ការចាប់ផ្តើមរត់ដំបូងៗ មិនថាការចូលរួមកម្រិតជាតិ​ ឬអន្តរជាតិនោះទេ កាលដែលមានចំណេះដឹងមូលដ្ឋានគ្រឹះ ការណែនាំពីអ្នកជំនាញ មានគ្នីគ្នារត់ជាមួយ រួមទាំងការគិតគូរអំពីអាហារហូបចុក ការសម្រួលសរសៃសាច់ដុំ និងសកម្មភាពដទៃៗជាច្រើនទៀតដែលចាំបាច់ត្រូវដឹង មុននឹងបោះជំហានរត់។

តាមរយៈគេហទំព័រ Fleet Feet បានបង្ហាញអំពីវិធីសាស្រ្តមួយចំនួនដើម្បីអនុវត្តន៍ក្នុងការការពារពីហានិភ័យ និងការថែទាំសុខភាព ដូចជាលំហាត់ប្រាណដែលធ្វើឱ្យជើងមានកម្លាំងថាមពល, ការទទួលទានអាហារដែលផ្តល់ថាមពល និងគុណភាពនៃការគេងជាដើម ដោយមានរៀបរាប់បន្ថែមនៅខាងក្រោម ៖

ការចាប់ផ្តើម ៖ ការចាប់ផ្តើមដំបូង គឺត្រូវសម្រេចចិត្តជ្រើសរើសចម្ងាយ ឬគីឡូ ដែលសមស្របនឹងថាមពលដែលខ្លួនមាន ឬអាចធ្វើទៅបាន! ថា តើជ្រើសយករត់ពាក់កណ្តាលម៉ារ៉ាតុង ឬក៏រត់ឱ្យទាល់តែដល់គោលដៅតែម្តង។ មិនថាការកំណត់យកបែបណានោះទេ​ អ្វីដែលត្រូវអនុវត្តន៍បន្ទាប់គឺការរកជំនួយពីខាងក្រៅ ដូចជារកគ្រូដើម្បីបង្វឹកបង្ហាត់រកអ្នកជំនាញលើការជ្រើសរើសរបបអាហារ និងការប្តេជ្ញាចិត្តគេងឱ្យបានគ្រប់ចំនួន និងគុណភាព។

អាហារូបត្ថម្ភ និងការបំពេញជាតិទឹក ៖ ក្រៅតែពីការស្វែងរកអ្នកជំនាញ ការដឹងអំពីមូលដ្ឋានគ្រឹះនៃអាហារសម្រាប់ការទទួលទានដោយខ្លួនឯងជាមុន រឹងរឹតតែមានសារៈសំខាន់ក្នុងការចាប់ផ្តើមអនុវត្តន៍ ដោយអាហារទាំងនោះមានដូចជា ចេក ផ្លែឪឡឹក ផ្លែប៉ោម និងអាហារសម្រន់មួយចំនួនទៀតដែលបង្កើនថាមពល បំពេញជាតិទឹកដល់រាងកាយ និងមិនធ្ងន់ពោះពេក។

ផ្តោតលើសុវត្ថិភាពជាចម្បង ៖ ដើម្បីបង្កើនកម្រិតសុវត្ថិភាពទៅកាន់ខ្លួនឯង គួរចែករំលែកនូវប្រភេទកម្មវិធីរត់ ឬក៏ផែនការ​នៃការរត់ទៅកាន់មនុស្សដែលជិតស្និទ្ធឱ្យពួកគេបានដឹងអំពីទីកន្លែងដែលអ្នកគ្រោងនឹងទៅរត់ រួមទាំងចំនួនពេលវេលាដែលត្រូវចូលរួម។ វិធីមួយទៀតគឺការកៀរគរអ្នកស្គាល់ ឬក៏មិត្តភ័ក្តឱ្យទៅចូលរួមទាំងអស់គ្នា ដើម្បីជួយមើលថែគ្នា អំឡុងពេលរត់ កាលធ្វើបែបនេះមិនត្រឹមតែបង្កើនបាននូវសុវត្ថិភាពប៉ុណ្ណោះទេ ប៉ុន្តែថែមទាំងជំរុញដល់អារម្មណ៍ផាសុកភាពទៀតផង៕