ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ដើម្បីបង្ការ និងទប់ស្កាត់គ្រោះថ្នាក់ចរាចរណ៍ផ្លូវគោកក្នុងឱកាសពិធីបុណ្យចូលឆ្នាំថ្មី ប្រពៃណីជាតិខាងមុខ គណៈកម្មាធិការជាតិសុវត្ថិភាពចរាចរណ៍ផ្លូវគោក បានធ្វើការអំពាវនាវដល់សាធារណជនជាអ្នកប្រើប្រាស់ផ្លូវទាំងអស់ សូមបើកបរដោយគោរពច្បាប់ស្តីពីចរាចរណ៍ផ្លូវគោក និងចូលរួមទប់ស្កាត់ កាត់បន្ថយគ្រោះថ្នាក់ចរាចរណ៍ផ្លូវគោក។
បើតាមសេចក្តីអំពាវនាវរបស់គណៈកម្មាធិការជាតិសុវត្ថិភាពចរាចរណ៍ផ្លូវគោក ក្នុងឱកាសនៃពិធីបុណ្យចូលឆ្នាំថ្មី ខាងមុខនេះ សូមអ្នកប្រើប្រាស់ផ្លូវទាំងអស់កុំបើកបរលើសល្បឿនកំណត់, កុំបើកបរក្រោមឥទ្ធិពលនៃគ្រឿងស្រវឹង ឬគ្រឿងញៀន, ត្រូវគោរពសិទ្ធិអាទិភាព គោរពភ្លើង-ផ្លាកសញ្ញាចរាចរណ៍ និងសញ្ញាបញ្ហារបស់មន្ត្រីនគរបាលចរាចរណ៍ផ្លូវគោក, ត្រូវបើកបរក្នុងគន្លងផ្លូវដែលកំណត់ដោយច្បាប់ស្តីពីចរាចរណ៍ផ្លូវគោក និងមិនត្រូវបើកបរជាន់លើគំនូសសញ្ញបែងចែកគន្លងផ្លូវ, ត្រូវប្រុងប្រយ័ត្នជានិច្ចក្នុងការបត់ ការជែង ការចត និងការឈប់, ត្រូវត្រួតពិនិត្យមុនចេញដំណើរនូវលក្ខណៈបច្ចេកទេសយានយន្ត ដូចជាសំបកកង់ ហ្រ្វាំង ភ្លើងបំភ្លឺ និងចង្កូត ជាដើម។
ត្រូវពាក់មួកសុវត្ថិភាពជានិច្ចក្នុងពេលធ្វើដំណើរតាមទោចក្រយានយន្តទោះជិត ឬឆ្ងាយ, មិនត្រូវលេងគប់ទឹក ឬប៉ាតម្សៅដល់អ្នកប្រើប្រាស់ផ្លូវ, សូមកុំផ្ទុកអ្នកដំណើរ ឬទំនិញលើសច្បាប់កំណត់។ ចំពោះរថយន្តដឹកអ្នកដំណើរ ឬដឹកកម្មករមិនឱ្យផ្ទុកអ្នកដំណើរ ឬកម្មករលើដំបូល និងសូមមេត្តាកុំដំឡើងថ្លៃធ្វើដំណើរក្នុងឱកាសនេះ។
ឯកឧត្តម គង់ សុវណ្ណ ទីប្រក្សាគណៈកម្មាធិការជាតិសុវត្ថិភាពចរាចរណ៍ផ្លូវគោក មានប្រសាសន៍ថា ក្នុងអំឡុងពេលបុណ្យចូលឆ្នាំប្រពៃណីជាតិខ្មែរដែលនឹងឈានចូលមកដល់ប៉ុន្មានថ្ងៃខាងមុខនេះ កម្លាំងអាជ្ញាធរមូលដ្ឋាន និងនគរបាលចរាចរណ៍ ក៏ដូចជាកងរាជអាវុធហត្ថ នឹងដាក់ពង្រាយតាមតំបន់ដែលងាយកកស្ទះ ដើម្បីធានាសណ្តាប់ធ្នាប់ និងលំហូរចរាចណ៍តាមដងផ្លូវ។
ជាមួយគ្នានេះ ឯកឧត្តម គង់ សុវណ្ណ បានជំរុញក្រើនរំលឹកដល់បងប្អូនកូនក្មួយទាំងអស់ដែលធ្វើដំណើរទៅមកនៅតាមដងផ្លូវ មិនថាជិត ឬឆ្ងាយ ពិសេសនោះគឺអ្នកបើកបរទាំងអស់ត្រូវប្រកាន់ខ្ជាប់នូវរាល់ចំណុចដែលបានលើកឡើងខាងលើ។ ឯកឧត្តមបន្តថា ការអប់រំ ផ្សព្វផ្សាយ នឹងមានប្រសិទ្ធភាពប្រសិនបើនគរបាលចរាណ៍ អាចដាក់នូវគោលដៅចល័តដោយចំហរ រឹតបន្តឹងការបើកបរហួសល្បឿនកំណត់ និងការបើកបរនៅក្រោមឥទ្ធិពលនៃគ្រឿងស្រវឹង យ៉ាងហោច មុន២ថ្ងៃ អំឡុងពេល និងក្រោយ ២ថ្ងៃនៃពិធីបុណ្យចូលឆ្នាំប្រពៃណីជាតិខ្មែរ។
តាមរបាយការណ៍របស់នាយកដ្ឋានចរាចរណ៍ផ្លូវគោក កាលពីឆ្នាំ២០២៤ កម្ពុជាមានគ្រោះថ្នាក់ចរាចរណ៍កើតឡើងសរុបចំនួន ២៨៤៤លើក ដោយបណ្តាលឱ្យមានមនុស្សស្លាប់ចំនួន ១៥០៩នាក់ និងរបួស ៣៧២០នាក់។ ក្នុងនោះសម្រាប់ពិធីបុណ្យចូលឆ្នាំថ្មី គ្រោះថ្នាក់ចរាចរណ៍បានកើតមានសរុបចំនួន ចំនួន៦៤ករណី ដោយបណ្តាលឱ្យស្លាប់មនុស្សចំនួន៣៧នាក់ និងរបួស៨៨នាក់៕
