ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ធនធានមនុស្ស (Human Resource) និងមូលធនមនុស្ស (Human Capital) គឺជាពាក្យពីរដែលអាន ឬស្ដាប់ទៅស្រដៀងគ្នាខ្លាំង ខណៈទាំងធនធានមនុស្ស និងមូលធនមនុស្ស សុទ្ធតែទាក់ទងទៅនឹងជំនាញ និងទេពកោសល្យរបស់មនុស្ស។
ពាក្យទាំងពីរនេះ ច្រើនតែមានការយល់ច្រឡំ និងពិបាកបែងចែកអត្ថន័យឱ្យបានដាច់ស្រេច ប៉ុន្តែក៏មានចំណុចរួម និងចំណុចដាច់ដោយឡែកដែរ ។ នៅក្នុងអត្ថបទនេះ យើងនឹងស្វែងយល់ឱ្យបានច្បាស់ អំពីអត្ថន័យរួម និងអត្ថន័យដាច់ដោយឡែករវាងពាក្យទាំងពីរនេះ។
មូលធនមនុស្ស
បុគ្គលិកដែលមានជំនាញ ឆ្លងកាត់ការបណ្ដុះបណ្ដាល មានបទពិសោធន៍ មានការអប់រំ ព័ត៌មានទូលំទូលាយ ចំណេះដឹងជ្រៅជ្រះ សមត្ថភាពគិតត្រេះរិះពិចារណា និងផលិតភាពការងារខ្ពស់ ត្រូវបានគេហៅថា មូលធនមនុស្ស ឬក៏ អាចនិយាយមួយបែបទៀតថា មូលធនមនុស្ស គឺជាតម្លៃ ដែលបុគ្គលផ្ដល់ឱ្យក្រុមហ៊ុន ឬស្ថាប័ន ដែលខ្លួនកំពុងបំពេញការងារ ដែលតម្លៃនោះ អាចវាយតម្លៃបាន តាមរយៈជំនាញ និងសមត្ថភាពស្ដង់ដា ក្នុងការប្រកួតជែងរបស់បុគ្គល ។
មូលធនមនុស្ស គឺជាធាតុផ្សំដ៏សំខាន់នៃផលិតកម្ម។ ខណៈការជ្រើសរើសបុគ្គលិក ដែលមានការអប់រំ បទពិសោធន៍ ជំនាញ និងការបណ្ដុះបណ្ដាលត្រឹមត្រូវ ក៏អាចបង្កើនប្រសិទ្ធភាព ផលិតភាព និងប្រាក់ចំណេញសម្រាប់ស្ថាប័នផងដែរ។
ដើម្បីឱ្យបុគ្គលិកក្លាយជាមូលធនមនុស្សសម្រាប់ស្ថាប័ន ក្រុមហ៊ុន ឬម្ចាស់អាជីវកម្ម អាចវិនិយោគលើបុគ្គលិករបស់ខ្លួន តាមរយៈការផ្ដល់ឱកាសពួកគេអាចទទួលបានការបណ្ដុះបណ្ដាល និងការអប់រំបន្ថែមជាប្រចាំ។ ការអភិវឌ្ឍ និងបណ្តុះបណ្ដាលបុគ្គលិក អាចជួយឱ្យពួកគេមានសមត្ថភាព ជំនាញ និងចំណេះដឹងកាន់តែទូលំទូលាយ។ ចំណែកក្រុមហ៊ុន អាចកាត់បន្ថយការចំណាយលើការជួលបុគ្គលិកបន្ថែម នៅពេលដែលស្ថាប័នខ្លួនមានបុគ្គលិកដែលជាមូលធនមនុស្ស។
យ៉ាងណាក៏ដោយ រឿងមួយ ដែលម្ចាស់ស្ថាប័នត្រូវដឹងគឺ សមត្ថភាពរបស់បុគ្គលិកម្នាក់ៗគឺមិនស្មើរគ្នានោះទេ។ ដូច្នេះ អភិវឌ្ឍមូលធនមនុស្ស អាចត្រូវបានអភវិឌ្ឍតាមរយៈវិធីផ្សេងៗគ្នា ទើបអាចបង្កើនតម្លៃសេដ្ចកិច្ចរបស់ក្រុមហ៊ុនបាន។
ធនធានមនុស្ស
ការយល់អំពីបញ្ញាត្តិនៃពាក្យ ធនធាន គឺជាវិធីសាស្ត្រសាមញ្ញបំផុត ក្នុងការពន្យល់អត្ថន័យនៃពាក្យធនធានមនុស្ស។ ពាក្យថា ធនធាន គឺសំដៅទៅលើបណ្ដុំទ្រព្យសកម្ម ដែលជាសម្បត្តិដែលយើងអាចទាយយកបានតាមតម្រូវការ រហូតទាល់តែទ្រព្យនោះអស់។
ធនធានមនុស្ស គឺអាចប្រៀបធៀបបាន ទៅនឹងក្រុមមនុស្សមានសក្តានុពល ក្នុងការក្លាយជាបុគ្គលដែលមានចំណេះដឹង ជំនាញ និងប្រសិទ្ធភាពការងារ។ ឬអាចនិយាយម្យ៉ាងទៀតថា វាគឺជាសក្តានុពលរបស់មនុស្ស ក្នុងការបង្កើនប្រសិទ្ធភាព ការផលិត និងប្រាក់ចំណេញសម្រាប់ស្ថាប័ន។
តើអ្វីជាភាពខុសគ្នារវាង ធនធានមនុស្ស និងមូលធនមនុស្ស?
ធនធានមនុស្ស និងមូលធនមនុស្ស មានទំនាក់ទំនងគ្នាយ៉ាងជិតស្និទ្ធ ដែលពាក្យទាំងពីរនេះ អាចទុកថា ជំនាញរបស់មនុស្សដែលអាចប្រើប្រាស់បាន ក្នុងការបង្កើនប្រសិទ្ធភាពការងារ និងប្រាក់ចំណេញ។
ប៉ុន្តែធនធានមនុស្ស គឺជាមនុស្ស ដែលមានសក្តានុពល ក្នុងការទាញយកពីធនធាន។ ចំណែក មូលធនមនុស្ស គឺជាមនុស្ស ដែលមានមូលធន (សុខភាព សមត្ថភាព ចំណេះដឹង និងជំនាញ) រួចជាស្រេចក្នុងការទាញយកធនធាន។ មូលធនមនុស្ស គឺផ្ដោតសំខាន់ទៅលើជំនាញ និងចំណេះដឹង ដែលមានរួចជាស្រេចហើយ និងអាចយកទៅប្រើប្រាស់បាន។
ធនធានមនុស្ស ចាំបាច់ត្រូវឆ្លងកាត់ការបណ្ដុះបណ្ដាល អភិវឌ្ឍ ផ្ដល់ឱកាស និងការប្រកួតប្រជែង។ ធនធានមនុស្ស អាចអភិវឌ្ឍទៅជាមូលធនមនុស្សបាន គឺត្រូវការពេលវេលា ទើបពួកអាចទទួលបាន បំណិនជីវិត សមត្ថភាពបំពេញការងារប្រកបដោយប្រសិទ្ធភាព និងការប្រកួតជែង។ ធនធានមនុស្ស អាចក្លាយជាមូលធនមនុស្ស ដោយទទួលបានពីការវិនិយោគ និងផ្ដល់ឱកាសឱ្យចូលរួមក្នុងប្រតិបត្តិការការងារផ្សេងៗ៕
