ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បើតាមការលើកឡើងរបស់លោកវេជ្ជបណ្ឌិត ឈឹម សុធារ៉ា អ្នកឯកទេសខាងជំងឺផ្លូវចិត្តបាននិយាយថា ស្រ្តេសដែលគ្រប់គ្នាដឹងថា គឺជាភាពតានតឹង តប់ប្រម៉ល់ តាមពិតទៅវាមិនមែនជាជំងឺនោះទេ ។ តាមលោកវេជ្ជបណ្ឌិត ស្រ្តេស គឺជាប្រតិកម្មរបស់សរីរាង្គយើង ទល់នឹងសម្ពាធ បញ្ហា ឬគ្រោះថ្នាក់ខាងក្រៅ ហើយក្នុងករណីស្រ្តេសមានកម្រិតតិចតួច គឺវាជួយយើងឱ្យសម្រេចគោលដៅ ឱ្យផុតពីគ្រោះថ្នាក់ តែបើវាញឹកញាប់ មានកម្រិតធ្ងន់ធ្ងរ និងមានរយៈពេលយូរ នោះវាទៅជាគ្រោះថ្នាក់សម្រាប់យើងវិញ។
លោកវេជ្ជបណ្ឌិតបានបកស្រាយថា នៅពេលដែលយើងមានជម្លោះ ឬយើងមានសម្ពាធការងារច្រើន ឬសិស្សជិតដល់ថ្ងៃប្រឡង ឬក៏បញ្ហាប្រឈមនឹងគ្រោះថ្នាក់ផ្សេងៗទៀត, ពេលនោះ ក្នុងខ្លួនយើងនឹងមានប្រតិកម្មទាក់ទងទៅនឹងរាង្គកាយ ផ្លូវចិត្ត និងសរីរសាស្រ្ត ដែលជាប្រតិកម្មលក្ខណៈធម្មជាតិ ។
លោកវេជ្ជបណ្ឌិត ឈឹម សុធារ៉ា
“អ្នកណាក៏ដោយ ក៏មានប្រតិកម្មអញ្ចឹងទាំងអស់គ្នា អញ្ចឹងការមានប្រតិកម្មទាំងអស់ហ្នឹង វាមិនមែនជាជំងឺនោះទេ វាគ្រាន់តែជាសញ្ញា ដែលខ្លួនយើងដាស់យើងឱ្យភ្ញាក់រលឹក ឱ្យយើងដឹងថា យើងអាចនឹងមានគ្រោះថ្នាក់ យើងអាចនឹងមានបញ្ហា “
ប៉ុន្តែប្រសិនបើយើងជួបនូវបញ្ហានេះដដែលៗយូរៗទៅ មានជាប់ជាប្រចាំ ដូច្នេះ ស្រ្តេស ដែលវានឹងជួយយើង វាជួយរំលឹកយើង ជួយយើងត្រៀមទប់ទល់នឹងសភាពការណ៍ ជួយឱ្យយើងសម្រេចការងារបានជោគជ័យ វានឹងលែងជួយទៀតហើយ វានឹងក្លាយទៅជាបំផ្លិចបំផ្លាញយើង ពោលគឺពេលនោះ ស្រ្តេស វានឹងក្លាយទៅជា អូតូស្រ្តេស។
បើតាមប្រសាសន៍របស់លោកវេជ្ជបណ្ឌិត អូតូស្រ្តេស គឺមានឈ្មោះថា ជំងឺ Autoimmune Disorders ដែលជាជំងឺមួយធ្វើឱ្យប្រព័ន្ធការពារខ្លួនយើង បែរជាបំផ្លាញខ្លួនយើងវិញ។
លោកវេជ្ជបណ្ឌិត ឈឹម សុធារ៉ា
” នៅក្នុងខ្លួនយើងមានប្រព័ន្ធការពារខ្លួនយើង… យើងចាក់វ៉ាក់សាំងដើម្បីបង្កើតប្រព័ន្ធការពារខ្លួន ដើម្បីការពារខ្លួនយើង ប៉ុន្តែក្នុងករណីខ្លះប្រព័ន្ធការពារខ្លួន វាអត់ការពារខ្លួន វាទៅជាបំផ្លាញខ្លួនយើងវិញ ដែលគេហៅថា ជំងឺ Autoimmune “
លោកវេជ្ជបណ្ឌិតបញ្ជាក់ថា ប្រសិនបើបងប្អូនជួបបញ្ហាស្រ្តេសញឹកញាប់ ខ្លាំង យូរដោះស្រាយមិនចេញ បងប្អូនអាចមានបញ្ហាដែលទាក់ទងទៅនឹងអូតូស្រ្តេស ហើយពេលនោះ បងប្អូនអាចមានជំងឺថប់បារម្ភ ឬជំងឺធ្លាក់ទឹកចិត្ត ឬក៏ជំងឺផ្លូវចិត្តផ្សេងៗទៀត ។
ដូច្នេះ ប្រសិនបើបងប្អូនដឹងថាខ្លួនឯងមាន អូតូស្រ្តេស សូមស្វែងរកការពិគ្រោះជាមួយវេជ្ជបណ្ឌិតឯកទេសជំងឺផ្លូវ ឬក៏ជាមួយអ្នកជំនាញខាងផ្នែកចិត្តសាស្រ្ត ដើម្បីរកវិធីក្នុងការដោះស្រាយបញ្ហាទាក់ទិនទៅនឹងស្រ្តេស និងអូតូស្រ្តេសនេះ៕
