ភ្នំពេញ – ពិធីបុណ្យចូលឆ្នាំខ្មែរ ជាឱកាសដ៏ល្អមួយ​សម្រាប់នារីស្លៀកសម្លៀកបំពាក់ប្រពៃណីខ្មែរ ដោយ​ប្រកាន់ភ្ជាប់នូវឥរិយាបទសុភាពរាបសារ ។ ការស្លៀកសម្លៀកបំពាក់ប្រពៃណីខ្មែរបានចូលរួមចំណែកថែរក្សាវប្បធម៌ប្រពៃណីទំនៀមទម្លាប់ខ្មែរផងដែរ។ នេះបើតាមប្រសាសន៍លើកឡើងរបស់លោក យូ សុភា សាស្រ្ដាចារ្យផ្នែកវប្បធម៌ នៅសាកលវិទ្យាល័យភូមិន្ទភ្នំពេញ។

លោក យូ សុភា មានប្រសាសន៍ថា សម្លៀកបំពាក់ប្រពៃណីខ្មែរ រួមមាន ហូលផាមួង អាវប៉ាក់ សំពត់បត់ គឺជាអត្តសញ្ញាណជាតិរបស់ខ្មែរ ដូច្នេះកាលណានារីស្លៀកសម្លៀកបំពាក់ទាំងនេះចូលរួមក្នុងពិធីបុណ្យចូលឆ្នាំ គឺបង្ហាញឱ្យឃើញពីលក្ខណៈរបស់ជនជាតិខ្មែរ ជាពិសេសនារីខ្មែរនៅតែចូលរួមថែរក្សាប្រពៃណីទំនៀមទម្លាប់មិនឱ្យបាត់បង់។ លើសពីនេះ លើកស្ទួយវិស័យសិប្បកម្មតម្បាញ ផលិតសំពត់ហូល ផាមួង អាវប៉ាក់ ឱ្យមានទីផ្សារកាន់តែច្រើនទៀតផង។

សាស្រ្ដាចារ្យផ្នែកវប្បធម៌ រូបនេះ បន្ថែមថា​ កាលណាយើងស្លៀកសម្លៀកបំពាក់ប្រពៃណីទៅកាន់ទីគោរពសក្ការៈបូជា នឹងជំរុញឱ្យអ្នកដែលស្លៀកសម្លៀកបំពាក់ប្រពៃណីប្រកាន់ភ្ជាប់នូវឥរិយាបទល្អ ទន់ភ្លន់ សុភាពរាបសារ ដើម្បីឱ្យសាកសមជាមួយសម្លៀកបំពាក់ប្រពៃណីខ្មែរ។ ឧទាហរណ៍ យុវនារីមួយចំនួន ពីមុនមកធ្លាប់តែរហ័សរហួន រប៉ិលរប៉ូច ប៉ុន្តែនៅពេលបានស្លៀកសម្លៀកបំពាក់ប្រពៃណី ក៏បានបង្ហាញឱ្យឃើញពីភាពទន់ភ្លន់ ភាពស្រស់ស្អាត សុភាពរាបសារ ដែលបង្ហាញឱ្យឃើញអំពីវប្បធម៌ខ្មែរ និងអត្តចរិកស្រ្តីខ្មែរ។

លោក យូ សុភា សាស្រ្ដាចារ្យផ្នែកវប្បធម៌ នៅសាកលវិទ្យាល័យភូមិន្ទភ្នំពេញ

“ស្រ្តីខ្មែរកាលណាបានស្លៀកសម្លៀកបំពាក់ប្រពៃណីខ្មែរ គឺមានសម្រស់ស្រស់ស្អាត ហើយអត្តចរិកក៏សមរម្យ ថ្លៃថ្នូរទៅតាមនោះដែរ”

លោក យូ សុភា បន្ថែមថា នៅពេលនារីខ្មែរឱ្យ​តម្លៃទៅលើការស្លៀកសម្លៀកបំពាក់ប្រពៃណីខ្មែរ ក៏បានចូលរួមចំណែកថែរក្សាម៉ូតសម្លៀកបំពាក់កុំឱ្យបាត់បង់ និងចូលរួមលើកទឹកចិត្តដល់សិប្បកខ្មែរដែលផលិតក្រណាត់សូត្រខិតខំរកវិធីត្បាញរវៃឱ្យបានច្រើន មានទីផ្សារ មានការងារធ្វើ ក្នុងការថែរក្សាវប្បធម៌ប្រពៃណីខ្មែរផង និងរួមចំណែកកសាងសេដ្ឋកិច្ចជាតិផង។

សាស្រ្ដាចារ្យផ្នែកវប្បធម៌ លោក យូ សុភា ក៏បានលើកទឹកចិត្តនៅក្នុងនាមជាកូនខ្មែរ ជាពិសេសយុវនារីគួរតែនាំគ្នាស្លៀកសម្លៀកបំពាក់ប្រពៃណីខ្មែរ មានហូល ផាមួង អាវប៉ាក់ សំពត់បត់ ចូលរួមក្នុងឱកាសបុណ្យចូលឆ្នាំខ្មែរខាងមុខ ពីព្រោះមិនត្រឹមតែជួយបង្កើនសោភ័ភាពខ្លួនឯងប៉ុណ្ណោះទេ ថែមទាំងជាចំណាប់អារម្មណ៍របស់អ្នកដទៃ ជាពិសេសភ្ញៀវអន្តរជាតិបានទទួលស្គាល់ និងឱ្យតម្លៃវប្បធម៌ខ្មែរ ជាប្រជាជាតិមួយដែលមានសម្លៀកបំពាក់ជាវប្បធម៌របស់ខ្លួន៕