ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា គ្រោងនឹងធ្វើការជួសជុលឡើងវិញនូវសាលាជាង ៦០០កន្លែងដែលរងផលប៉ះពាល់ដោយសារសង្រ្គាមព្រំដែនកម្ពុជា-ថៃ ក្នុងភូមិសាស្រ្តខេត្តឧត្តរមានជ័យ និងខេត្តព្រះវិហារ ឱ្យបានរួចរាល់មុនការបើកបវេសកាលឆ្នាំសិក្សាថ្មីនាដើមខែវិច្ឆិកាខាងមុខ។
បើតាមលោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា ដំណើរការនៃការសាងសង់ ក៏ដូចជាជួសជុលអគារដែលរងការខូចខាតនៅតាមបណ្ដោយព្រំដែន ក្រសួងបានត្រៀមថវិកាប្រមាណចំនួន ៥០ម៉ឺនដុល្លារក្នុងការធ្វើកិច្ចការនេះ។
លោកជំទាវ ឃួន វិច្ឆិកា មានប្រសាសន៍បញ្ជាក់ដែរថា ក្រៅពីនេះ ក្រុមការងារក្រសួងអប់រំ ក៏បន្តធ្វើការងារជិតស្និទ្ធជាមួយនឹងដៃគូអភិវឌ្ឍនានា នៅក្នុងការកៀរគរគាំទ្រថវិកាបន្ថែម ដើម្បីធានាយ៉ាងណាឱ្យប្អូនៗអាចចូលរៀនបាននៅក្នុងការបើកបវេសនកាលដ៏ខ្លីខាងមុខនេះ ដោយក្រសួងបានរៀបចំក្រុមការងាររួចរាល់អស់ហើយ ទាំងការងារសំណង់ក៏ដូចជាការងារបច្ចេកទេស ហើយក្រុងការងារ នឹងចុះទៅពិនិត្យដោយផ្ទាល់នៅតាមទីតាំងជាក់ស្ដែង ដើម្បីពិនិត្យមើលឱ្យបានគ្រប់ជ្រុងជ្រោយ និងដាក់ផែនការក្នុងការជំរុញដំណើរការនៃការជួសជុល និងសាងសង់ឱ្យបានឆាប់រហ័សតាមការគ្រោងទុក។
សម្រាប់ការងារសាងសង់ និងជួសជុលអគារសិក្សាដែលរងផលប៉ះពាល់នៅតំបន់ព្រំដែនកម្ពុជា-ថៃនេះ នៅក្នុងកិច្ចប្រជុំកាលពីដើមសប្តាហ៍នេះ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានជំរុញក្រុមការងារដំណើរការឱ្យបានឆាប់រហ័សតាមការគ្រោងទុក ដើម្បីធានាបានថា សិស្សដែលរស់នៅតំបន់តាមបណ្តោយព្រំដែន នឹងអាចបន្តការសិក្សានៅឆ្នាំសិក្សាថ្មី ២០២៥–២០២៦នេះ។ ប៉ុន្តែក្នុងករណីដែលមិនអាចដំណើរការបានដោយសារស្ថានភាពនៅព្រំដែនមិនទាន់មានស្ថិរភាព ឯកឧត្តមស្នើឱ្យរៀបចំយុទ្ធសាស្ត្របើកបវេសនកាលឆ្នាំសិក្សាថ្មី តាមតំបន់សុវត្ថិភាពដែលអំណោយផលដល់ការរៀន និងបង្រៀន និងរៀបចំរបាយការណ៍ស្តីពី ស្ថានភាពសាលារៀនដែលរងផលប៉ះពាល់ និងវិភាគរកដំណោះស្រាយ និងទីតាំងសម្រាប់ការបង្រៀនដែលសមស្រប ក៏ដូចជាតម្រូវការចាំបាច់ផ្សេងៗដើម្បីជួយដល់ដំណើរការរៀន និងបង្រៀន។
ការប៉ះទង្គិចគ្នាដោយអាវុធរវាងកងទ័ពប្រទេសកម្ពុជា និងថៃ នៅតាមបណ្តោយព្រំដែន កាលពីចុងខែកក្កដា បានបណ្តាលឱ្យប្រជាជនរាប់សិបម៉ឺននាក់ក្នុងខេត្តឧត្តរមានជ័យ ព្រះវិហារ ពោធិ៍សាត់ ត្រូវជម្លៀសចេញពីផ្ទះសម្បែង ក្នុងនោះសាលាចំនួន ៦០៥កន្លែងត្រូវបានបិទទ្វារបណ្តោះអាសន្ន ដែលប៉ះពាល់ទៅដល់សិស្ស ១៥ម៉ឺនននាក់ និងគ្រូបង្រៀនជាង៦ពាន់នាក់។
ក្នុងដំណើរអញ្ជើញចូលរួមកិច្ចប្រជុំកំពូលអង្គការសហប្រតិបត្តិការសៀងហៃ បូក របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា នៅសាធារណរដ្ឋប្រជាមានិតចិន ឯកឧត្តម ស៊ី ជីនពីង ប្រធានាធិបតី សាធារណរដ្ឋប្រជាមានិតចិន ប្រកាសផ្តល់ជំនួយមនុស្សធម៌ ចំនួន ២០លានយ័ន (ប្រមាណ ២,៨លានដុល្លារអាមេរិក) ដល់កម្ពុជា ដើម្បីជួយស្តារឡើងវិញនូវការខូចខាត និងជួយសម្រួលទុក្ខលំបាកជនភៀសសឹកកម្ពុជាដែលរងគ្រោះដោយសារការប៉ះទង្គិចប្រដាប់អាវុធកន្លងទៅ។ នេះបើតាមឯកឧត្តម មាស សុភ័ណ្ឌ អ្នកនាំពាក្យនាយករដ្ឋមន្ត្រី៕
