មានកត្តារួមផ្សំជាច្រើន ដែលបង្ករឱ្យអ្នកមានអារម្មណ៍នឿយហត់គ្រប់ពេល ហើយកត្តាទាំងនោះអាចមានដូចជា ការគេងមិនគ្រប់គ្រាន់ ស្ត្រេស របបអាហារមិនល្អ ឬរបៀបរស់នៅជាដើម។ យោងតាម NHS បានបង្ហាញថា ប្រសិនបើអ្នក មានអារម្មណ៍ថា នឿយហត់គ្រប់ពេល និងមិនអាចផ្ដោតអារម្មណ៍ធ្វើការងារបានល្អ អ្នកអាចសាកល្បងអនុវត្តគន្លឹះចំនួន ៩ ខាងក្រោមនេះ ដើម្បីបង្កើនថាមពលរបស់អ្នកឡើងវិញ។

១. ញ៉ាំឱ្យបានញឹកញាប់ ដើម្បីបំបាត់ភាពនឿយហត់ ៖ មធ្យោបាយដ៏ល្អក្នុងការរក្សាថាមពលរបស់អ្នកពេញមួយថ្ងៃ គឺការញ៉ាំអាហារទៀងទាត់ជារៀងរាល់ ៣ ទៅ ៤ម៉ោង ជាជាងញ៉ាំឱ្យឆ្អែតខ្លាំងតែម្ដង។

២. ធ្វើចលនា ៖ ការហាត់ប្រាណជាទៀងទាត់ នឹងធ្វើឱ្យអ្នកមានអារម្មណ៍ថា មិនសូវអស់កម្លាំង និងមានថាមពលច្រើនជាងធម្មតា។ សូម្បីតែដើររយៈពេលត្រឹមតែ ១៥នាទី ក៏អាចផ្ដល់ថាមពល និងធ្វើឱ្យរាងកាយអ្នកមានភាពសកម្មជាងមុនផងដែរ។

អ្នកអាចចាប់ផ្ដើមទម្លាប់ហាត់ប្រាណម្ដងបន្តិចៗ និងហ្វឹកហាត់ឱ្យបានទៀងទាត់ច្រើនសប្ដាហ៍ និងច្រើនខែ រហូតដល់អាចមានលទ្ធភាពហាត់ក្នុងរយៈពេលវែងបាន។

៣. សម្រកទម្ងន់ ដើម្បីទទួលបានថាមពល ៖ ប្រសិនបើរាងកាយរបស់អ្នកផ្ទុកទម្ងន់លើស អ្នកនឹងងាយឆាប់អស់កម្លាំង។ ការលើសទម្ងន់ នឹងបន្ថែមភាពតាន​តឹង​លើបេះដូង ដែលអាចធ្វើឱ្យអ្នកឆាប់អស់កម្លាំង។ ប៉ុន្តែ ការសម្រកទម្ងន់ នឹងធ្វើឱ្យអ្នកមានអារម្មណ៍ស្វាហាប់ជាងមុន។ ក្រៅពីការញ៉ាំអាហារសុខភាព វិធីល្អបំផុត ដើម្បីរក្សា និងសម្រកទម្ងន់ គឺធ្វើខ្លួនឱ្យសកម្ម និងធ្វើលំហាត់ប្រាណឱ្យបានច្រើន។

៤. គេងស្កប់ស្កល់ ៖ មានមនុស្សជាច្រើន មានបញ្ហាពិបាកគេង គេងមិនលក់ស្រួល និងស្កប់ស្កល់ ដែលជាមូលហេតុមានអារម្មណ៍ថាអស់កម្លាំង និងខ្វះថាមពលគ្រប់ពេល។ ដើម្បីគេងលក់ស្កប់ស្កល់ អ្នកអាចអនុវត្តទម្លាប់មួយចំនួនដូចជា ចូលគេងឱ្យបានទៀងទាត់, ជៀសវៀងការគេងថ្ងៃ, សម្មាធិ ឬសម្រាករាងកាយ មុនចូលគេង។

