ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការរក្សាភាពទៀងទាត់ ក្នុងការបំពេញ ឬបញ្ចប់កិច្ចការ គឺជាគន្លឹះធ្វើឱ្យយើងរីកចម្រើន លទ្ធផលឆ្លើយតបនឹងតម្រូវការ មានវិន័យ និងបន្សល់បាននូវអារម្មណ៍ស្រឡះទាំងបច្ចុប្បន្នភាព និងពេលបន្ទាប់។ តាមរយៈគេហទំព័រ The kevin Eikenberry បានឱ្យដឹងថា ការមានអាកប្បកិរិយារក្សាបាននូវភាពទៀងទាត់ប្រចាំថ្ងៃក្នុងការបញ្ចប់ភារកិច្ច អាចរក្សាសន្ទុះ នៃលទ្ធផល ដោះស្រាយភាពលំបាកនៃកិច្ចការបានខ្លះៗ បង្រួមបញ្ហាឱ្យតូច ដែលជារួមគឺអាចដោះស្រាយភាពស្មុគស្មាញបានច្រើនជាងពេលដែលគ្មានភាពជាប់លាប់ នៃការបញ្ចេញលទ្ធផល។ ខាងក្រោមនេះ គឺជាឥទ្ធិពលវិជ្ជមាន ៤ចំណុច តាមរយៈការបញ្ចប់ភារកិច្ចដោយភាពទៀងទាត់។
១. ភាពជាប់លាប់ជាវិធីសម្រួចគោលដៅ ៖ នៅពេលដែលមានទម្លាប់បញ្ចប់កិច្ចការអ្វីមួយបានជាប់លាប់ វាក៏ផ្តល់នូវភាពងាយស្រួល ក្នុងការចាប់យកកិច្ចការបន្ទាប់ទៀត និងការសម្រួចខ្លួនឱ្យខិតជិតទៅកាន់គោលដៅ។ ហើយភាពជាប់លាប់ ក៏បានរួមចំណែកកាត់បន្ថយភាពតានតឹង និងបង្រួមបញ្ហាបន្តិចម្តងៗ។
២. ពង្រឹងជំនាញ ៖ ការបញ្ចប់កិច្ចការបានទៀងទាត់ដដែលៗ ពីមួយថ្ងៃទៅមួយថ្ងៃ ជាចំណែកមួយជួយឱ្យគ្រប់ជំនាញទាំងអស់មានភាពរឹងមាំ និងលទ្ធផលស្របនឹងការរំពឹងទុករបស់ខ្លួនឯង។ ការចម្រាញ់លទ្ធផលបានរៀងរាល់ថ្ងៃ ជាសកម្មភាពដែលដុសខាត់ជំនាញ ឬបម្លែងពីទ្រឹស្ដីទៅកាន់ការអនុវត្តជាក់ស្ដែង។ ភាពទៀងទាត់ ក៏ជាគន្លឹះអភិវឌ្ឍន៍លទ្ធផល និងជំរុញភាពលឿនរហ័ស។
៣. រក្សាទំនុកចិត្តចំពោះខ្លួនឯង ៖ ទំនុកចិត្ត គឺជាគ្រាប់ពូជនៃលទ្ធផលល្អ ហើយការជឿជាក់ថា នឹងទទួលបានលទ្ធផលវិជ្ជមាន គឺជាកត្តាជំរុញឱ្យខ្លួនឯងកាន់តែសម្បូរនូវទំនុកចិត្ត សេចក្ដីប្រឹងប្រែងក្នុងការបន្តដំណើរចំពោះការងារដែលកំពុងមាននាពេលបច្ចុបប្បន្ន។ ដូច្នេះ ការបង្កើនទំនុកចិត្តចំពោះខ្លួនឯង គឺជាឬសគល់ ជះឥទ្ធិពលទៅកាន់លទ្ធផលដែលរំពឹងទុកកន្លងមក។
៤. កសាងទំនុកចិត្តជាមួយមនុស្សជុំវិញខ្លួន ៖ ការផ្តល់លទ្ធផលបានទៀងទាត់តាមពេលវេលា និងតម្រូវការ បានបង្រៀនឱ្យអ្នកដទៃហ៊ានដាក់ការរំពឹងទុកចំពោះអ្នក ហើយការរំពឹងទុករបស់អ្នកដទៃមកកាន់អ្នកកាន់តែច្រើន នោះទំហំនៃការកសាងទំនុកចិត្តជាមួយមនុស្សជុំវិញខ្លួន កាន់តែមានភាពរីកចម្រើនមកជាមួយគ្នាដែរ។ បន្ថែមពីនោះ ការអនុវត្តសកម្មភាពបន្ថែមដែលនាំខ្លួនឯងឱ្យរក្សាបាននូវការផ្តល់លទ្ធផលបានទៀងទាត់ ជាដំបូងគឺត្រូវផ្តើមពីការប្តេជ្ញាចិត្តពីខ្លួនឯង បំផុសសំណួរចំពោះខ្លួនឯងថា ហេតុអ្វីបានជាសម្រេចធ្វើកិច្ចការណាមួយ? និងការផ្តល់គុណតម្លៃរាល់កិច្ចការទាំងអស់ ការបង្កើនទម្លាប់រក្សាវិន័យចំពោះខ្លួនឯង និងការហ៊ានទទួលយក រាល់លទ្ធផល មិនថាល្អ ឬមិនល្អ។ បន្ទាប់ពីភាពទៀងទាត់ គួរមានភាពរីករាយរាល់សកម្មភាពដែលសម្រេចចិត្តជ្រើសយក៕
