប្រភេទ រួមមាន ទី១. ចំណីអាហារគ្រប់ប្រភេទដែលហួសកំណត់កាលបរិច្ឆេទប្រើប្រាស់, ទី២. គ្រឿងស្រវឹង និងផលិតផលថ្នាំជក់គ្រប់ប្រភេទ, ទី៣. ចំណីអាហារដែលមិនមានប្រភពច្បាស់លាស់, ទី៤. ភេសជ្ជៈប៉ូវកម្លាំង ភេសជ្ជៈផ្អែម កាហ្វេ ការ៉េម ទឹកស៊ីរ៉ូ គ្រប់ប្រភេទ, ទី៥. ស្ករសូកូឡា ស្ករគ្រាប់និងស្ករកៅស៊ូគ្រប់ប្រភេទ និងទី៦. ចាហួយគ្រប់ប្រភេទ នំដូណាត់ នំផ្អែម តំណាប់ផ្អែមគ្រប់ប្រភេទ។
បន្ថែមពីនេះ កាលពីខែធ្នូ ឆ្នាំ២០២៤ រាជរដ្ឋាភិបាលកម្ពុជា ក៏បានចេញសារាចរណ៍មួយបន្ថែមទៀត ដោយហាមឃាត់មិនឱ្យមានការទទួលទាន តាំងលក់ ឬផ្សព្វផ្សាយភេសជ្ជៈប៉ូវកម្លាំងគ្រប់ប្រភេទដែលមានជាតិផ្អែមក្នុងគ្រឹះស្ថានសិក្សានានាដើម្បីបង្ការជំងឺទឹកនោមផ្អែម ស្របទៅនឹងគោលនយោបាយ «សុខភាពសិក្សា» «អាហារូបត្ថម្ភ» និង «ការផ្តល់អាហារតាមសាលារៀន ឆ្នាំ២០២៤-២០៣៥» ដើម្បីធានាបានសុវត្ថិភាពចំណីអាហារ និងអាហារូបត្ថម្ភរបស់កុមារក្នុងគ្រឹះស្ថានសិក្សា៕
