ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានលើកឡើងថា ការវិនិយោគលើសុខុមាលភាព សុវត្ថិភាព និងការអភិវឌ្ឍកុមារនៅថ្ងៃនេះ គឺជាការកសាងមូលដ្ឋានគ្រឹះដ៏រឹងមាំនៃមូលធនមនុស្សប្រកបដោយសក្ដានុពល ដើម្បីជំរុញការអភិវឌ្ឍកម្ពុជាឱ្យកាន់តែរីកចម្រើន និងរុងរឿងនាពេលអនាគត។
សម្ដេចធិបតីបានមានប្រសាសន៍បែបនេះ ក្នុងឱកាសអបអរសាទរខួបលើកទី៧៧ នៃទិវាកុមារអន្តរជាតិ ១ មិថុនា ក្រោមប្រធានបទ «សន្តិភាព ជាមូលដ្ឋានគ្រឹះនៃការគោរព និងកិច្ចគាំពារសិទ្ធិកុមារ»។
សម្ដេចបានគូសបញ្ជាក់ថា ការប្រារព្ធទិវាកុមារអន្តរជាតិនេះ មានគោលបំណងរំលឹកដល់ការអនុវត្តសិទ្ធិជាមូលដ្ឋានរបស់កុមារ និងបង្ហាញពីការយកចិត្តទុកដាក់របស់រាជរដ្ឋាភិបាលក្នុងការដោះស្រាយបញ្ហាប្រឈមនានាដែលកុមារកំពុងប្រឈមមុខ។
បញ្ហាទាំងនោះរួមមាន ការបង្ការ ទប់ស្កាត់ និងឆ្លើយតបចំពោះអំពើហិង្សាលើកុមារ ពលកម្មកុមារ និងសុវត្ថិភាពកុមារនៅលើប្រព័ន្ធអនឡាញ ព្រមទាំងការគាំទ្រកុមាររងគ្រោះ និងកុមារងាយរងគ្រោះពីហានិភ័យ ការគំរាមកំហែង ការកេងប្រវ័ញ្ច និងការរំលោភបំពានគ្រប់ទម្រង់ ដើម្បីធានាឱ្យកុមារអាចរស់នៅ និងអភិវឌ្ឍខ្លួនប្រកបដោយសុខដុមរមនាក្រោមម្លប់សន្តិភាព។
សម្ដេចធិបតីបានសង្កត់ធ្ងន់ថា កុមារគឺជាធនធានដ៏មានតម្លៃ និងជាកម្លាំងស្នូលសម្រាប់ការអភិវឌ្ឍប្រទេសជាតិ។ ជាក់ស្ដែង យុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល បានកំណត់យក «មនុស្ស» ជាវិស័យអាទិភាពចម្បងបំផុតក្នុងចំណោមអាទិភាពទាំងប្រាំ។
ការវិនិយោគលើសុខុមាលភាព សុវត្ថិភាព និងការអភិវឌ្ឍកុមារនៅថ្ងៃនេះ គឺជាការកសាងមូលដ្ឋានគ្រឹះដ៏រឹងមាំនៃមូលធនមនុស្សប្រកបដោយសក្ដានុពល ដើម្បីជំរុញសន្ទុះការអភិវឌ្ឍកម្ពុជាឱ្យកាន់តែរីកចម្រើន និងរុងរឿងនាពេលអនាគត
ជាមួយគ្នានេះ លោកឧកញ៉ា ប៉ិច បូឡែន សហស្ថាបនិក និងជាប្រធានក្រុមប្រឹក្សាភិបាលនៃសហព័ន្ធសេវាអប់រំនៅកម្ពុជា បានមានប្រសាសន៍ថា ការអភិវឌ្ឍមូលធនកុមារនាពេលបច្ចុប្បន្ន មានសារៈសំខាន់ខ្លាំងសម្រាប់ការអភិវឌ្ឍប្រទេសជាតិនាពេលអនាគត ហើយកិច្ចការនេះគឺជាទំនួលខុសត្រូវរួមរបស់អ្នកអប់រំ អាណាព្យាបាល វិស័យឯកជន រាជរដ្ឋាភិបាល និងអង្គការ-សមាគមពាក់ព័ន្ធ។
លោកបានលើកឡើងថា «កុមារម្នាក់នៅថ្ងៃនេះ អាចក្លាយជាវេជ្ជបណ្ឌិតឯកទេសដ៏ពូកែម្នាក់ អ្នកវិទ្យាសាស្ត្រដ៏ចំណាន កវីនិពន្ធដ៏ល្បី សហគ្រិនដែលជួយជំរុញសេដ្ឋកិច្ចជាតិ ឬជាថ្នាក់ដឹកនាំដ៏សំខាន់ម្នាក់របស់ប្រទេសនាពេលអនាគត»។
ដោយឡែក អង្គការ UNICEF បានលើកឡើងក្នុងសារអបអរសាទរទិវាកុមារអន្តរជាតិថា ក្នុងរយៈពេល ៧៤ ឆ្នាំកន្លងមកនេះ យូនីសេហ្វបានធ្វើការយ៉ាងជិតស្និទ្ធជាមួយកុមារ ក្រុមគ្រួសារ សហគមន៍ និងដៃគូនានានៅកម្ពុជា ដើម្បីធានាថា កុមារទទួលបានការគាំពារ សុវត្ថិភាព ការអប់រំ និងឱកាសអភិវឌ្ឍសមត្ថភាពរបស់ខ្លួនបានពេញលេញ។
ទោះជាយ៉ាងណា អង្គការនេះបានកត់សម្គាល់ថា កុមារជាច្រើននៅកម្ពុជានៅតែបន្តប្រឈមនឹងឧបសគ្គ និងការលំបាកជាច្រើន ដែលពួកគេមិនគួរត្រូវរែកពន់តែម្នាក់ឯងនោះទេ។
យូនីសេហ្វបានបញ្ជាក់ថា ការរួបរួម និងកិច្ចសហការពីគ្រប់ភាគី គឺជាកត្តាសំខាន់ក្នុងការផ្លាស់ប្តូរជីវិត និងអនាគតរបស់កុមារកម្ពុជា ឱ្យកាន់តែប្រសើរឡើង៕
