ឆ្លើយតបទៅនឹងលទ្ធផលវិជ្ជមាននៅចុងឆ្នាំ ឬភាពរីករាយក្នុងការចាប់ផ្តើមឆ្នាំថ្មី មិនត្រឹមតែការសរសេរផែនការ ឬការបង្កើតសកម្មភាពមួយមុខតែប៉ុណ្ណោះទេ ប៉ុន្តែត្រូវការយុទ្ធសាស្រ្តដើម្បីរក្សាភាពវិជ្ជមានឱ្យមានភាពយូរអង្វែង ​និងកម្លាំងចិត្តក្នុងការបន្តសម្រេចបាននូវលទ្ធផល។ ឆ្នាំថ្មី ជាឱកាសមួយដ៏មានន័យ និងមានប្រសិទ្ធភាព ក្នុងការបើកទំព័ររបៀបរស់នៅថ្មីៗ មិនថាទម្លាប់ការសិក្សានិងការងារ ការតាំងចិត្ត និងការពង្រឹងសុខភាពជាដើមទើបសកម្មភាពនៃការប្តេជ្ញាចិត្តឆ្នាំថ្មី ក្លាយជាប្រធានបទមួយដ៏ពេញនិយមក្នុងការចាប់ផ្តើមប្រតិបត្តិនៅឆ្នាំថ្មី ។ តាមរយៈគេហទំព័រ VeryWell Mind បានចែកជូនគន្លឹះ ១០ចំណុចក្នុងការរក្សាទឹកចិត្តឱ្យមានថាមពលបន្តផែនការ និងការប្តេជ្ញាចិត្តឱ្យចប់ចុង ចប់ដើម។

១. រំឮកពីបុព្វហេតុ ៖ បង្កើតសកម្មភាពសម្រាប់ឆ្នាំថ្មី គឺជាការជំរុញខ្លួនឯង ការដាក់វិន័យចំពោះខ្លួនឯងឱ្យធ្វើសកម្មភាពណាដែលទាក់ទងទៅដល់ភាពរីកចម្រើនទាំងក្នុងរយៈពេលខ្លី និងរយៈពេលវែង។ មួយវិញទៀត ការប្តេជ្ញាសម្រាប់ឆ្នាំថ្មី គឺជាដើមចម ក្នុងការបណ្តុះមនសិការ ការតាំងចិត្ត និងឆន្ទៈទទួលខុសត្រូវខ្ពស់ចំពោះខ្លួនឯង ក៏ដូចជាការត្រៀមរៀបចំយុទ្ធសាស្រ្តផ្ទាល់ខ្លួន ដើម្បីពង្រឹងភាពក្លាហានប្រឈមជាមួយបញ្ហា។ គួរជម្រាបជូនថា បុគ្គលដែលធ្វើការប្តេជ្ញាចិត្តបានជាប់លាប់ ជារៀងរាល់ឆ្នាំសុទ្ធតែមានគោលដៅរៀបចំជីវិតឱ្យមានភាពល្អប្រសើរ ឬព្យាយាមនៅឱ្យកៀកនឹងក្ដីស្រមៃ តែទោះបីមិនបានអនុវត្តបានទៀងទាត់ក៏ពិតមែន គឺមិនទាន់បានបញ្ជាក់ពីភាពបរាជ័យនោះទេ អាចមកពីភាពមិនប្រក្រតីនៃការកំណត់គោលដៅ ឬក៏ហេតុផលដទៃទៀត។

២. ស្វែងរកលក្ខណពិសេសរបស់គោលដៅ ៖ រៀងរាល់ឆ្នាំថ្មីខិតមកដល់ម្តងៗ យុវជន និងយុវនារីរាប់លាននាក់ បានប្តេជ្ញាចិត្តកែទម្លាប់រស់នៅដើម្បីសម្រកទម្ងន់ រក្សាការងារឱ្យមានផលិតភាពកាន់តែច្រើនជាងមុន ឬការហាត់ប្រាណដើម្បីទទួលបានរាងស្រឡូននៅឆ្នាំក្រោយជាដើម។ ទោះបីក្ដីរំពឹងមានច្រើនយ៉ាងណា តែអ្វីដែលសម្រេចឱ្យបាននោះគឺ ការជ្រើសរើសតែក្ដីរំពឹងសំខាន់ៗ និងមានទំហំតូចៗ ទើបមិនសូវមានភាពខកចិត្តនៅពេលផ្ទៀងផ្ទាត់លទ្ធផលផ្ទាល់ខ្លួននៅចុងឆ្នាំ។

