ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អ្នកណែនាំ (Mentor) អាចជាប្រភព នៃកំណប់គំនិត ដែលអាចណែនាំ ផ្ដល់មតិកែលម្អ និងគាំទ្រដល់ការអភិវឌ្ឍអាជីព និងជីវិតផ្ទាល់ខ្លួនរបស់អ្នក។ ប៉ុន្តែ ការស្វែងរកអ្នកណែនាំ (Mentor) នៅក្នុងវិស័យការងាររបស់អ្នក មិនមែនជាកិច្ចការងាយស្រួលប៉ុន្មាននោះទេ។ ជាពិសេស នៅពេលដែលអ្នកជាបុគ្គល ដែលមិនសូវមានបណ្ដាញនៅក្នុងសង្គម ឬគំនិតច្បាស់លាស់អំពីអ្វី ដែលអ្នកចង់ពង្រឹង។ យ៉ាងណាក៏ដោយ មានការអនុវត្តចំនួន ៥ចំណុច សម្រាប់ការកំណត់អត្តសញ្ញាណអ្នកណែនាំ (Mentor) ដែលមានសក្កានុពលសម្រាប់អ្នក។
១. កំណត់គោលដៅ និងការរំពឹងទុក ៖ មុនពេលចាប់ផ្ដើមស្វែងរកអ្នកណែនាំ (Mentor) អ្នកត្រូវមានចក្ខុវិស័យច្បាស់លាស់អំពីអ្វីដែលអ្នកចង់សម្រេច និងប្រភេទជំនួយដែលអ្នកត្រូវការ។ តើអ្នកចង់ពង្រឹងជំនាញអ្វី ? ដោះស្រាយបញ្ហាអ្វី ? ឬក៏ចង់ជ្រើសរើសអាជីពអ្វី ? តើអ្នកចង់បានអ្នកណែនាំ (Mentor) ដែលមានលក្ខណៈផ្លូវការ ឬក្រៅផ្លូវការ? ហើយអ្នកចង់មានទំនាក់ទំនងជាមួយអ្នកណែនាំ (Mentor) របស់អ្នកញឹកញាប់កម្រិតណា ? ការកំណត់គោលដៅ និងការរំពឹងទុក ដែលមានលក្ខណៈច្បាស់លាស់ និងជាក់ស្ដែង នឹងជួយឱ្យអ្នកងាយស្រួលស្វែងរកអ្នកណែនាំ (Mentor) និងអាចបង្កើតទំនាក់ទំនង ដែលមានលក្ខណៈស៊ីជម្រៅ។
២. កំណត់អ្នកណែនាំដែលមានសក្តានុពល ៖ នៅពេលដែលអ្នកបានកំណត់គោលដៅ និងការរំពឹងទុករបស់អ្នករួចហើយ អ្នកអាចចាប់ផ្តើមស្វែងរកអ្នកណែនាំដែលមានសក្តានុពលត្រូវនឹងអ្វីដែលអ្នកបានកំណត់នៅចំណុចទីមួយ។ អ្នកអាចប្រើប្រភពផ្សេងៗ ដើម្បីស្វែងរកអ្នកណែនាំ ដូចជា វេទិកាអនឡាញ បណ្ដាញអតីតសិស្ស-និស្សិត ប្រពន្ធផ្សព្វផ្សាយសង្គម មិត្តរួមការងារ ឬប្រធានអ្នកជាដើម។ លើសពីនេះ អ្នកត្រូវស្វែងរកបុគ្គលដែលមានបទពិសោធន៍ជំនាញ និងគុណតម្លៃពាក់ព័ន្ធនឹងអ្វីដែលអ្នកចង់អភិវឌ្ឍ ហើយបុគ្គលនោះជាមនុស្សដែលមានឆន្ទៈក្នុងការចែករំលែក និងអាចណែនាំអ្នកដទៃ។ អ្នកក៏អាចពិចារណា អ្នកណែនាំ (Mentor) ច្រើនជាងម្នាក់ដែរ អាស្រ័យលើតម្រូវការ និងចំណាប់អារម្មណ៍របស់អ្នក។
៣. ចាប់ផ្តើមទំនាក់ទំនង ៖ បន្ទាប់ពីអ្នកបានកំណត់អត្តសញ្ញាណអ្នកណែនាំសក្តានុពលមួយចំនួន អ្នកត្រូវចាប់ផ្តើមទំនាក់ទំនង និងបង្ហាញពីចំណាប់អារម្មណ៍របស់អ្នក។ អ្នកអាចផ្ដើមទំនាក់ទំនងតាមរយៈមធ្យោបាយណាមួយ ដែលអ្នកគិតថាសក្ដិសម ដូចជា ផ្ញើអ៊ីម៉ែល ផ្ញើសារ ការអញ្ជើញទៅជួបគ្នា ឬក៏របៀបណែនាំខ្លួនផ្សេងៗទៀត ដែលអ្នកអាចពន្យល់ពីមូលហេតុ ដែលអ្នកចង់ភ្ជាប់ទំនាក់ទំនងជាមួយពួកគេ ។ ប៉ុន្តែអ្នកត្រូវដឹងច្បាស់អំពីអ្វី ដែលអ្នកអាចរៀន និងទាញប្រយោជន៍ពីការណែនាំរបស់ពួកគេ ។ ម្យ៉ាងទៀត សូមកុំរំពឹងថា នឹងមានការឆ្លើយតបភ្លាមៗ ហើយកុំបាក់ទឹកចិត្ត ប្រសិនបើអ្នកមិនទទួលបានការឆ្លើយតប។
៤. បង្កើតទំនាក់ទំនង និងទំនុកចិត្ត ៖ ប្រសិនបើអ្នកទទួលបានការឆ្លើយតបវិជ្ជមាន ត្រូវព្យាយាមបង្កើត និងរក្សាទំនាក់ទំនង ព្រមទាំងផ្ដល់ទំនុកចិត្តលើមតិយោបល់របស់គេ។ នៅពេលមានកិច្ចសន្ទនា អ្នកត្រូវព្យាយាមសួរសំណួរ ដែលអ្នកឆ្ងល់ឱ្យបានច្រើនតាមលទ្ធភាព បង្ហាញការយកចិត្តទុកដាក់ក្នុងការស្ដាប់ (ករណីជួបផ្ទាល់) ចែករំលែងប្រវត្តិ និងបំណងប្រាថ្នារបស់អ្នកឱ្យគាត់បានដឹង។ អ្នកអាចបង្ហាញការអរគុណ ចំពោះការចំណាយពេលវេលា និងដំបូន្មានរបស់គេ ហើយជៀសវៀងការទាមទារខ្លាំងពេក ឬរំខានការងាររបស់អ្នកណែនាំ។
៥. រក្សាទំនាក់ទំនង ៖ នៅពេលដែលអ្នកបានបង្កើតទំនាក់ទំនង ជាមួយអ្នកណែនាំរបស់អ្នកហើយ អ្នកត្រូវមានការប្រាស្រ័យទាក់ទងជាមួយគេជាប្រចាំ។ ដើម្បីទទួលបានមតិយោបល់ថ្មីៗ តាមដានការរីកចម្រើននៃផែនការជីវិតរបស់អ្នក។ អ្នកត្រូវប្រាកដថា អ្នកបានធ្វើបច្ចុប្បន្នភាព ជាមួយអ្នកណែនាំរបស់អ្នកអំពីសមិទ្ធិផល និងបញ្ហាប្រឈមរបស់អ្នករាល់ពេលជួបគ្នា ឬមានកិច្ចសន្ទនា៕
