យុវជនមកពីសាកលវិទ្យាល័យផារ៉ាហ្គន ដែលមានសមាជិក៥រូប បានសហការគ្នាបង្កើតគម្រោងអាជីវកម្មឌីជីថលមួយឈ្មោះថា “We Treat” ដើម្បីផ្ដល់ភាពងាយស្រួលក្នុងការរៀបចំដំណើរកម្សាន្តសម្រាប់ក្រុមហ៊ុនអាជីវកម្មតាមប្រព័ន្ធឌីជីថល។ គម្រោងនេះ ក៏បានជាប់ជ័យលាភីលេខ៣ ក្នុងការប្រកួតកម្មវិធីយុវជន២១ វគ្គផ្ដាច់ព្រ័ត្រ រដូវកាលទី៣ ប្រធានបទ សហគ្រិនភាពឌីជីថល៖ នវានុវត្តន៍អាជីវកម្ម កាលពីដើមខែតុលា ឆ្នាំ២០២៣។

លោក រូ ម៉ានិត និស្សិតឆ្នាំទី៤ ជំនាញគ្រប់គ្រងពាណិជ្ជកម្ម នៃសាកលវិទ្យាល័យផារ៉ាហ្គន និងជាប្រធានគ្រប់គ្រងគម្រោង We Treat បាននិយាយថា​ គម្រោងអាជីវកម្ម “We Treat” គឺជាក្រុមហ៊ុនរៀបចំ ផែនការសម្រាកលំហែ និងដំណើរកម្សាន្តសម្រាប់ក្រុមហ៊ុនអាជីវកម្មដោយបង្កើតនូវបទពិសោធន៍ ដែលមិនអាចបំភ្លេចបាន។

លោក រូ ម៉ានិត បន្ថែមថា កត្តាដែលជំរុញឱ្យលោកនិងសមាជិកក្រុមបង្កើតគម្រោង We Treat នេះឡើងដោយសារដំបូងឡើយនៅពេលលោកនិងសមាជិក្រុមបានចូលហាត់ការងារនៅតាមក្រុមហ៊ុនធំៗ និងមធ្យមមួយចំនួន បានសង្កេតឃើញថា ក្រុមហ៊ុនទាំងនោះមានបញ្ហាស្រដៀងគ្នាក្នុងការរៀបចំដំណើរកំសាន្តសម្រាប់បុគ្គលិក ដែលនាំឱ្យមានភាពស្មុគ្រស្មាញខ្លាំង។ ដោយសារចង់រួមចំណែកដោះស្រាយបញ្ហានេះ ទើបបានសមាជិកក្រុម រួមគំនិតគ្នាចុះស្រាវជ្រាវ ធ្វើផែនការអាជីវកម្ម និងបង្កើតគម្រោងនេះឡើង។

«យើងមានចក្ខុវិស័យចង់ក្លាយជាអ្នករៀបចំអាជីវកម្មដំណើរកម្សាន្តបែបក្រុមហ៊ុន ដើម្បីពង្រឹងចំណងទំនាក់ទំនងល្អសម្រាប់បុគ្គលិក និងបង្កើតភាពងាយស្រួលក្នុងការធ្វើការងារតាមប្រព័ន្ធឌីជីថល»

លោក រូ ម៉ានិត និស្សិតឆ្នាំទី៤ ជំនាញគ្រប់គ្រងពាណិជ្ជកម្ម នៃសាកលវិទ្យាល័យផារ៉ាហ្គន និងជាប្រធានគ្រប់គ្រងគម្រោង We Treat