៣. មានដែនកំណត់ពេលធ្វើការប្តេជ្ញាចិត្ត ៖ ស្របពេលដែលគោលដៅមានច្រើន ប៉ុន្តែអ្នកផ្តល់ប្រឹក្សាលើការរៀបចំសកម្មភាពតែងតែលើកទឹកចិត្តឱ្យជ្រើសតែមួយ ឬក្នុងចំនួនតិចតួចបំផុតតែមានភាពសំខាន់ខ្លាំង។ ការផ្តោតលើគោលដៅមួយក្នុងពេលតែមួយ គឺជាកត្តាផ្តល់ភាពជឿជាក់ចំពោះខ្លួនឯង រួមទាំងមានទឹកចិត្តបន្ដការងារក្នុងរយៈពេលវែង រួមទាំងវិសាលភាពនៃគំនិតក្នុងការផ្លាស់ប្តូរ ឬពុះបំបែកកិច្ចការទៅក្នុងទំហំតូចៗ។

៤. ផែនការត្រូវការកំណត់ពេលបញ្ចប់ ៖ កាលដែលរង់ចាំរហូតដល់នាទីចុងក្រោយទើបជ្រើសរើសគោលដៅ ឬក៏អស់ពេលហើយទើបចាប់ផ្តើមស្លន់ស្លោរកវិធីសាស្រ្ត គឺពុំផ្តល់នូវផលវិជ្ជមានប៉ុន្មាននោះទេ។ ការសម្រេចចិត្ត និងធ្វើសកម្មភាពបានទាន់ពេល ពាក់ព័ន្ធនឹងជំហានសកម្មភាពនីមួយៗ គឺជាការចាប់ផ្តើមមួយដែលមានភាគរយខ្ពស់លើការបង្កើនប្រសិទ្ធភាព។ ព្រោះពេលដែលមិនមានគោលដៅ នោះភាពងាយស្រួលដែលសម្រេចចិត្តបោះបង់ចោល ក៏នឹងកើតមានលឿនដូចគ្នា។ ដូច្នេះជាជំហានដំបូង ចាប់ផ្តើមដោយការសរសេរគោលដៅ ហើយរកឱ្យឃើញអ្វីជាឧបសគ្គ និងវិធីទប់ទល់ទុកជាមុន ដែលសកម្មភាពទាំងនេះ ជាចំណែកមួយនៃការរៀបចំខ្លួន។

៥. មានក្តីស្រមៃធំៗ តែចាប់ផ្តើមពីតូច ៖ ចាប់យកសកម្មភាពចម្រុះពេក ក៏ជាហេតុផលមួយរុញច្រានទៅរកភាពបរាជ័យ ហើយការចាប់ផ្តើមតឹងរឹងពេក ធំៗពេក អាចនឹងមិនឆ្លើយតបក្នុងរយៈពេលវែង ដូចជាហាត់ប្រាណសម្រកទម្ងន់លឿនពេក ដូច្នេះត្រូវចាប់ផ្តើមពីជំហានមួយដែលតូចសមល្មម ជាឧទាហរណ៍បើមានគោលដៅរត់ម៉ារ៉ាតុង គួរតែចាប់ផ្តើមក្នុងមួយសប្តាហ៍សាកល្បងរត់ក្នុងរយៈពេលខ្លីៗ១០ទៅ១៥នាទី ដើម្បីបន្សាំខ្លួន។

