សុខភាពផ្លូវចិត្តរបស់យុវជនមានសារៈសំខាន់ក្នុងការជំរុញការសិក្សា និងការរស់នៅប្រចាំថ្ងៃ ឬរបៀបទំនាក់ទំនងក្នុងសាលា។ ការរកឃើញថ្មីៗនេះ បានបង្ហាញថា ការបង្រៀនចិត្តវិទ្យាវិជ្ជមាន ឬរបៀបរស់នៅវិជ្ជមានទៅកាន់សិស្សានុសិស្សដែលជាយុវជនដើរតួនាទីសំខាន់ក្នុងការជំរុញឱ្យពួកគេមានសុខភាពផ្លូវចិត្តល្អ និងបង្កើនសុភមង្គលជាងមុន។ ចិត្តវិទ្យាវិជ្ជមានបង្ហាញប្រាប់លម្អិតអំពី ដំណើរនៃចិត្តពេលដែលប្រែប្រួល ឬក៏រៀបរាប់អំពីសុភមង្គលរបស់មនុស្ស ថាតើធ្វើយ៉ាងណាទើបក្លាយជាមនុស្សរីករាយ អត់ធ្មត និងមេត្តាជាដើម។

យោងតាម គេហទំព័រ activebeat បានបង្ហាញតាមរយៈការស្រាវជ្រាវថា សិស្សដែលទទួលបានការបង្រៀនឱ្យមើលពិភពខាងក្រៅ ឬរបៀបរស់នៅក្នុងផ្លូវវិជ្ជមានគឺនឹងនាំឱ្យទាំងលទ្ធផលសិក្សា ក៏ដូចជាការគ្រប់គ្រងអារម្មណ៍ហាក់ទទួលបានភាពនឹងនជាងសិស្សដែលមិនបានបង្រៀនអំពីចិត្តវិទ្យាវិជ្ជមាន។ ការសម្រេចបាននូវភាពរីករាយ អារម្មណ៍ល្អ និងទង្វើល្អៗ សុទ្ធសឹងតែមានបញ្ចូលនៅក្នុងការសិក្សាអំពីចិត្តវិទ្យាវិជ្ជមាន ដែលវាជំរុញឱ្យសិស្សមានអារម្មណ៍ល្អ គិតវិជ្ជមាន ការយកចិត្តទុកដាក់អំពីជីវិត ពង្រឹងទំនាក់ទំនងវិជ្ជមាន  និងមានការគិតឆ្ពោះទៅមុខអំពីគោលបំណងឬក្ដីស្រមៃ ព្រមទាំងសម្រេចបាននូវគោលដៅមួយដែលមានន័យសម្រាប់ជីវិតពួកគេ។

បច្ចុប្បន្ននេះ មានសាលាជាច្រើន​នៅជុំវិញពិភពលោក បានដំណើរការបង្រៀនអំពីចិត្តវិទ្យាវិជ្ជមាន ក្នុងនោះមានដូចជា សហរដ្ឋអាមេរិក អូស្រ្តាលី ដាណឺម៉ាក អ៊ីស្រាអែល នូវែលហ្សេឡង់ ចិន និងអា​ព្រិច​ខាងត្បូង។ ហើយការអន្តរាគមន៍ឱ្យមានការបង្រៀនអំពីការអប់រំចិត្ត និងចិត្តវិទ្យាវិជ្ជមាន នៅក្នុងប្រព័ន្ធអប់រំគឺមានបានផ្តោតលើមាតិកាដូចជា ការបង្ហាញចំណាប់អារម្មណ៍និងសេចក្ដីដឹងគុណ បង្រៀនអំពីទង្វើល្អ ភាពស្មោះត្រង់ ផ្នត់គំនិតសុទិដ្ឋិនិយម ការស្គាល់និងប្រើប្រាស់ភាពខ្លាំង រួមទាំងទាំងការបង្រៀនអំពីការបង្កើតក្ដីសង្ឃឹមផងដែរ។ ជាគោលបំណងគឺមិនមែនគ្រាន់តែបង្ហាញ ឬបង្រៀនសិស្សឱ្យដឹងអំពីមេរៀនចិត្តវិទ្យាវិជ្ជមានដែលបញ្ចូលនៅក្នុងមុខវិជ្ជាសាលានោះទេ ប៉ុន្តែបង្រៀនក្នុងគោលដៅឱ្យពួកគេយកជំនាញទាំងនោះដើម្បីទៅអនុវត្តន៍ ហើយការសិក្សាស្រាវជ្រាវក៏បានបញ្ជាក់ថា វាពិតជាបានជួយឱ្យសិស្សមានការរីកចម្រើនទាំងការសិក្សា និងការរស់នៅ។

ជាធម្មតា នៅក្នុងដំណាក់កាលរៀនដំបូងៗ សិស្សរៀនអំពីទ្រឹស្តី ឬគោលគំនិតដែលមាននៅក្នុងចិត្តវិទ្យាវិជ្ជមាន បន្ទាប់មកយកទៅប្រើប្រាស់នៅក្នុងជីវិតជាក់ស្ដែង ដែលវាជួយឱ្យពួកគេកាន់ដែលយល់ដឹងអំពីការយកចិត្តទុកដាក់ទៅកាន់មនុស្សជុំវិញខ្លួន។ ជាឧទាហរណ៍ អ្វីទៅជាចំណាប់អារម្មណ៍នៃការរឭកដឹងគុណ តើវាមានន័យបែបណាទៅកាន់ពួកគេ? ការបំផុសសំណួរបែបនេះ​ឱ្យពួកគេពិភាក្សាគ្នា បន្ទាប់មកឱ្យពួកគេសរសេរចុះទៅក្នុងក្រដាស អំពីអ្វីដែលគេចង់និយាយអរគុណ ឬអ្វីដែលពួកគេពេញចិត្ត ដោយសរសេរសកម្មភាពទាំងនោះមុនពេលចូលគេង។ កំឡុងពេលរសរសេរបែបនេះ មនុស្សធំក៏អាចផ្តល់ជាគន្លឹះនិងការណែនាំបានដែរ។ មួយសប្តាហ៍ក្រោយមក អនុញ្ញាតិឱ្យពួកគេមានឱកាស ពិភាក្សាជាមួយមិត្តរួមថ្នាក់អំពីលទ្ធផលដែលពួកគេទទួលបាន ហើយការធ្វើបែបនេះវាបានជះឥទ្ធិពលវិជ្ជមានបែបណាទៅកាន់ជីវិតរបស់ពួកគេ។

មានសាលាចំនួន៥៧ បានបង្ហាញថា ក្រោយការបញ្ចូលមុខវិជ្ជា ចិត្តវិទ្យាវិជ្ជមាន ក្នុងកម្មវិធីសិក្សា ជាលទ្ធផលនោះគឺ ជួយឱ្យសិស្សកាត់បន្ថយភាពស្រ្តេស បញ្ចៀសជំងឺបាក់ទឹកចិត្ត កាត់បន្ថយភាពតានតឹង អាកប្បកិរិយាមិនសមរម្យត្រូវបានកាត់បន្ថយ ការមើលខ្លួនឯងនៅក្នុងរូបភាពវិជ្ជមាន មានការពេញចិត្តចំពោះដំណើរជីវិត និងបង្កើនភាពខ្លាំងផ្នែកទំនាក់ទំនងសង្គម៕