៥. កាត់បន្ថយភាពតានតឹង ដើម្បីបង្កើនថាមពល ៖ ភាពតានតឹង ត្រូវឱ្យអ្នកប្រើថាមពលច្រើន។ ដូច្នេះ អ្នកអាចអនុវត្តសកម្មភាពមួយចំនួន ដើម្បីកាត់បន្ថយអារម្មណ៍តានតឹងដូចជា ហាត់ប្រាណ, ហាត់យូហ្គា, ស្ដាប់តន្រ្តី ឬអានសៀវភៅ និងចំណាយពេលជាមួយមិត្តភក្តិជាដើម។ សកម្មភាពអ្វីក៏ដោយ ឱ្យតែធ្វើឱ្យអ្នកមានអារម្មណ៍ថា បានសម្រាក នឹងជួយបង្កើនថាមពលរបស់អ្នក។

៦. ប្រឹក្សាជាមួយអ្នកជំនាញ ៖ មានភស្ដុតាងមួយចំនួនបានបង្ហាញថា ការព្យាបាល តាមរយៈការនិយាយ ដូចជាការប្រឹក្សាយោបល់ (Counselling) ឬ CBT (Cognitive behavioral therapy) អាចជួយប្រឆាំងនឹងភាពអស់កម្លាំង ឬការអស់កម្លាំងដោយសារអារម្មណ៍តានតឹង និងការថប់បារម្ភ។

៧. កាត់បន្ថយការទទួលទានកាហ្វេអ៊ីន ៖​ ជាតិកាហ្វេអ៊ីន គឺជាសារធាតុរំញោច ដែលធ្វើឱ្យអ្នកមានអារម្មណ៍ភ្ញាក់។ ប៉ុន្តែវាក៏រំខានចង្វាក់ នៃការគេងរបស់អ្នកផងដែរ ដែលនាំឱ្យមានបញ្ហាដំណេក ហើយបន្ទាប់មកអស់កម្លាំងនៅពេលថ្ងៃ។ ផលិតផល ដែលផ្ទុកសារធាតុកាហ្វេអ៊ីន ត្រូវបានគេរកឃើញនៅក្នុង កាហ្វេ តែ ភេសជ្ជៈកូឡា ភេសជ្ជៈប៉ូវកម្លាំង ថ្នាំបំបាត់ការឈឺចាប់ និងឱសថរុក្ខជាតិមួយចំនួន។

កាហ្វេអ៊ីនមានឥទ្ធិពលលើរាងកាយរបស់អ្នក ក្នុងរយៈពេល ៧ម៉ោង។ ដូច្នេះ អ្នកអាចជៀសវៀងការទទួលទាននៅពេលល្ងាច ប្រសិនបើអ្នកមានបញ្ហាដំណេក។ យ៉ាងណាក៏ដោយ ការព្យាយាមបញ្ឈប់ទទួលទានកាហ្វេអ៊ីនភ្លាមៗ អាចនាំឱ្យមានបញ្ហាគេងមិនលក់ និងឈឺក្បាល។ ហេតុនេះ អ្នកជំនាញណែនាំឱ្យអ្នកកាត់បន្ថយ ម្ដងបន្តិចៗ។

៨. ទទួលទានស្រាក្នុងកម្រិតតិចតួច ៖ ទោះបីជាស្រាពីរ បីកែវនៅពេលល្ងាចជួយឱ្យអ្នកងងុយគេងក៏ដោយ ប៉ុន្តែអ្នកគេងមិនស្កប់ស្កល់នោះទេ ក្រោយពេលទទួលទានស្រារួច។ នៅថ្ងៃបន្ទាប់ អ្នកនឹងមានអារម្មណ៍នឿយហត់ ទោះបីជាអ្នកគេងគ្រប់ ៨ម៉ោងក៏ដោយ។ ការកាត់បន្ថយការទទួលទានគ្រឿងស្រវឹងមុនពេលចូលគេង នឹងជួយឱ្យអ្នកគេងស្កប់ស្កល់ និងមានថាមពលបំពេញការងារ។

៩. ទទួលទានទឹកឱ្យបានច្រើន ៖ ពេលខ្លះអ្នកមានអារម្មណ៍ថានឿយហត់ ដោយសារតែអ្នកខ្វះជាតិទឹក។ ការទទួលទានទឹកគ្រប់គ្រាន់ នឹងជួយឱ្យអ្នកមានអារម្មណ៍ល្អ ព្រមទាំងមានថាមពលធ្វើការ៕