៦. ជៀសវាងកំហុសដដែលៗ ៖ វិធីសាស្រ្តមួយទៀតដែលជួយរក្សាការប្តេជ្ញាចិត្តនៅឆ្នាំថ្មី គឺការផ្ទៀងផ្ទាត់កំហុសចាស់ៗ និងផ្លាស់ប្រែរាល់កំហុសដែលធ្លាប់មានកន្លងមក ប្រសិនបើរកឃើញថា សកម្មភាពកាលពីឆ្នាំមុនៗ នាំឱ្យបរាជ័យ នោះមិនគួររារែកក្នុងការកាត់ចោលពេលធ្វើផែនការសម្រាប់ឆ្នាំថ្មីនោះទេ។ មួយវិញទៀតគួរទុកចន្លោះដើម្បីពិចារណា ឬក៏សម្រាកដើម្បីឆ្លុះបញ្ចាំងមុនពេលសម្រេចចិត្តអនុម័តផែនការផ្ទាល់ខ្លួនសម្រាប់ឆ្នាំថ្មី។

៧. ស្វែងរកការគាំទ្រ ៖ ចំណុចមួយនេះគេតែងឃើញមានការផ្តល់យោបល់ និងការពិភាក្សាជាច្រើនលើកច្រើនសាររួចហើយ គឺមកពីប្រសិទ្ធភាពត្រង់ចំណុចនេះតែងហុចផលបន្ទាប់ពីអនុវត្តហើយ ព្រោះកាលដែលមានក្រុមមនុស្សសម្រាប់គាំទ្រក្នុងការជំរុញទឹកចិត្ត ឬក៏ការផ្តល់ជាកម្លាំងចិត្ត បានរួមចំណែកដល់ការពន្លឿនភាពរីកចម្រើនយ៉ាងធំមួយ។ មួយវិញទៀត ការគាំទ្រ ក៏បានរួមចំណែកបង្កើនភាពរីករាយមួយកម្រិតដែរ ប្រសិនបើបានជួបបុគ្គលដែលអាចទុកចិត្តបាន គួរតែចែករំលែកនូវអ្វីដែលខ្លួនចង់ធ្វើ និងស្នើជំនួយពីពួកគាត់ តាមដែលអាចធ្វើបាន មិនថាសមាជិកគ្រួសារ ឬក៏មិត្តស្និទ្ធស្នាលនោះទេ។

៨. រកហេតុផលមកបន្តទឹកចិត្តខ្លួនឯង ៖ ការចាប់ផ្តើមអនុវត្តន៍សកម្មភាពដំបូងៗ ក្នុងការប្តេជ្ញាចិត្តឆ្នាំថ្មី បានធ្វើឱ្យអារម្មណ៍ពុះកញ្រ្ជោល និងមានកម្លាំងចិត្តពោរពេញទៅដោយថាមពល​ នេះគឺដោយសារតែបញ្ហាប្រឈមមិនទាន់មានច្រើន ហើយការជំនះជាមួយឧបសគ្គក៏មិនទាន់ដល់ពេល ដែលធ្វើឱ្យភាពស្រួលចិត្ត និងការតាំងចិត្តមិនទាន់ដល់កម្រិតមួយចង់បោះបង់នៅឡើយ ដូច្នេះដំបូងៗប្រាកដជាគិតថា អ្វីៗដែលបានកំណត់សុទ្ធតែមានភាពងាយស្រួលទាំងអស់។ យ៉ាងណាមិញបន្ទាប់ពីបានសាកល្បងជាមួយសកម្មភាពដែលមិនទម្លាប់ពីមុនៗ យើងឃើញថា ភាពរារែកនៃការកែទម្លាប់ចាស់ៗ ចាប់ផ្តើមមានអារម្មណ៍ថាពិបាកបន្តិចម្តងៗ ដូចជាត្រូវងើបពីព្រលឹម ឬត្រូវហាត់ប្រាណឱ្យបានរៀងរាល់ថ្ងៃជាដើម ដែលនេះជាកត្តានាំឱ្យថាមពលចាប់ផ្តើមថយចុះទៅតាមទំហំបញ្ហាដែលជួបប្រទះ។