ប្រធានគ្រប់គ្រងគម្រោង We Treat រូបនេះ បន្ថែមថា គម្រោង We Treat បានបង្កើតឡើងតាំងពីដើមឆ្នាំ២០២៣ ហើយទម្រាំអាចឱ្យគម្រោងនេះចេញជារូបរាងបានឆ្លងកាត់បញ្ហាជាច្រើន ដោយចំណាយពេលវេលា កម្លាំង និងថវិកា ត្រូវចុះស្រាវជ្រាវក៏ដូចជាសម្ភាសន៍ជាមួយក្រុមហ៊ុនជាច្រើន។ ទន្ទឹមគ្នានេះ ក៏មានទំនាស់ ការខ្វែងគំនិតក្នុងក្រុម ប៉ុន្តែបញ្ហាទាំងនេះកើតមានឡើងក៏ដោយសារគោលដៅតែមួយគឺចង់ឱ្យក្រុមទៅមុខដោយរលូន។ ទន្ទឹមគ្នានេះ មានការគាំទ្រថវិកា និងអ្នកប្រឹក្សាយោបលនៅសាកលវិទ្យាចាំជួយណែនាំ ក៏ដូចជាជំរុញលើកទឹកចិត្ត ដែលជាកម្លាំងចិត្តឱ្យក្រុមអាចឈានមកដល់វគ្គផ្ដាច់ព្រ័ត្រនៃកម្មវិធីយុវជន២១។

ក្រុមរបស់យើងមានអារម្មណ៍រំភើបនៅពេលបានជាប់មកដល់វគ្គផ្ដាច់ព្រ័ត្រ ហើយបើទោះជាយើងបានចំណាត់ថ្នាក់អ្វីក៏យើងនៅតែសប្បាយចិត្ត ព្រោះយើងបានខិតខំអស់ពីសមត្ថភាពហើយ

លោក រូ ម៉ានិត និស្សិតឆ្នាំទី៤ ជំនាញគ្រប់គ្រងពាណិជ្ជកម្ម នៃសាកលវិទ្យាល័យផារ៉ាហ្គន និងជាប្រធានគ្រប់គ្រងគម្រោង We Treat

លោក រូ ម៉ានិត បញ្ជាក់ថា ក្រោយចូលរួមកម្មវិធីនេះ ធ្វើឱ្យលោក និងសមាជិកក្រុមយល់ច្បាស់ថា មនុស្សមួយចំនួនគិតថា ការដំណើរការអាជីវកម្មមួយមិនមែនជារឿងងាយស្រួលដូចធ្លាប់ឮគេនិយាយទេ ផ្ទុយទៅវិញវាមានឧបសគ្គ និងបញ្ហាជាច្រើន ដែលទាមទារឱ្យផលិតផលដែលបង្កើតឡើងពិតជាឆ្លើយតបបញ្ហានៅក្នុងសង្គម ត្រូវស្រាវជ្រាវច្រើន ស្វែងរកអតិថិជន និងរកដំណោះស្រាយពេលជួបបញ្ហា ។ លើសពីនេះ ក្រុមការងារពិតជាសំខាន់នៅក្នុងអាជីវកម្មត្រូវតែមានវិជ្ជាជីវៈខ្ពស់ និងរបៀបធ្វើការងារមានស្តង់ដាត្រឹមត្រូវ។

ប្រធានគ្រប់គ្រងគម្រោង We Treat ក៏បានលើកទឹកចិត្តយុវជនទាំងអស់ឱ្យចូលរួមក្នុងការប្រកួតកម្មវិធីផ្សេងៗឱ្យបានច្រើន ដើម្បីទទួលបានបទពិសោធន៍ថ្មីៗ ដើម្បីដឹងថាសង្គមខាងក្រៅពិតជាធំ ដោយមិនគួរដាក់ខ្លួននៅតែក្នុងសាលា ឬនៅក្នុងតំបន់សុខស្រួលរហូតនោះទេ ។ ទន្ទឹមគ្នានេះ នៅពេលយើងបានចូលរួមកម្មវិធីទាំងនេះ យើងនឹងអរគុណខ្លួនឯងដែលបានចូលរួម ព្រោះប្រសិនជាមិនបានចូលរួមទេយើងនឹងមិនបានអភិវឌ្ឍសមត្ថភាព និងទទួលបានចំណេះដឹងថ្មីៗ៕