ភ្នំពេញ៖ នារសៀលថ្ងៃសោរ៍ ទី១១ ខែកុម្ភៈ ឆ្នាំ២០២៣ សាលារៀនអន្តរជាតិទ្រូវីហ្សិនកម្ពុជារៀបចំពិធីសន្និបាតបូកសរុបការងារឆ្នាំ ២០២២ និងទិសដៅការងារ ឆ្នាំ២០២៣ ក្រោមអធិបីភាព លោកគ្រូអគ្គនាយក សេង បូណា ដែលមាន គណៈគ្រប់គ្រង នាយក-នាយិកា លោកគ្រូ-អ្នកគ្រូ បុគ្គលិកសិក្សាទាំងអស់ចំនួន ៦០០នាក់ នាមជ្ឈមណ្ឌលសហប្រតិបត្តិការកម្ពុជា កូរ៉េ (CKCC)​។

ថ្លែងក្នុងឱកាសនោះ លោកគ្រូអគ្គនាយក សូមថ្លែងអំណរគុណ និងសូមកោតសរសើរចំពោះបុគ្គលិកគ្រប់លំដាប់ថ្នាក់ ដែលបានចូលរួមយ៉ាងសកម្ម ការធានានិរន្តភាពនៃការសិក្សារបស់សិស្សក្នុងអំឡុងពេល នៃការប្រយុទ្ធប្រឆាំងនឹងជំងឺកូវីដ-១៩ ដោយធានាបាននូវសុវត្ថិភាពសុខភាព និងការរៀនសូត្ររបស់ សិស្សានុសិស្ស។

លោកគ្រូក៏បានថ្លែងអំណរគុណដល់កិច្ចខំប្រឹងប្រែងរបស់ គណៈគ្រប់គ្រង លោកគ្រូ-អ្នកគ្រូ បុគ្គលិកគ្រប់លំដាប់ថ្នាក់ទាំងអស់ដែលបានចូលរួមការងារ​ យ៉ាងសកម្ម តាមតួនាទី ភារកិច្ចរៀងៗខ្លួននិង​អត់ធ្មត់ក្នុងការងារផ្នែកអប់រំមួយនេះ​ទទួលបាននូវលទ្ធផលវិជ្ជមាន ទោះស្ថិតក្នុងបរិបទនៃការរីករាលដាលនៃជំងឺកូវីដ-១៩ ក៏ដោយ។ លោកគ្រូបានណែនាំ  និងលើកទឹកចិត្ត បុគ្គលិកគ្រប់លំដាប់ថ្នាក់ទាំងអស់ បន្តខិតខំបម្រើសេវាអប់រំ ដល់មាតា-បិតា សិស្សានិសិស្ស ឱ្យកាន់តែមានប្រសិទ្ធភាពបន្ថែមទៀត។

នាក្នុងឱកាសនោះ សាលារៀនអន្តរជាតិទ្រូវីហ្សិនកម្ពុជាក៏បានប្រគល់លិខិតតែងតាំងដល់គណៈគ្រប់គ្រង និង ប្រធានក្រុមបច្ចេកទេសកម្មវិធីសិក្សាជាតិសម្រាប់តំបន់ទួលគោក និង សែនសុខ លិខិតសរសើរដល់បុគ្គលិកដែលបានបំពេញការងារ ចាប់ពី៥ឆ្នាំឡើង លិខិតសរសើរដល់បុគ្គលិកឆ្នើម និង​លិខិតសរសើរដល់បុគ្គលិកដែលមានវត្តមានល្អផងដែរ។

សាលារៀនអន្តរជាតិទ្រូវីហ្សិនកម្ពុជាបច្ចុប្បន្នមានចំនួន ៨សាខានៅក្នុងឆ្នាំ ២០២៣ នេះ  ផ្តល់ជូននូវសេវាអប់រំចាប់ពីថ្នាក់មត្តេយ្យ រហូតដល់ថ្នាក់វិទ្យាល័យ។ លើសពីនេះ ទ្រូវីហ្សិន បានពង្រីកភាពជាដៃគូ   នៅទូទាំងពិភពលោក រួមមាន នូវែលសេឡង់ សិង្ហបុរី អូស្ត្រាលី ចក្រភពអង់គ្លេស និងសហរដ្ឋអាមេរិកហើយកាលពីពេលកន្លងទៅ សិស្សានុសិស្សក៏បានចូលរួមកម្មវិធីផ្លាស់ប្តូរកម្មសិក្សាជាមួយសាលាជាដៃគូផង។

ព័ត៌មានបន្ថែម: http://truevisions.edu.kh/en-us/

Facebook Page: True VISIONS International School of Cambodia

ទំនាក់ទំនង: 012 303 188 or 017 361 669