អ្វីដែលអាចធ្វើបាន នៅពេលដែលត្រូវប្រឈមមុខនឹងស្ថានភាពស្ទើរតែចង់បោះបង់បែបនេះ គឺការរំឮកខ្លួនឯងឱ្យបានញឹកញញអំពីការចាប់ផ្តើមដំបូង ថាតើហេតុអ្វីបានជាចាប់ផ្តើម? ឬគិតទៅដល់លទ្ធផលដែលចង់បាននៅពេលខាងមុខ។ មួយវិញទៀតអាចអង្គុយសរសេរពីដំណោះស្រាយ ឬក៏បំបែកភាពងាយស្រួលណាមួយក្នុងការឈានទៅរកវិធីសម្រេចគោលដៅ។

៩. រក្សាគោលជំហរជានិច្ច ៖ គិតចាប់ពីរយៈពេលនៃការចាប់ផ្តើមឆ្នាំថ្មី យ៉ាងហោចណាស់ត្រឹមខែមីនានៃដើមឆ្នាំ គឺជាពេលវេលាមួយដែលមនុស្សចាប់ផ្តើមបាត់បង់ការជំរុញទឹកចិត្ត។ ដូច្នេះក្រៅតែពីការធ្វើផែនការសកម្មភាព ការរកហេតុផលដើម្បីរក្សាគោលជំហរក៏ជាចំណែកសំខាន់ពុំអាចខ្វះបានដែរ ទោះបីជាករណីខ្លះមិនបានធ្វើឱ្យទៀងទាត់រាល់សកម្មភាពដែលបានកំណត់ក៏ដោយ។ ក្នុងកម្រិតរយៈពេលបីខែ កុំរារែកក្នុងការផ្លាស់ប្តូរផែនការ ប្រសិនបើរកឃើញថាវាមិនប្រក្រតី ព្រោះភាពបត់បែន ក៏ជាចំណែកមួយនៃភាពជោគជ័យដែរ។

១០. សិក្សាបន្ថែម និងសម្របខ្លួន ៖ ការអនុវត្តឱ្យចេញជាសកម្មភាពក្រោយធ្វើផែនការប្តេជ្ញាចិត្តសម្រាប់ឆ្នាំថ្មី តែងកើតមានបញ្ហាប្រឈមសម្រាប់មនុស្សទូទៅ សូមកុំទាន់បោះបង់ប្រសិនបើមិនទាន់ឃើញនូវលទ្ធផលភ្លាមៗ ឬក៏ពុំអាចធ្វើដូចទាំងស្រុងទៅនឹងផែនការ ដែលបានកំណត់នៅក្នុងកាលវិភាគ។ គួរទទួលស្គាល់ស្ថានភាពជាក់ស្តែង និងធម្មជាតិនៃមនុស្សថា គ្រប់ភារកិច្ចទាំងអស់តែងមានឧបសគ្គ និងភាពមិនសមបំណងតាមលងជានិច្ច អ្វីដែលត្រូវគិតគូរនោះ គឺ តើត្រូវសម្របខ្លួន និងធ្វើបែបណាដើម្បីកុំឱ្យកំហុសដដែលៗកើតមានសាជាថ្មី។

គួររំឮកជូនថា ការផ្ទៀងផ្ទាត់សមិទ្ធផលឆ្នាំចាស់ ផ្លាស់ចូលឆ្នាំថ្មី ទោះទទួលបាននូវលទ្ធផលបែបណាក៏ដោយ លោកអ្នកពុំគួរខកចិត្តនឹងលទ្ធផលដែលទទួលបាននោះទេ ព្រោះរាល់សមិទ្ធផលដែលទទួកបានគឺមេរៀន និងបទពិសោធន៍ដែលជាទ្រព្យមួយពិបាកនឹងកាត់ថ្លៃបាន។ ដូច្នេះជំនួសឱ្យការខកចិត្តនូវភាពមិនសមបំណង គឺផ្តោតលើដំណើរការបន្ទាប់ ដែលគួរធ្វើបន្តសម្រាប់ឆ្នាំទៅមុខទៀត៕