ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការវិនិយោគលើកុមារតូចនៅពេលបច្ចុប្បន្ន គឺជាការកសាងគ្រឹះស្ថានដ៏រឹងមាំមួយ សម្រាប់ធានាដល់សន្តិសុខ ស្ថិរភាព និងការអភិវឌ្ឍសេដ្ឋកិច្ចជាតិទៅថ្ងៃអនាគត។ នេះគឺជាប្រសាសន៍លើកឡើងរបស់ លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការក្រសួងអប់រំ យុវជន និងកីឡា នៅក្នុងសិក្ខាសាលាផ្សព្វផ្សាយ «សៀវភៅណែនាំស្ដីពី ការកសាងផែនការសកម្មភាពថ្នាក់ក្រោមជាតិសម្រាប់គាំពារ និងអភិវឌ្ឍន៍កុមារតូច» កាលពីពេលថ្មីៗនេះ។
នៅក្នុងឱកាសនោះ លោកជំទាវបណ្ឌិតបានសង្កត់ធ្ងន់ថា ការងារគាំពារនិងអភិវឌ្ឍន៍កុមារតូច គឺជាចំណុចចាប់ផ្ដើមដំបូងបង្អស់ និងជាបេះដូងនៃការកសាងមូលធនមនុស្ស ប្រកបដោយគុណភាព សមត្ថភាព និងបរិយាបន្ន ស្របទៅតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា ដែលផ្តល់អាទិភាពខ្ពស់បំផុតលើការអភិវឌ្ឍធនធានមនុស្ស។
បើតាមលោកជំទាវបណ្ឌិត គឹម សេដ្ឋានី នៅក្នុងក្របខ័ណ្ឌនៃការចិញ្ចឹមបីបាច់កុមារតូចមានគោលដៅគន្លឹះចំនួន ៥ ដើម្បីធានាឱ្យកុមារមានការលូតលាស់ និងអភិវឌ្ឍន៍ពេញលេញទាំងផ្លូវកាយ ស្មារតី និងបញ្ញា ដែលរួមមាន ការថែទាំសុខភាពឱ្យបានល្អ ការផ្ដល់អាហារូបត្ថម្ភ ការធានាសន្តិសុខនិងសុវត្ថិភាព ការថែទាំប្រកបដោយការឆ្លើយតប និងការផ្ដល់ឱកាសចូលរៀនទាន់ពេលវេលា។
ឆ្លៀតក្នុងឱកាសនោះ លោកជំទាវបណ្ឌិត រដ្ឋលេខាធិការប្រចាំការ បានកោតសរសើរ និងថ្លែងអំណរគុណដល់អង្គការយូនីសេហ្វប្រចាំកម្ពុជា និងដៃគូអភិវឌ្ឍន៍ទាំងអស់ ដែលបានរួមចំណែកបង្កើតសៀវភៅណែនាំស្ដីពីការកសាងផែនការសកម្មភាពថ្នាក់ក្រោមជាតិសម្រាប់គាំពារ និងអភិវឌ្ឍន៍កុមារតូច ដែលបានបែងចែកជា ៣ជំហានគន្លឹះយ៉ាងច្បាស់លាស់រួមមាន ការបង្កើតក្រុមការងារកសាងផែនការសកម្មភាពដើម្បីធានាការចូលរួមពីគ្រប់វិស័យពាក់ព័ន្ធ ការវិភាគស្ថានភាពកុមារពីអាយុ ០ ដល់ក្រោម ៦ឆ្នាំ ដើម្បីដឹងច្បាស់ពីតម្រូវការជាក់ស្ដែង និងបញ្ហាប្រឈមរបស់កុមារនៅក្នុងមូលដ្ឋាន ព្រមទាំងការរៀបចំ អនុម័ត និងផ្សព្វផ្សាយផែនការសកម្មភាព ដើម្បីបំប្លែងចក្ខុវិស័យទៅជាសកម្មភាពជាក់ស្ដែង និងមានការទទួលខុសត្រូវខ្ពស់៕
